جەزقازعان ءوڭىرىنىڭ تۇرعىندارى تەمىر جول تاۋقىمەتىن تارتىپ وتىر

بىلتىر جىل سوڭىندا «قاراعاندى – جەزقازعان», «بالقاش – جەزقازعان» پويىزدارى توقتاپ قالدى. قازىر تەك №307-308 «جەزقازعان – استانا» پويىزى عانا ءجۇرىپ تۇر. سول ء«جۇرىپ تۇر» دەگەنى بولماسا, قىزىلوردالىق «مارال-نۇر» جشس قامتاماسىز ەتەتىن بۇل پويىزعا دا كوپ­شىلىكتىڭ وكپە-نازى كوپ. بۇل ماسەلەنى پار­لا­مەنت ءماجىلىسىنىڭ دەپۋتاتتارى دا كوتەردى. جەزقازعاندىقتاردىڭ ارىز-شاعىمدارى نەگى­زىن­دە ينۆەستيتسيالار جانە دامۋ ءمينيسترى جەڭىس قاسىمبەكوۆكە دەپۋتاتتىق ساۋال جولداندى.

– قىزمەت بابىمەن ەلىمىزدىڭ تۇكپىر-تۇكپىرىنە ءجيى قاتىنايمىن, – دەيدى جەزقازعان قالاسىنىڭ تۇرعىنى گۇل عالىمجانقىزى. – باسقا جاقتاردان جاڭا ۆاگونداردى, ولارداعى قىزمەتتى, ءتىپتى اپپاق توسەك جايمالارىن كورىپ تاڭ-تاماشا قالامىز. ءبىزدىڭ جەزقازعاندىقتار ءۇشىن ونىڭ ءبارى ارمان عانا. «مارال-نۇر» جشس بەرەتىن توسەك جابدىقتارى ابدەن توزعان, ساعال-ساعال, جولاۋشىلاردىڭ كوبى ونى الۋعا دا جيىركەنەدى. ەڭ ۇلكەن پروبلەما – ۇنەمى بيلەت جەتىسپەيدى. ءبىر جاققا بارۋ ءۇشىن بيلەتتى كەمىندە ءبىر اپتا بۇرىن الۋ قاجەت. كەيدە قاراعاندىعا دەيىن ورىن جوق دەگەن سوڭ, بيلەتتى استاناعا دەيىن الىپ, ارتىق شىعىندانۋعا تۋرا كەلەدى.

«جەزقازعان – استانا» پويىزى كۇن سايىن جۇرەدى. الايدا, نەبارى ون ەكى ۆاگون جولاۋشىلار سۇرانىسىنىڭ 70-75 پايىزىن عانا وتەپ وتىر. سوندىقتان جولاۋشىلار كاسسانى اينالىپ, تىكەلەي جولسەرىكتەرمەن كەلىسۋگە ءماجبۇر.

كەيىنگى جىلدارى اتالعان ون ەكى ۆاگوننىڭ ەكەۋى عانا جاڭارتىلعان. قالعاندارى ونداعان جىلدار بويى ەشقانداي جوندەۋ كورمەگەن تەرەزەلەرىنەن سۋىق ۇرادى, اجەتحاناسىندا جىلى سۋ جوق, ەلەكتر كوزدەرى جۇمىس ىستەمەيدى. سا­ني­تارلىق جاعدايدىڭ تومەندىگىنە جەزقاز­عان­دىقتاردىڭ عانا ەمەس, وسى وڭىرگە كەلىپ-كەتىپ تۇراتىن قوناقتاردىڭ دا ەتى ۇيرەنگەن.

قاڭتار ايىندا جەزقازعان وڭىرىنە ارنايى كەلگەن ءماجىلىس دەپۋتاتتارى حالىقتىڭ ارىز-شاعىمدارىنىڭ راستىعىنا كوز جەتكىزىپ, ءتيىستى مينيسترلىك باسشىسىنا ۆاگونداردىڭ جاعدايىن باعالاۋدى, ناقتى سۇرانىستى ءبىلۋ ءۇشىن جولاۋشىلار اعىنىنا مونيتورينگ جۇرگىزۋدى سۇراپ, حات جولدادى. وندا سونىمەن قاتار تاسىمالداۋشىنىڭ ءوز مىندەتتەرىن قانشالىقتى دۇرىس ورىنداپ وتىرعانىن تەكسەرۋ قاجەتتىگى دە ايتىلعان. 

پويىز ۆاگوندارىن جاڭارتۋ جايىن ناق­تىلاساق, «مارال-نۇر» جشس باسشى­لى­عىنىڭ ما­لىم­دەۋىنشە, كومپانيا بىلتىر بەس جاڭا ۆاگون ساتىپ السا, سونىڭ تورتەۋى قازىر قاراعاندى وبلى­سىندا ءجۇرىپ ءجۇر. ال قوسىمشا ۆاگوندار تىركەۋ ماسەلەسى ينۆەستيتسيالار جانە دامۋ مينيس­ترلىگى كولىك كوميتەتىنىڭ قۇزىرەتىندە كو­رىنەدى. كوميتەت قازىر بۇل ماسەلەنى قاراستىرۋ ۇستىندە.

– ءتيىستى شەشىم قابىلدانىسىمەن, №307-308 پويىز قوسىمشا ۆاگوندارمەن جۇرەتىن بولادى, – دەيدى «مارال-نۇر» جشس-ءنىڭ ديرەكتورى قازبەك دۋمباكوۆ.

سولاي دەگەنمەن, بۇل پروبلەما ناقتى قاشان شەشىلەتىنى بەلگىسىز. «جەزقازعان-بەينەۋ» تەمىر جول قۇرىلىسى باستالاتىنى تۋرالى حابارلانعاندا, جەرگىلىكتى حالىق شال­عايداعى تەمىر جول تۇيىعى بولۋدان قۇتى­لامىز دەپ قۋانعان ەدى. شىنىندا دا, «جەزقازعان-قىزىلوردا» پويىزى ءوڭىردىڭ دامۋىنا ايتارلىقتاي سەرپىن بەردى. الايدا, قاراعاندى باعىتىن ەستەن شىعارۋعا بولا ما؟ ۆاگوندارداعى ورىن جەتكىلىكسىزدىگى تالاي جاندى جولىنان قالدىرىپ, شارۋاسىن بوگەپ كەلەدى. اسىرەسە, قىس ايلارىندا الىس ساپارعا اۆتوبۋسپەن نەمەسە اۆتوماشينامەن شىعۋ قيىن ءارى قاۋىپسىز دە ەمەس. جەرگىلىكتى حالىق تاسىمالداۋشىنى اۋىستىرعان دۇرىس بولار دەگەن پىكىردە. باستاماشىل توپ «قازاقستان تەمىر جولى» باسشىلىعىنىڭ اتىنا ارنايى حات ازىرلەپ, قازىر قول جيناۋ ۇستىندە. ماسەلەنى, مۇمكىن, سالا باسشىلىعى شەشەر.

قايرات ءابىلدا, «ەگەمەن قازاقستان»

قاراعاندى وبلىسى