ء«بىلىم-عىلىم ۇيرەنبەككە تالاپ قىلۋشىلارعا اۋەلى بىلمەك كەرەك. ەكىنشى – عىلىمدى ۇيرەنگەندە, اقيقات ماقساتپەن بىلمەك ءۇشىن ۇيرەنبەك كەرەك» دەگەن ابايدىڭ 32-قاراسوزىمەن تۇڭعىش رەت ەل پەدياترلارىنىڭ عىلىمي ءماجىلىسى ءوتتى. «پەدياترلار وداعى» قوعامدىق بىرلەستىگى مەن س.اسفەندياروۆ اتىنداعى قازۇمۋ-دىڭ بالالار اۋرۋلارى كافەدراسى ۇيىمداستىرعان جيىن پەدياتريا جانە بالالار حيرۋرگياسىنىڭ بۇگىنگى وزەكتى ماسەلەلەرى تاقىرىبىنا ارنالدى.
الماتىداعى پەدياتريا جانە بالالار حيرۋرگياسى عىلىمي ورتالىعىندا وتكەن شارا ەلىمىزدىڭ بارلىق مەديتسينالىق جوو دوكتورانتتارى مەن ماگيسترانتتارىن جانە مەديتسينالىق مەكەمەلەردە رەزيدەنتۋرادا وقىپ جاتقان 100-دەن استام جاس پەدياتر دارىگەرلەرىنىڭ باسىن قوستى.
– بۇل شارانى وتكىزۋدەگى باستى ماقسات – جاس عالىمداردىڭ عىلىمداعى باعىتى مەن ءبىلىم بەرۋ سالاسىنىڭ ماڭىزدى ماسەلەلەرىن تالداۋ, جاس عالىمداردىڭ عىلىمي الەۋەتىن ارتتىرۋ, پەدياتريا جانە بالالار حيرۋرگياسى سالاسىنداعى وزەكتى ماسەلەلەردى كوتەرۋ ارقىلى جاس مامانداردى عىلىممەن اينالىسۋعا شاقىرۋ. كونفەرەنتسياعا ۇزدىك دەپ تانىلعان, ارنايى كوميسسيا القاسىنان ىرىكتەۋدەن وتكەن عىلىمي جۇمىستار ۇسىنىلدى. بۇگىنگى تاڭدا جاس پەدياترلاردى دايىنداۋدا ءبىلىم, عىلىم مەن تاجىريبەنى ۇشتاستىرۋ ماڭىزدى. عىلىم مەن ءبىلىمنىڭ ينتەگراتسياسى زاماناۋي ەكسپەريمەنتى بازادا ناقتى عىلىمي-زەرتتەۋلەر نەگىزىندە جاس مامانداردى دايىنداۋعا مۇمكىندىك بەرەدى, – دەدى پەدياتريا ورتالىعىنىڭ باسشىسى ريزا بورانباەۆا.
عىلىمي كونفەرەنتسيادا بالالارداعى اۋرۋلاردى ەمدەۋ مەن دياگنوستيكالاۋدىڭ زاماناۋي ادىستەرى, بالالارعا مەديتسينالىق كومەك بەرۋدى ۇيىمداستىرۋدىڭ اسپەكتىلەرى, سيرەك اۋرۋلاردى ەمدەۋدى جەتىلدىرۋ, ءتۇرلى حيرۋرگيالىق جانە سوماتيكالىق پاتولوگيالارى بار بالالاردى وڭالتۋ, پسيحولوگيالىق جانە مەديتسينالىق-الەۋمەتتىك بەيىمدەۋ سىندى وزەكتى ماسەلەلەر تالقىلانىپ, باياندامالار جاسادى. سونىمەن قاتار پەدياتريا تاجىريبەسىندە سيرەك كەزدەسەتىن ءارتۇرلى كلينيكالىق جاعدايلار ۇسىنىلدى. سونداي-اق جاس دارىگەرلەردىڭ عىلىمي جۇمىستارى مەن پوستەرلىك باياندامالارى ارنايى كورمەگە قويىلدى.
ايناش ەسالي, «ەگەمەن قازاقستان»
الماتى