جۋىردا «استانا وپەرا» تەاترى الماتى قالاسىنا گاسترولمەن باردى. وسىنداعى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا استانالىق ترۋپپا الەمدىك ونەر جاۋھارلارىنان تۇراتىن قانىق تا كەرەمەت باعدارلاما ۇسىندى.
گاسترول «رۋحاني جاڭعىرۋ» باعدارلاماسى اياسىندا مادەنيەت جانە سپورت مينيسترلىگىنىڭ قولداۋىمەن ۇيىمداستىرىلدى. تۋر قازاق مۋزىكالىق ونەرىنىڭ ايگىلى تۋىندىسى – ا.جۇبانوۆ پەن ل.ءحاميديدىڭ «اباي» ۇلتتىق كلاسسيكالىق وپەراسىمەن باستالدى.
قويىلىمدار قازاقستاننىڭ جانە يتاليانىڭ ايتۋلى ونەر قايراتكەرلەرىنىڭ قاتىسۋىمەن ساحنالانعان. العاشقى سپەكتاكلگە مۋزىكالىق جەتەكشى ءارى ديريجەرى بولعان قازاقستاننىڭ ەڭبەك سىڭىرگەن قايراتكەرى, الان بورىباەۆ. قويۋشى رەجيسسەر – تانىمال يتاليالىق رەجيسسەر دجانكارلو دەل موناكو. مۇحتار اۋەزوۆتىڭ ليبرەتتو جەلىسى بويىنشا جاسالعان ۇلى جاۋھار شىن مانىندە شىرقاۋ شابىتتىڭ شىناي جەمىسى بولدى.
– بۇل گاسترول ءبىز ءۇشىن اسا ماڭىزدى ءارى جاۋاپتى, سەبەبى, ءبىرىنشى كەزەكتە, وزىمىزگە جاقىن قازاقستاندىق كورەرمەندەرمەن قاۋىشامىز. ترۋپپامىزدىڭ كوپشىلىك ءارتىسى وزدەرىنىڭ ۇستازدارىنىڭ الدىنا شىعىپ, ونەرىن كورسەتەدى, ال ولار شاكىرتتەرىنىڭ كاسىبي شەبەرلىگىنە باعاسىن بەرمەك. ءبىز ءۇشىن بۇل كەزەكتى ەمتيحان. تۇتاستاي العاندا, ترۋپپاعا گاسترولدىك ساپارلار, ءوزارا تاجىريبە الماسۋ قاجەت. الماتىلىقتار ءۇشىن «اباي» وپەراسىن بەكەر تاڭداعان جوقپىز, بۇل تۋىندى ۇلتتىق ونەرىمىزدىڭ بەتكە ۇستار جاۋھارىنا اينالدى. وسى وپەرانى ورىنداۋ ارقىلى ءبىز اباي اتىنداعى وپەرا جانە بالەت تەاترىنا دەگەن قۇرمەتىمىزدى بىلدىرەمىز, – دەپ اتاپ ءوتتى «استانا وپەرا» تەاترىنىڭ ديرەكتورى عالىم احمەدياروۆ.
ونىڭ ەرتەڭىنە گاسترولدىك باعدارلامانى ءساتتى جالعاعان حح عاسىردىڭ اتاقتى حورەوگرافى كەننەت ماكميللاننىڭ «مانون» بالەتى بولدى. بالەت تۋىندىسى اببات پرەۆونىڭ «كاۆالەر دە گريە مەن مانون لەسكونىڭ وقيعاسى» رومانىنىڭ جەلىسى بويىنشا جاسالعان. «استانا وپەرانىڭ» رەپەرتۋارىنداعى شىرايلى شىعارما جاقىندا عانا كورەرمەن نازارىنا ۇسىنىلدى. قويىلىمدى استانالىق ساحناعا كورولدىك بالەت ترۋپپاسىنىڭ ءداستۇرىن ساقتاۋشىلار – قويۋشى بالەتمەيستەرلەر كارل بيورنەتت پەن پاتريسيا رۋانن الا كەلگەن. ونىڭ قويۋشى ديريجەرى ارمان ورازعاليەۆ. وركەسترگە وڭدەگەن – مارتين يەتس. اتاپ وتەتىن ماڭىزدى جايت, سپەكتاكل رەسەيدىڭ حالىق ءارتىسى, بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆانىڭ ارقاسىندا تەاتردىڭ قورجىنىن تولىقتىردى. ايگىلى ونەرپازدىڭ ءوزى بىرنەشە رەت باستى مانون پارتياسىن اتى اڭىزعا اينالعان لوندوندىق ساحنادا بيلەپ, كەننەت ماكميللانمەن بىرگە بەينەنى جاساۋدا جۇمىس اتقارعان. ونىڭ وسى جاۋھار تۋىندىنى ەلوردا ساحناسىنا الىپ كەلۋ تۋرالى ۇسىنىسىن قويۋشى توپ قۋانا قابىل الدى.
– م.جارردىڭ «پاريج قۇداي اناسىنىڭ سوبورىن» «استانا وپەرا» تەاترىنىڭ ترۋپپاسى ماريا تەاترى (سانكت-پەتەربۋرگ) مەن كارلو فەليچە (يتاليا) ساحناسىندا ورىنداعان ەدى, بىراق «مانون» بالەتىن گاسترول اياسىندا العاش رەت ۇسىنباقپىز. قازىرگى تاڭدا بۇل حورەوگرافيالىق تۋىندىنى اعىلشىن كلاسسيكاسى دەپ سانايدى. سپەكتاكلدە ءاردايىم جاعىمدى كەيىپكەرلەر بولادى, كورەرمەندەر ولاردىڭ قاسىرەتىنە ورتاقتاسادى, ايتسەدە, جاعىمسىز بەينەلەر دە جوق ەمەس, بىراق قويۋشى رەجيسسەر وقيعانى شەبەر جەتكىزگەنى سونشالىق, ءبىز بارلىق قاھارمانعا جىلى شىراي تانىتىپ, ۋايىم-قايعىسىنا ورتاقتاسىپ وتىرامىز, – دەدى التىناي اسىلمۇراتوۆا.
مۇنداعى مانون پارتياسىن قازاقستاننىڭ ەڭبەك سىڭىرگەن قايراتكەرى ءمادينا باسباەۆا ورىندادى. الماتىداعى گاسترولدىك ساپار موريس جارردىڭ «پاريج قۇداي اناسىنىڭ سوبورى» بالەت سپەكتاكلىن كورسەتۋمەن اياقتالادى.
مەرەي دىلداباەۆ