تۇركىستاندا «بالتاكول» كىتابىنىڭ تۇساۋكەسەر ءراسىمى ءوتتى. ءىس-شارا بارىسىندا پىكىر بىلدىرگەن زيالى قاۋىم وكىلدەرىنىڭ ايتۋىنشا, بۇل كەشەگى كەڭشارلىق قۇرىلىمنىڭ پايدالى تۇستارى مەن جەتىستىكتەرى, ەڭبەكقور ازاماتتارى مەن ءبىر سوۆحوز تۇرعىندارىنىڭ ءومىرى جايلى جازىلعان وڭىردەگى العاشقى كىتاپ.
ەلگە ىسكەرلىگىمەن تانىلعان, وڭتۇستىك قازاقستان وبلىستىق ءماسليحاتىنىڭ دەپۋتاتى سەرىكباي يبادۋللاەۆتىڭ بۇل ەڭبەگىندە ناقتى دەرەكتەرگە سۇيەنە, ءوزى تۋىپ-وسكەن وتىرار اۋدانىنا قاراستى بالتاكول سوۆحوزىنىڭ 31 جىلدىق تىنىس-تىرشىلىگى, وندا ەڭبەك ەتكەن ازاماتتار جايىندا جازىپتى. اۆتور ەڭبەك جولىن وسى بالتاكول كەڭشارىندا قاراپايىم قۇرىلىسشىدان باستاپ اعا پروراب, پارتكوم حاتشىسى, سوۆحوز ديرەكتورى لاۋازىمىنا دەيىن كوتەرىلگەن. ياعني «بالتاكول» كىتابى اۆتوردىڭ وتكەندى ەسكە الىپ, وي ەلەگىنەن وتكىزە جازعان, تۋعان جەر – وسكەن ورتاعا دەگەن ساعىنىشىنان, قۇرمەتىنەن تۋعان شىنايى شىعارما.
– ەلباسى ن.نازارباەۆ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ءاربىر ولكەنىڭ حالقىنا سۋىقتا پانا, ىستىقتا سايا بولعان, ەسىمدەرى ەل ەسىندە ساقتالعان ءبىرتۋار پەرزەنتتەرى بارىن, وسىنىڭ ءبارىن جاس ۇرپاق ءبىلىپ وسۋگە ءتيىس ەكەندىگىن ايتتى. «پاتريوتيزم كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىكتەن باستالادى» دەگەن مەملەكەت باسشىسى «تۋعان جەر» باعدارلاماسىن قولعا الۋدى ۇسىندى. يگى باستاما بۇگىندە ەلىمىزدە جۇزەگە اسىرىلۋدا. ءيا, حالقىمىزدا «وتكەنىڭدى بىلمەسەڭ – بولاشاعىڭدى بولجاي المايسىڭ», دەگەن دانالىق ءسوز بار. سول ايتپاقشى, ءوزىمىزدىڭ التىن بەسىگىمىز اتانعان قاسيەتتى «بالتاكول» اۋىلى جايلى ءسوز قوزعاي قالسام, كەۋدەمدى ماقتانىش سەزىمى كەرنەيتىنى راس», – دەيدى سەرىكباي يبادۋللا ۇلى.
بەس تاراۋدان تۇراتىن, ىرگەلى ءبىر اۋىلدىڭ ەنتسيكلوپەدياسى دەرلىك كىتاپ – جەتى جىل بويعى تىنىمسىز ىزدەنىستىڭ ناتيجەسى. «بالتاكول» قاراكول-قوي سوۆحوزىنىڭ قۇرىلۋ, قالىپتاسۋ, دامۋ جولدارى جونىندەگى دەرەكتەر, ەستەلىكتەر, 1965-1996 جىلدارى ەڭبەك ەتكەن ازاماتتاردىڭ ومىردەرەگى جيناقتالعان. سونداي-اق مۇندا اقىنجاندى ازاماتتىڭ ولەڭدەر توپتاماسى ەنگەن. «وزدەرى تۋىپ-وسكەن اۋىلى نەمەسە ايماق تۋرالى جان-جاقتى حاباردار بولعان جاستاردىڭ ەل تاريحىن دا تەرەڭ تانيتىنى انىق. بۇل كىتاپتى جازۋداعى ماقساتىم كەڭشار تاراعالى بەرى دە كوپ جىلدار ءوتتى. وكىنىشكە قاراي, توقسانىنشى جىلدارى دۇنيەگە كەلگەن ۇرپاق ءوز اۋىلىنىڭ وتكەنىنەن حابارسىز. سوندىقتان دا جاس ۇرپاققا قايراتتى دا ەڭبەكقور, ءوڭىر ەكونوميكاسىنىڭ قۋاتتى بولۋى ءۇشىن تەر توككەن اتالارى مەن باۋىرلارى جايلى ەستەلىكتى جەتكىزگىم كەلدى», دەيدى اۆتور.
سوڭعى جىلدارى دەرەكتى پۋبليتسيستيكالىق شىعارمالار جازىپ, وقىرمانعا «سىر بويى – قۇتتى مەكەنىم», «اعارتۋ» اتتى تۋىندىلارىن ۇسىنعان سەرىكباي يبادۋللا ۇلى جىلدار بويى ىزدەنىپ, ءوز قارجىسىنا باسىپ شىعارعان «بالتاكول» كىتابىن كىتاپحانالارعا, اۋىل ازاماتتارىنا تاراتپاق.
عالىمجان ەلشىباي, «ەگەمەن قازاقستان»