«حالىقتىق باقىلاۋ» قوسىمشاسى جۇمىس جاساۋدا

جيىن بارىسىندا باسقارما ءتورايىمى دەنساۋلىق سالاسىن دامىتۋ ەلباسى جولداۋىندا كورسەتىلگەن ماڭىزدى ماسەلەلەردىڭ ءبىرى ەكەنىن العا تارتىپ, اتقارىلىپ جاتقان جۇمىستارعا توقتالىپ ءوتتى.

«"الەۋمەتتىك مەديتسينالىق ساقتاندىرۋ قورى" كەاق 2018 جىلى قازاقستاندىقتارعا  ساقتاندىرۋ تولەمدەرى جايلى مالىمەت الۋعا مۇمكىندىك بەرەتىن جاڭا مەملەكەتتىك قىزمەت تۇرلەرىن ازىرلەپ, ەمحاناعا تىركەۋ قىزمەتىن جەتىلدىرۋدى جوسپارلاپ وتىر. وتكەن جىلدىڭ وزىندە «مسق: حالىقتىق باقىلاۋ» قوسىمشاسى ىسكە قوسىلعان بولاتىن. بۇل ەلىمىزدەگى اۋرۋحانالار مەن ەمحانالاردىڭ اتقارىپ جاتقان جۇمىسىن تۇتىنۋشىلار تاراپانىنان باعالاپ وتىرۋعا, ولاردىڭ جۇمىسىن باقىلاپ وتىرۋعا مۇمكىندىك بەرەدى. سونىمەن قاتار قوسىمشا ارقىلى ازاماتتار ەمحانالارعا ءوزىنىڭ پىكىرىن قالدىرا الادى. بۇل ءبىز ۇشىندە ۇلكەن جەڭىلدىك. سەبەبى حالىقتىڭ باعالاۋى ارقىلى ءبىز ولاردىڭ جۇمىس جاساۋ رەيتينگىن شىعارا الامىز», دەدى "الەۋمەتتىك مەديتسينالىق ساقتاندىرۋ قورى" كەاق باسقارما ءتورايىمى ەلەنا باحمۋتوۆا.

سونىمەن قاتار ول, وسى توقسان سوڭىندا ازاماتتار ءمامس جۇيەسىنە قاتىسۋ جانە تولەنگەن جارنالار تۋرالى مالىمەتتى حالىققا قىزمەت كورسەتۋ ورتالىقتارى ارقىلى الۋ (حقكو) مۇمكىندىگىنە يە بولاتىنىن جەتكىزدى.

ء«بىزدىڭ جوسپارىمىز بويىنشا, وسى توقسان سوڭىندا ازاماتتار ءمامس جۇيەسىنە قاتىسۋ جانە تولەنگەن جارنالار تۋرالى مالىمەتتى حالىققا قىزمەت كورسەتۋ ورتالىقتارى ارقىلى الۋ (حقكو) مۇمكىندىگىنە يە بولماق. مىسالى, قازىر وسىعان ۇقساس قىزمەتتەردى "ەلەكتروندى ۇكىمەتتىڭ" egov.kz پورتالى ارقىلى الۋعا بولادى. ول ءۇشىن ەلەكتروندى تسيفرلىق قولتاڭبا قاجەت. تسيفرلىق قولتاڭباسى بار كەز-كەلگەن ازامات "جەكە كابينەتكە" كىرىپ, ءمامس تولەمدەرىنىڭ سوڭعى رەت قاشان جاسالعانىن انىقتاپ بىلە الادى. مۇنىڭ كوپشىلىك ءۇشىن ىڭعايلى ەمەستىگىن ازاماتتارىمىز ءجيى ايتىپ ءجۇر. ال, بۇل قىزمەت حقكو ارقىلى كورسەتىلە باستاعاننان كەيىن تۇرعىندار ءوز اتىنا اۋدارىلعان جارنالار مەن اۋدارىمدار تۋرالى مالىمەتتى, سونداي-اق ءمامس جۇيەسىنىڭ قاتىسۋشىسى دەگەن انىقتاما قاعازىن دا سول جەردەن الا الادى», دەدى ەلەنا باحمۋتوۆا.

راۋان قايدار,

«ەگەمەن قازاقستان».