13 اقپان كۇنى كەري تاگاۆا, مايكل مەدسەن, باي لين, مارك داكاسكوس, ەريك روبەرتس سىندى گولليۆۋد جۇلدىزدارى شىعىس قازاقستان تۋرالى دەرەكتى فيلمگە ءتۇسۋ ءۇشىن وسكەمەنگە كەلگەن بولاتىن. الەمگە ايگىلى اكتەرلەر وبلىستىڭ مارقاكول, كاتونقاراعاي, جيدەباي, قوڭىر اۋليە ۇڭگىرى, ىرعىزباي مازارى سەكىلدى تابيعاتى كوركەم جەرلەرى مەن كيەلى ورىندارىن ارالاپ, تۇسىرىلگەن فيلم كەيىن الەمدىك تەلەارنالاردان كورسەتىلەدى دەپ جوسپارلانىپ وتىر. بۇگىن 1980-1990 جىلدارى شىققان «مورتال كومبات», «اق جولبارىس», «ايداھارلار ايقاسى» سىندى فيلمدەردە باستى رولدەردى سومداعان اكتەر كەري تاگاۆامەن از-كەم سۇحباتتاسۋدىڭ ءساتى ءتۇستى.
- شىعىس قازاقستانعا العاش رەت كەلىپ وتىرسىز. العان اسەرىڭىز قانداي؟
- وبلىستارىڭىزعا تۇڭعىش رەت كەلىپ وتىرعانىمىز راس. وڭىرلەرىڭىزدى ءالى تولىق ارالاپ ۇلگەرگەنىمىز جوق. دەگەنمەن دە وسكەمەننىڭ ماڭى مەن قالا ىشىندەگى كورىكتى جەرلەردىڭ ءبىرازىن تاماشالادىق. شاھارداعى ەكى بىردەي مۋزەيگە وبلىس اكىمى دانيال احمەتوۆ مىرزانىڭ ءوزى باستاپ اپارىپ, قازاق حالقىنىڭ سالت-داستۇرلەرىمەن, ادەت-عۇرىپتارىمەن تانىستىرىپ, ۇلتتىق تاعامدارىڭىزدان ءدام تاتتىردى. الداعى كۇندەرى شىعىس قازاقستانداعى كيەلى ورىندارعا ارنايى بارىپ, دەرەكتى فيلم تۇسىرەمىز. اسەرىمىزدى سودان كەيىن ايتا جاتارمىز.
- «قازاقستاننىڭ ازاماتتىعىن الامىن» دەپ قالدىڭىز ءبىر سوزىڭىزدە.
-مەن دە قازاقتار سەكىلدى كوشپەندىمىن. كوشىپ جۇرگەندى جاقسى كورەمىن. سوندىقتان كەلەشەكتە ازاماتتىق الىپ جاتسام تاڭعالماڭىزدار.
- ءبىزدىڭ ەلىمىزدە قاي ۋاقىتتان بەرى بىلەسىز؟
-2002 جىلدان بەرى بىلەمىن. بولاشاقتا «قازاقفيلممەن» بىرلەسە جۇمىس ىستەپ, الەمدىك دەڭگەيدەگى جوبانى جۇزەگە اسىرسام با دەگەن وي بار. ءوزىمدى گولليۆۋدتاعى ەرەكشە اكتەرلەردىڭ ءبىرىمىن دەپ ەسەپتەيمىن. ويتكەنى, مەن امەريكاندىق ەمەسپىن. گولليۆۋدتا از ۋاقىت جۇمىس ىستەگەن جوقپىز. ەندى باسقا كەڭىستىككە شىققىم كەلەدى.
- سوندا گولليۆۋدتان شارشادىڭىز با؟
- مەن گولليۆۋدتاعى العا قويعان ماقساتتارىما جەتتىم. ارينە, گولليۆۋدتىڭ مەنىڭ ومىرىمدەگى الار ورنى بولەك. دەگەنمەن دە باسقا جوسپارلار كوپ. الەمدىك دەڭگەيدەگى. تاعى دا قايتالايمىن, مەن كوشپەندى جاۋىنگەرمىن. كوشپەندىلەرگە ءبىر ورىندا تۇراقتاپ قالۋ جاراسپايدى.
- كوپتەگەن تۇركى حالىقتارى, ونىڭ ىشىندە كارىستەر دە, جاپوندار دا ء«بىزدىڭ اتا-بابالارىمىز التايدان تاراعان, ءبىز التايلىقپىز» دەپ جاتادى.
- مەن مۇنى جەرلەستەرىمنەن بۇرىن ۇعىنعام. ارينە, ولاردىڭ ء«بىز التايلىقپىز» دەۋى, وسىنى مويىنداۋى مەنى قۋانتادى. قازىر جاپونيادا بۇرىنعى جاپون جانە بۇگىنگى جاپون دەگەن ۇعىم قالىپتاستى. بۇگىنگى جاپون بۇرىنعىسىن ۇمىتىپ زاماناۋي جاپون بولۋعا تىرىسادى. بۇل – ۇلكەن ماسەلە. ونىڭ ءبىر سەبەبى اتوم بومباسىنىڭ زارداپتارىنا بايلانىستى دەپ ويلايمىن.
- اتوم بومباسى تاقىرىبىنىڭ ءبىزدىڭ ەلگە دە قاتىسى بارىن بىلەتىن بولارسىز...
