بۇگىن ءوڭىرى ولەڭمەن ورىلگەن جەزقازعان- ۇلىتاۋ ايماعىندا ۇلكەن پوەزيا مەرەكەسى شىمىلدىق ءتۇردى. كيەلى مەكەندە قازاقستان جازۋشىلار وداعى باسقارماسى توراعاسىنىڭ ءبىرىنشى ورىنباسارى, حالىقارالىق «الاش» ادەبي سىيلىعىنىڭ يەگەرى, اقىن عالىم جايلىبايدىڭ اسقارالى 60 جاسقا تولۋىنا وراي «جەزقازعان – جەرۇيىعىم جۇرەكتەگى» اتتى جىر كەشى ءوتتى.
جىر ساپارىنا اقىننىڭ شاشباۋىن كوتەرىپ بەلگىلى جۋرناليست نۇرتىلەۋ يمانعالي ۇلى, اقىن سەرىك اقسۇڭقار ۇلى, قوعام قايراتكەرى ءاليحان بايمەنوۆ, سازگەر ەسجان ءامىروۆ سىندى تانىمال تۇلعالار باردى.
تۇگىسكەندە تۋىپ, تۇركى ەلىنە تۇگەل تانىمال پوەزيانىڭ كورنەكتى وكىلى بولعان اقىن ۇلىمەن جەزقازعان جۇرتشىلىعى ساعىنىسا قاۋىشتى. ادەبي كەشتىڭ الدىندا قالامگەر مەكتەپ وقۋشىلارىمەن كەزدەسىپ, قالالىق مۇراجايدا بولدى.
جىر كەشى جەزقازعاننىڭ س. قوجامقۇلوۆ اتىنداعى جەزقازعان قازاق مۋزىكالىق-دراما تەاترىنىڭ اكتەرلەرى اقىن ولەڭدەرىنەن دايارلاعان شاعىن قويىلىممەن باستالدى. ع.جايلىبايدىڭ «قارا ورامال» پوەماسىن ارقاۋ ەتكەن قويىلىمدا «قارلاگ», «ماموچكينا» مولاسى جايلى الاشتىڭ باسىنان وتكەن ازاپتى تاعدىر شىنايى سيپاتتالادى. ارادكۇرەڭ اقىندى جەزقازعان قالاسىنىڭ اكىمى باتىرلان احمەتوۆ ارنايى قۇتتىقتادى. سىر-سۇحبات تۇرىندە وربىگەن ادەبي كەشتە اقىن مەن حالىق اراسىنداعى شىنايى اڭگىمە سالتاناتتى كەشتىڭ شىرايىن كىرگىزدى. اتالمىش كەشكە مۇرىندىق بولعان جەزقازعان بيزنەس جانە كولىك كوللەدجىنىڭ قۇرىلتايشىسى, بەلگىلى مەتسەنات بەكزات التىنبەكوۆ.
قايرات ءابىلدا,
«ەگەمەن قازاقستان»