سەنىمدى ارىپتەستىكتىڭ شيرەك عاسىرى

ءوزارا بايلانىستىڭ سەرپىندى جولى

قازاقستاننىڭ ۋاقىت تالابىنا ساي دامۋىنا, الەمدىك يگىلىكتەردى وزىنە سىڭى­رۋىنە ەلباسى نۇرسۇلتان نازار­باەۆ ۇستانعان كوپ-ۆەكتورلى ساياسات­تىڭ ىقپا­لى زور بولعانى انىق. اتالعان ساياسي باعىت, اسىرەسە ەلىمىزدىڭ ەۋروپا­لىق وداق­پەن ءتيىمدى ءارى تەڭگەرىم­دى قارىم-قا­تىناس ورناتىپ, حالىق­ارالىق ارەناداعى بيىك بەدەلىن قالىپتاس­تىرۋىنا مۇمكىندىك بەردى. وسى ورايدا ەۋ­روپالىق وداقتىڭ الەۋەتىن باعام­داي بىل­گەن قازاقستان ءوز مۇددەسىن كۇن تار­تىبىنە شىعارا وتىرىپ, باتىل قادام­­دار جاسادى. بۇل ەلىمىزدىڭ اتالعان بىر­لەس­تىكپەن ورناتقان ءوزارا ىنتىماقتاستى­عىنىڭ شيرەك عاسىرلىق تاريحىن زەردەلەگەندە انىق كورىنەدى...

وزگەنىڭ جامانىنان جيرەنىپ, جاق­سى­سىن ءوز پايدامىزعا اسىرۋ ىسىندە اجەپ­تاۋىر تاجىريبەمىز بار ەكەنىن ەسكەرە سوي­لەسەك, حالىقارالىق قوعامداستىقپەن قارىم-قاتىناس ورناتۋ بارىسىندا ەش­كىمگە ەسە جىبەرىپ جاتقانىمىز جوق... الايدا كورشىلەس مەملەكەتتەرمەن, سون­داي-اق باتىس ەلدەرىمەن ەتەنە بولۋ, ولار­مەن ءوزارا ىقپالداسۋ اسەرىنەن ۇلتتىق بولمىسىمىزعا جات زالالدى دۇنيە­لەر قوعامىمىزعا دەندەپ ەنىپ, رۋ­حاني قۇلدىراۋعا دۋشار بولۋىمىز مۇم­كىن دەپ قاۋىپتەنەتىنىمىز, الاڭدايتى­نىمىز راس. دەگەنمەن, وسى الاڭداۋشىلىق ءبىزدىڭ ۇلتتىق سانامىزدى وياتىپ, يممۋ­ني­تەتىمىزدى كوتەرىپ, سونىڭ ناتي­جەسىندە وزگە­نىڭ جاسىعى مەن جاقسىسىن ايىرىپ, الەمدىك قوعامداستىقتان وزى­مىزگە قاجە­تىن عانا تالعاپ الاتىن دەڭ­گەي­گە جەتكە­نىمىزدى ەسكەرۋىمىز كەرەك.

بۇگىندە وزگەنىكىن زور, وزىمىزدىكىن قور سانايتىن تۇسىنىك ءبىرشاما السىرە­گەن­دەي. ارينە بۇل جاعىمدى ءۇردىس تاۋەل­سىزدىك جىلدارىندا ۇلتتىق قۇندىلىق­تارى­مىزدىڭ قادىرىن ارتتىرىپ, ونىڭ ءمان-ماڭىزىن اشىپ كورسەتۋ باعىتىندا جۇر­گىزىلگەن مەملەكەتتىك ساياساتتىڭ ارقا­سىندا مۇمكىن بولدى. مۇنى ايتۋداعى سەبەبىمىز, قازىر ءبىز سىرت ەلدەرمەن ارىپتەستىك ورناتۋ باعىتىنداعى اۋقىمدى شارالاردى قولعا العاندا ەڭ الدىمەن ۇلتتىق مۇددەمىزدى العا شىعارۋدى باس­تى نازاردا ۇستاپ كەلە جاتقانىمىزدى قا­پەرگە سالۋ. بۇل, باسقانى بىلاي قوي­عاندا, قازاقستان مەن ەۋروپالىق وداق ەل­دەرى اراسىنداعى ەكى جاقتى جانە كوپ ­جاقتى ىنتىماقتاستىقتى دامىتۋ ىسىندە بىردەن كوزگە تۇسەدى.