-ءيا, ودان حابارىم بار. بۇل رەتتە سىزدەردىڭ پرەزيدەنتتەرىڭىز نۇرسۇلتان نازارباەۆتىڭ ەڭبەگى زور. قازاقستان كسرو قۇرامىندا بولعان كەزدە جاپون قالالارى سەكىلدى اتوم زاردابىن از تارتقان جوق. باۋىرلاس, تاعدىرلاس ەل ەكەنىمىزدى جاقسى بىلەمىن. قازاق پەن جاپون حالقى رۋحىنىڭ مىقتىلىعى ارقاسىندا اتوم اجداھاسىنان امان قالدى. قازاق حالقىن سول ءۇشىن دە ەرەكشە قۇرمەتتەيمىن. قازاق – جاۋىنگەر, باتىر حالىق. مۇنى ۇمىتپاڭىزدار. بالالارىڭىز دا ۇمىتپاسىن. مەن دە ءوزىمنىڭ جاپون زامانداستارىما جاۋىنگەرلىك رۋحتى جوعارى ۇستاۋ كەرەكتىگىن ءاردايىم ايتىپ جۇرەمىن. ءبىز باتىسقا ەلىكتەمەۋىمىز كەرەك. ءبىز ءۇشىن, شىعىس حالىقتارى ءۇشىن ادامداردى قۇرمەتتەۋ مەن سىيلاستىق ءبىرىنشى ورىندا. قۇرمەت دەگەن باس يۋ ەمەس, ول -قوناقجايلىق, مەيىرباندىق. باتىستا سولداتتىڭ ەنەرگياسى بار. ولاردىڭ ويلايتىنى – اتاق پەن اقشا. تەك بيزنەس. شىعىس جاۋىنگەرلىك رۋح بار. مەيىرىم بار. ءبىز ەشقاشاندا اقشانى العا قويمايمىز. ءبىزدىڭ سەرىگىمىز – ات, ءبىز كۇش-قۋاتتى دارحان دالادان الامىز. ماسەلەن, دالادا قىرىق گرادۋس اياز بولسا اقشا كومەكتەسە مە؟ اتاق جاردەمدەسە مە؟ جوق, بىزگە تەك ءتاڭىر عانا كومەكتەسەدى.
- كەشە سىزگە وبلىس اكىمى د.احمەتوۆ ابايدىڭ ءۇش تىلدە باسىلعان كىتابىن تارتۋ ەتتى. اباي جايىندا بۇعان دەيىن ءبىلۋشى مە ەدىڭىز؟
- ءبىرىنشى رەت ەستىدىم. ەندى ابايدى وقيتىن بولامىن. وسى ءبىر-ەكى كۇن ىشىندە سىزدەردىڭ تاريحتارىڭىزدىڭ تامىرى تەرەڭدە جاتقانىن, مادەنيەتتەرىڭىز بەن سالت-داستۇرلەرىڭىز وتە باي ەكەنىن بايقادىم.
- شىعىس قازاقستان تۋرالى دەرەكتى فيلم تۇسىرمەكسىزدەر؟ وبلىستىڭ تۋريستىك الەۋەتىن قالاي باعالايسىز؟
- لاس-ۆەگاس پەن سان-فرانسيسكو قالالارىن مىسال رەتىندە ايتايىن. بۇل شاھارلاردا تۋريزم مىقتى دامىعان. بىراق ادامگەرشىلىك تومەن. سىزدەرگە ايتار تىلەگىم, تابيعاتتى اقشاعا ايىرباستاماساڭىزدار دەيمىن. ءسوز جوق, تاماشا تابيعاتتى كورسەتۋ كەرەك, تۋريستەردى شاقىرۋ كەرەك, بىراق كوزدىڭ قاراشىعىنداي ساقتاي ءبىلۋ كەرەك.
- ارنولد شۆارتسەنەگگەر, جان-كلود ۆان دامم سەكىلدى زامانداستارىڭىزبەن ارالاسىپ تۇراسىز با؟
-جوق. مەن اكتەرلەردى ۇناتپايمىن. ولاردىڭ اتاعىندا شاتاعىم جوق. ماعان شىنايى ادامدار ۇنايدى. اتاقتى بولۋ ماڭىزدى ەمەس, ادامدارعا كومەكتەسۋ ماڭىزدى.
- قازاقستان دەسە كوز الدىڭىزعا نە ەلەستەيدى؟ بۇگىندە ءبىزدىڭ ەلىمىزدى الەمگە كىمدەر تانىتىپ ءجۇر؟
- GGG (ك ۇلىپ). گەنناديدى جاقسى بىلەمىز. « ۇلىتاۋ» توبىنىڭ كۇيلەرىن جاقسى كورەمىن. جۇرەگىمە, جانىما جاقىن. جاۋىنگەرلىك رۋح بار ولاردىڭ كۇيلەرىندە. ءسوز سوڭىندا ايتايىن دەگەنىم, سىزدەر قازاق بولىپ تۋعاندارىڭىزعا ماقتانىڭىزدار. بىراق ءوزىمىزدى باسقالاردان جوعارى قويمايىق. باسەكەگە كەلگەندە ەشكىمدى الدىمىزعا سالمايىق.
- اڭگىمەڭىزگە العىس بىلدىرەمىز.
سۇحباتتاسقان ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن مەرەي قايناروۆ