قازاقستاندا الەۋمەتتىك جەلىلەر مەن مەسسەندجەرلەردىڭ جۇمىسىندا كىدىرىس بولاتىندىعى جونىندە ەسكەرتىلدى, دەپ حابارلايدى اقپارات جانە كوممۋنيكاتسيالار مينيسترلىگى.
«ەسىل اۋداندىق سوتىنىڭ ەكسترەميستىك ۇيىم دەپ تانىلعان «قازاقستاننىڭ دەموكراتيالىق تاڭداۋى» قوزعالىسىن قولداۋعا باعىتتالعان اقپارات ماتەريالدارىن تاراتۋعا تىيىم سالۋ جونىندەگى شەشىمىن ورىنداۋ اياسىندا قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگى تىيىم سالىنعان ماتەريالدار تارالىپ جاتقان شەتەلدىك الەۋمەتتىك جەلىلەر مەن مەسسەندجەرلەردىڭ يەلەرىنە ءتيىستى حابارلامالار جىبەرىلدى.
سونىمەن قاتار سوتتىڭ شەشىمىن ورىنداۋ ءۇشىن قۇزىرلى ورگاندار زاڭعا قايشى ماتەريالداردى ءوشىرۋ بويىنشا تەحنيكالىق جۇمىستار جۇرگىزىپ جاتىر. وسىعان وراي كەيبىر الەۋمەتتىك جەلىلەر مەن مەسسەندجەرلەردىڭ (Telegram) جۇمىسىندا تەحنيكالىق كىدىرىستەر بولۋى مۇمكىن», - دەپ حابارلادى ۆەدومستۆونىڭ ءباسپاسوز قىزمەتى.