رەسەيدىڭ كەمەروۆو وبلىسىنىڭ گۋبەرناتورى امان تولەەۆ رف پرەزيدەنتى ۆلاديمير پۋتينگە ءوز ەركىمەن قىزمەتىنەن كەتۋ تۋرالى ءوتىنىش جازدى. بۇل تۋرالى تاسس اقپارات اگەنتتىگى حابارلادى.
"بۇل شەشىمىمدى دۇرىس دەپ ەسەپتەيمىن. سەبەبى, مۇنداي اۋىر جۇكپەن گۋبەرناتورلىق قىزمەتتە وتىرۋ وتە اۋىر, مورالدىق تۇرعىدا مۇمكىن ەمەس. ءبىز 25 ناۋرىز كۇنى كەمەروۆودا بولعان وقيعاعا قايعىرىپ وتىرمىز. 64 ادامنان ايىرىلدىق, ونىڭ باسىم بولىگى بالالار", دەدى امان تولەۋوۆ.
سونىمەن قاتار ول قولىنان كەلگەننىڭ ءبارىن ىستەگەنىن ايتتى. "وپات بولعانداردىڭ وتباسى مۇشەلەرىمەن كەزدەسىپ, كومەك كورسەتۋ ماسەلەسىن رەتتەۋگە تىرىستىم. تاعى دا قايعىرا وتىرىپ كوڭىل ايتامىن. بىراق ءومىر ءسۇرۋ كەرەك قوي. مارقۇمداردى ەسىمىزدە ساقتاۋ ءۇشىن ءومىر ءسۇرۋىمىز كەرەك", دەدى ول.
ءوز كەزەگىندە رەسەي پرەزيدەنتى امان تولەۋوۆتىڭ ءوتىنىشىن قابىل الدى. ال ورنىنا ۋاقىتشا ۆيتسە-گۋبەرناتور سەرگەي تسيۆيلەۆتى قويدى.
ايتا كەتەرلىگى 73 جاستاعى ەكس-گۋبەرناتور كەمەروۆو وبلىسىن 1997 جىلدان بەرى باسقارىپ كەلەدى.