2018 جىلعى 30 ناۋرىزدا قازاقستان رەسپۋبليكاسىنىڭ توتەنشە جانە وىكلەتتى ەلشىسى كارىم كوكىرەكباەۆتىڭ قىرعىز رەسپۋبليكاسىنىڭ پرەزيدەنتى سوورونباي جەەەنبەكوۆكە سەنىم گراموتالارىن تاپسىرۋ ءراسىمى بولدى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
سالتاناتتى ءراسىم بارىسىندا قىرعىز رەسپۋبليكاسىنىڭ پرەزيدەنتى ەلشىنى ديپلوماتيالىق قىزمەتىنىڭ رەسمي باستالۋىمەن قۇتتىقتاپ, بۇل قۇرمەتتى ميسسيا ءبىزدىڭ ەلدەرىمىز اراسىنداعى باۋىرلاستىق, تاتۋ كورشىلىك جانە ءوزارا ءتيىمدى قاتىناستاردىڭ ودان ءارى دامۋىنا ىقپال ەتەتىنىنە سەنىمدىلىك ءبىلدىردى. قىرعىز رەسپۋبليكاسىنىڭ پرەزيدەنتى ءوزىنىڭ قىسقا ۋاقىت ىشىندە قازاقستاننىڭ ەلورداسى استانادا رەسمي ساپارمەن جانە ورتالىق ازيا مەملەكەتتەرى باسشىلارىنىڭ كەزدەسۋىندە ەكى رەت بولعانىن اتاپ ءوتتى. «بۇل ساپارلار كەزىندە ماڭىزدى قۇجاتتارعا قول قويىلىپ, وزەكتى ماسەلەلەر تالقىلاندى. ءسىزدىڭ قىرعىزستانعا ەلشى بولىپ تاعايىندالۋىڭىزعا وتە قۋانىشتىمىن, ءارى ءبىزدىڭ قارىم-قاتىناستارىمىز كەلەشەكتە تەرەڭدەي تۇسەدى دەپ سەنەمىن, ويتكەنى قىرعىزدار مەن قازاقتار سياقتى ءبىر-بىرىنە جاقىن حالىق جوق», - دەدى پرەزيدەنت س. جەەەنبەكوۆ.
ءوز تاراپىنان ك. كوكىرەكباەۆ مادەني-گۋمانيتارلىق جانە ەكونوميكالىق سالالاردا ەكى حالىقتىڭ ىنتىماقتاستىعىن نىعايتۋعا بەرىلگەن مۇمكىندىك ءۇشىن العىسىن ءبىلدىردى. ول ەكى باۋىرلاس حالىقتار اراسىندا قالىپتاسقان سەنىمدى ديالوگ قوماقتى شارتتىق-قۇقىقتىق بازامەن جانە قىرعىزستان پرەزيدەنتى س.جەەنبەكوۆتىڭ قازاقستانعا رەسمي ساپارى شەڭبەرىندە قول قويىلعان تاريحي قۇجاتتار: قازاقستاندىق-قىرعىز مەملەكەتتىك شەكاراسىن دەماركاتسيالاۋ تۋرالى شارتپەن جانە شەكارا رەجيمى تۋرالى كەلىسىممەن ايقىندالاتىنىن اتاپ كورسەتتى.
وعان قوسا ك.كوكىرەكباەۆ قازاقستاننىڭ شىعارماشىلىق, سپورتتىق, عىلىمي-ءبىلىم بەرۋ سالاسىنداعى دەلەگاتسيالارىنىڭ 2018 جىلعا جوسپارلانعان ۇلى جازۋشى ش.ايتماتوۆتىڭ 90 جىلدىعى جانە قىرعىزستاندا وتەتىن III-ءشى دۇنيەجۇزىلىك كوشپەندىلەر ويىنى سياقتى ءىرى ءىس-شارالارعا قاتىسۋى ءبىزدىڭ ەلدەرىمىز اراسىنداعى مادەني-گۋمانيتارلىق ىنتىماقتاستىقتى ودان ءارى دامىتۋعا سەرپىن بەرەتىنىن مالىمدەدى. ءسوز سوڭىندا ەلشى قىرعىز تاراپىن استانانىڭ 20 جىلدىعىن بىرلەسىپ مەركەلەۋگە شاقىردى.