"الدىمەن قازاق تىلىنە نەگىزدەلگەن لاتىن گرافيكاسى پارلامەنتتىڭ تورىندە تالقىلاندى. ونى جۇرت قولدادى. كوپ بولىپ اقىلداسقان ءىستىڭ ءتۇبى باياندى. دەگەنمەن ونىڭ دا كوپتەگەن كەمشىلىگى بولعان ەدى. حالىق ونى دەموكراتيالىق ۇردىسپەن كەڭىنەن تالقىلادى. سودان ماماندار ءالىپبيدى قايتادان قارادى",- دەيدى مىرزاتاي جولداسبەكوۆ.
مىرزاتاي جولداسبەكوۆ, مەملەكەت جانە قوعام قايراتكەرى:
بۇل الىپبيمەن قازاق ءتىلىنىڭ ماماندارى اينالىسۋى كەرەك. بۇل – ماماندار شەشەتىن ماسەلە... ەلباسى مۇمكىندىك جاساپ, حالىقپەن تالقىلادى. ناتيجەسىندە, وتكەن جىلدىڭ قازانىندا بۇل ءالىپبي بەكىتىلدى. دەگەنمەن ونىڭ دا كەمشىلىكتەرى بولدى. نوقاتى كوبەيىپ كەتتى. ءتىپتى كەيدە ءبىر ءسوزدىڭ وزىندە 7 نوقات پايدا بولدى. بۇل ماسەلە جان-جاقتى تالقىلاندى. ماماندار ماسەلەگە ارالاسىپ, كەشە عانا ەلباسىنىڭ 2017 جىلى 26 قازاندا شىققان جارلىعىنا وزگەرىستەر ەنگىزىلدى. حالقىمىزدىڭ ۇستاناتىن لاتىن گرافيكاسىنا نەگىزدەلگەن قازاق ءتىلى ءالىپبيى پايدا بولدى. اقىلداسقان ءىستىڭ ءتۇبى باياندى بولادى دەپ ايتىپ وتىرعانىمىز سول.
عاريفوللا ەسىم, اكادەميك:
– كەز كەلگەن ءىستىڭ وزىندىك بەيىمدەلۋ پروتسەسى بولادى. ماسەلەن مەن قازاقستان رەسپۋبليكاسىنىڭ ازاماتى رەتىندە بۇگىننەن باستاپ تەگىمدى, اكەمنىڭ اتىن, ءوز اتىمدى, جاقىن ادامداردى لاتىن گرافيكاسىندا جازۋدى قارقىندى تۇردە باستاماقپىن. ويتكەنى بەيىمدەلۋ دەگەن ءدال وسىلاي باستالادى. كەز كەلگەن ۇيىم, كەز كەلگەن ادام بەيىمدەلە باستاۋى قاجەت.
وندا تۇرعان قانداي قيىندىق بار؟ بۇل ارىپتەردىڭ بارلىعى بەلگىلەنگەن, بارشامىزعا ايان. مەن ءوزىم نەمىس, اعىلشىن تىلدەرىن وقىعانمىن. بۇل توپتاعى تىلدەردىڭ بارلىعى ماعان, ال جاستارعا ءتىپتى بەلگىلى. جاستار ءبىر-بىرىمەن لاتىن الىپبيىندە حات جازىسادى. بۇل ەش قيىندىق تۋدىرمايدى. بەيىمدەلۋ قاجەت, بەزىنۋدىڭ رەتى جوق, داعدىلانۋ كەرەك.
بەيبىت مامراەۆ, پارلامەنت ءماجىلىسىنىڭ دەپۋتاتى:
– ءاربىر باستامانى جۇزەگە اسىرۋدىڭ لايىقتى مەرزىمى بولادى. ياعني ءپىسىپ-جەتىلمەگەن قادامداردى جاريا ەتىپ, قولدانىسقا ەنگىزۋ دۇرىس ەمەس دەپ ويلايمىن. وسى ورايدا ناقتى قازاق ءتىلى ءالىپبيىن لاتىن گرافيكاسىنا كوشىرۋگە توقتالساق, ءبىز تەرەڭ سارالاپ ابدەن دايىندىقپەن كەلدىك. وسى يگى ءىستى مۇمكىندىكتەر مەن قوعامنىڭ پىكىرىن بىرىكتىرىپ بارىپ, جۇزەگە اسىرۋدامىز. سوندىقتان ەلىمىز ءۇشىن بۇل ءساتتى ءىس دەپ باعالايمىن. ارينە بۇل اتقارىلعان كوپ جۇمىستىڭ جەمىستى ناتيجەسى. سەبەبى العاشقى بەرىلگەن جوباعا قاراعاندا ىڭعايلانىپ قالعانىن بايقاپ وتىرمىن. ەڭ باستىسى, قولدانىس اياسىن كەڭەيتۋ ءۇشىن ەل تۇرعىندارى جاتتىعۋى كەرەك. جالپى, بۇدان سەسكەنۋدىڭ قاجەتى جوق. ەل حالقى اۋقىمدى ءارى تەرەڭ تالقىلاۋ بولعانىن جاقسى بىلەدى, سوندىقتان جەتىلدىرۋ جۇمىستارى دا دۇرىس باعىتتا بولدى.
1929-1940 جىلدار ارالىعىندا لاتىن گرافيكاسىندا شىققان كىتاپتار مەنىڭ جەكە كىتاپحانامدا بار. ءبىزدىڭ اتا-انامىز كەزىندە سول كىتاپتاردى وقىعان. سوندىقتان بىزدە ەشقانداي قيىندىق بولمايدى دەپ ويلايمىن.