اتىراۋ وبلىسىندا ناۋرىز مەرەكەسىنە وراي وبلىس ورتالىعى مەن 7 اۋداندا 163 كيىز ءۇي قۇرىلدى. ونىڭ 63-ءى اتىراۋ قالاسىنىڭ ەنشىسىندە, شاھارداعى 10 الاڭدا مادەني-كوپشىلىك شارا ءوتتى, دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.
مەرەكەلىك شارالار تاڭەرتەڭگى ساعات 10-دا باستالدى. مەرەكەنىڭ باس ورداسى بولعان سۇلتان بەيبارىس الاڭىندا ەكى كۇن بويى 23 كيىز ءۇي تىگىلىپ, نەگىزگى كونتسەرتتىك باعدارلامادان بولەك تەاترلاندىرىلعان قويىلىم كوپشىلىك نازارىنا ۇسىنىلدى. ءار كيىز ءۇيدىڭ الدىندا ۇلتتىق ويىندار وينالىپ, سپورتتىق جارىستاردا جۇلدەگەرلەر انىقتالدى. ارتىستەر ونەر كورسەتتى, جارمەڭكەلەر ءوتتى. اقشاڭقان اعاش ۇيلەردى وڭىردەگى شەتەلدىك كومپانيالار, مەملەكەتتىك جانە جەكە مەكەمەلەر, قوعامدىق ۇيىمدار دا قۇردى.
مەرەكەلىك شارادا وبلىس اكىمى نۇرلان نوعاەۆ قۇتتىقتاۋ تىلەگىن ايتتى.
-ناۋرىز – بابالارىمىزدان مۇرا بوپ قالعان مەيرام, بۇل كۇنى تابيعاتتىڭ ءوزى جاندانىپ, تىرشىلىك تۇلەيدى, ادامداردىڭ جۇرەكتەرى مەيىرىم مەن جىلىلىققا تولادى. بۇگىن بارلىق قازاقستاندىقتار ۇلتىنا, دىنىنە قاراماستان, ناۋرىز مەيرامىن تويلايدى,-دەدى نۇرلان نوعاەۆ. -بۇگىن-اق تىلەكتەر اقتارىلاتىن كۇن. مەملەكەت باسشىسى ايتقانداي, قازاقستان تاۋەلسىزدىك جىلدارىندا قوعامنىڭ قاي سالاسىندا بولماسىن ءىرى تابىستارعا قول جەتكىزدى. بۇل جەتىستىككە ارقايسىمىزدىڭ قوسقان ۇلەسىمىز بار, ويتكەنى بىرلىگى بەرىك, ءوز كۇش-قايراتىنا سەنىمدى جاندار عانا ءوسىپ-وركەندەگەن قازاقستاندى قۇرۋعا قابىلەتتى.
شارا بارىسىندا ەڭ ادەمى كيىز ءۇي انىقتالدى. ءبىرىنشى ورىن جۇلدەگەرىنە 300 000 تەڭگە, ەكىنشى ورىنعا 200 000, ءۇشىنشى ورىنعا 100 مىڭ تەڭگە تابىستالدى. «ەڭ ءدامدى ناۋرىز كوجە», «ۇزدىك تەاترلاندىرىلعان قويىلىم» اتالىمدارى بويىنشا دا بايقاۋ جۇلدەگەرلەرى باعالى سىيلىقتارعا يە بولدى.
كيىز ۇيلەردە جىلجىمالى ءاسۇي ورناتىلدى, حالىققا باۋىرساق, پالاۋ مەن ناۋرىز كوجە ۇسىنىلدى.
باس الاڭنان بولەك قالاداعى 10 الاڭدا ءبىر ۋاقىتتا مەرەكە تويلاندى. «سارايشىق» كوممۋنالدىق بازارى ماڭىندا «ناۋرىز-جاڭا كۇن» اتتى كونتسەرتتىك باعدارلاما, «وليمپيادالىق رەزەرۆ» ورتالىعى عيماراتى الدىندا “ناۋرىز-بەرەكە باستاۋى” كونتسەرتى ءوتتى. «سارايشىق» كوممۋنالدىق بازارى باسشىلىعى, تۇرعىن ءۇي كوممۋنالدىق شارۋاشىلىعى, قالا مەكتەپتەرى ۇلىستىڭ ۇلى كۇنىنىڭ جوعارى دەڭگەيدە اتالىپ وتۋىنە ۇلەس قوستى. ارنايى ورناتىلعان كيىز ۇيلەردە تەگىن باۋىرساقتار مەن ۇلتتىق تاعامدار تاراتىلدى. ۇلتتىق سپورتتىق ويىن تۇرلەرىنەن جارىستار ۇيىمداستىرىلدى.
قالادا مەرەكە كەشكە دەيىن تويلانادى. 19.00-دە سۇلتان بەيبارىس الاڭىندا مەرەكەلىك كونتسەرت باستالادى. ناۋرىز مەيرامىنا ارنالعان شارالار ساعات 23.00-دە عاجايىپ وتشاشۋمەن قورتىندىلانادى.