«استانا» - «سپورتينگ» اراسىنداعى ويىننان كەيىن باس باپكەرلەردىڭ ءباسپاسوز ءماسليحاتى ءوتتى.
- ءبىرىنشى تايمنان كەيىن شاكىرتتەرىڭىزگە نە ايتتىڭىز؟ ولار مۇلدە باسقاشا ويناپ كەتتى عوي.
- ليسسابونعا جەڭىسپەن ورالاتىنىمىزعا قۋانىشتىمىن. بۇل جەردەن كوپتەگەن كوماندالار كوڭىل-كۇيى ءتۇسىپ قايتقان ەدى. ءبىرىنشى تايمدا ءبىزدىڭ سول قاپتال ناشار وينادى. سەبەبى, ولاردىڭ وڭ قاپتالى بەلسەندى بولدى. ۇزىلىستە, جىگىتتەرگە وزدەرىنىڭ ۇيرەنشىكتى ويىنىن كورسەتۋىن عانا سۇرادىم. دەگەنمەن, كەرەكتى ناتيجەگە قول جەتكىزگەنىمىزگە قۋانىشتىمىز.
- جاساندى الاڭ ويىن بارىسىنا قاتتى اسەر ەتتى دەپ ويلايسىز با؟
- جوق, «استانا» ءبىرىنشى تايمدا جاقسى وينادى. ءبىز قاتە تاكتيكا الىپ شىققانداي كورىندىك تە, بىرنەشە قاتەلىكتەر جاسادىق. تەك ەكىنشى تايمدا عانا ءوز-وزىمىزگە كەلە الدىق.
- «استانانىڭ» بۇگىنگى ويىنىن قالاي باعالار ەدىڭىز؟
- «استانا» كوماناسى ءوز الاڭىندا جاقسى وينايتىنىن ءبىلىپ كەلدىك. ەندى ەكىنشى ويىندا ليسسابوندا ءبىز وتە سەنىمدى ونەر كورسەتەتىن بولامىز. سەبەبى, العاشقى ماتچتا تەكە-تىرەس تاعىدىرىن شەشتىك دەپ ويلايمىن. سەيدۋ دۋمبيا كوپتەگەن گول سالىپ, مۇمكىندىكتەرىن ءمۇلت جىبەرمەي ءجۇر. ونىڭ ويىنى جاقسارىپ كەلە جاتقانىن ايتقىم كەلەدى. ال كوەنتراونى الماستىرۋىمنىڭ سەبەبى, وڭ قاپتالداعى «استانانىڭ» ويىنشىسى قايتا-قايتا الداپ, ءوتىپ, قاۋىپ توندىرە بەردى.
- «استانا» كەلەسى ويىن الدىندا ەشقانداي مۇمكىندىكسىز قالدى؟ ال «سپورتينگ» ءۇشىن ەڭ باستى ماسەلە نە بولدى؟
- ءبىز ءۇشىن ەڭ ۇلكەن ماسەلەمىز جاساندى الاڭ بولدى. اۋا-رايى ءبىز ءۇشىن قاتتى اسەر ەتە قويعان جوق. سىرت الاڭدا ويناۋ كەز-كەلگەن كومانداعا قيىن. ال «استانا» سەكىلدى ءوز الاڭىندا جاقسى وينايتىن ۇجىمدارعا قارسى ماتچتا ناتيجەگە قول جەتكىزگەنىمىزگە ريزامىن.
- «استانا» كومانداسى ءبىرىنشى بولىپ گول سوققان كەزدە ءسىزدىڭ ويىڭىز قالاي بولدى؟
- قارسىلاس تەحنيكالىق جاعىنان ساپالى ەكەنى بەلگىلى. ەرەكشە ويىن ۇلگىسىنە يە, مىعىم ۇجىم. ولار كەز-كەلگەن قارسىلاستى ۇتىپ كەتە الاتىن جاعدايى بار. تاكتيكالىق تۇرعىدا دا, مىقتى ەكەنى كورىنىپ تۇر.
- ەندى وسىدان كەيىن جاۋاپتى ماتچتا ەكىنشى قۇراممەن شىعا سالاتىن دا شىعارسىز...
- مەن ناتيجەگە ريزامىن. دەگەنمەن, فۋتبولدا بارلىعى مۇمكىن. مەندە ەكىنشى قۇرام دەگەن جوق. بارلىق فۋتبولشىلار مەن ءۇشىن بىردەي. سوندىقتان دا, ەكىنشى ويىن الدىندا كىمدى شىعاراتىنىمدى قازىر-اق ايتا سالامىن.
ەرمۇحامەد ماۋلەن