بۇگىنگى قازاقستاندىقتار مەم­لە­كە­تىمىزدىڭ ەۋروپا ەلدەرىمەن تىعىز قارىم-قاتىناس ورناتۋىنا وڭ كوزقاراسپەن قارايدى. ويتكەنى حالقىمىز ەلىمىزدەن شالعاي جاتقان ەۋروپانىڭ بىزگە مادەني-رۋحاني, دەموگرافيالىق سالالار بو­يىنشا تيگىزەتىن جاعىمسىز ىقپالىنان اسا قاۋىپتەنە قويمايدى, قايتا ولاردىڭ وزىق تەحنولوگيالارىن ەكونوميكامىزدى دامىتۋدىڭ نەگىزگى تەتىكتەرى رەتىندە قاراستىرادى.

قازىرگى تاڭدا قازاقستان مەن ەۋروپا­لىق وداق اراسىنداعى ىنتىماق­تاس­تىق ءوزىنىڭ جوعارى دەڭگەيىن كورسەتۋدە. بۇل باعىتتاعى جۇمىستاردىڭ ناتيجەلى بولۋى­نا ەكى جاق تا مۇددەلىلىك تانىتىپ كەلەدى. بۇگىندە ەلىمىزدىڭ سىرتقى ساۋ­دا اينالىمىنىڭ جارتىسىنا جۋى­عى ەۋرو­وداقتىڭ ۇلەسىنە تيەسىلى. بۇدان ءبىز ءوزارا ارىپتەستىكتىڭ الەمدىك ەكونو­مي­كا­داعى داعدارىسقا قاراماستان, نىعايا تۇس­كەنىن ۇعامىز.

الەمدەگى قازىرگى جاعداياتتاردى ءجىتى باقىلاپ وتىرعان قازاقستان ءوزىنىڭ سىرت­قى ساياساتىنىڭ ەۋروپالىق باعىتىن جۇزەگە اسىرۋدا نەگىزگى ءۇش سالاعا با­سىم­­دىق بەرۋدە. ونىڭ ءبىرىنشىسى ەكو­نومي­كا سالاسىنا قاتىستى. بۇل ورايدا ەو الەۋەتىن ەسكەرە وتىرىپ, ەل ەكو­نومي­كاسىن نىعايتۋ, ەۋروپالىق كاپي­تالدى تارتۋ, ساۋدا-ەكونوميكالىق باي­­لانىستاردى ورىستەتۋ, الەۋمەتتىك جانە ەكولوگيالىق ماسەلەلەردى شەشۋ كوز­دەلەدى. ەكىنشىسى ساياسات سالاسىنا بايلا­نىستى. بۇل باعىت بويىنشا ەو-نىڭ ين­تە­گراتسيالىق تاجىريبەسىن قولدانۋ, يادرو­لىق قارۋدى جويۋ جانە تاراتپاۋ ماسە­لەلەرى بويىنشا ىنتىماقتاسۋ, ۇيىم­داسقان قىلمىسقا, حالىقارالىق لاڭ­كەستىككە قارسى كۇرەس بويىنشا كۇش بىرىكتىرۋ, بەيبىت وپەراتسيالار مەن باسىم­دىقتار شەڭبەرىندە ارىپتەستىك ورناتۋ قاراستىرىلادى. ال ءۇشىنشىسى مادەني-رۋحاني سالانى قامتيدى. مۇندا ەلىمىزدى ەۋروپالىق كەڭەستىككە تانىستىرۋ, وڭ ءيميدجىن قالىپتاستىرۋ باعى­تىندا جۇمىس جۇرگىزۋ, ءبىلىم بەرۋ جانە عىلىمي-زەرتتەۋ جوبالارى بويىنشا ىنتىماقتاستىقتى ىسكە اسىرۋ جايى قارالعان.

الەۋەتىن الەم مويىنداعان, جاھان­داعى سالماقتى ساياسي-ەكونوميكالىق بىرلەستىكتەردىڭ ىشىندەگى بىرەگەيى سانالاتىن ەۋروپالىق وداق قازىرگى تاڭدا ۇلىبريتانيانى قوسا ەسەپتەگەندە 28 مەملەكەتتىڭ باسىن بىرىكتىرىپ وتىر. بۇل ەلدەردە سوڭعى دەرەكتەرگە قاراعاندا, 505 ميلليوننان استام ادام تۇرادى. ەۋروپالىق كەڭەس جانە ەۋروپالىق كوميسسيا سىندى اسا بەدەلدى باسقارۋ ورگاندارى بار, ادامزات دامۋىنىڭ الدىڭعى قاتارىندا تۇرعان بۇل وداق پەن قازاقستان اراسىنداعى بايلانىس 1993 جىلدىڭ 2 اقپانىندا باستالعان-دى. ىلە سول جىلدىڭ جەلتوقسانىندا بريۋسسەلدە قازاقستاننىڭ ەۋروپالىق وداق جانىنداعى وكىلدىگى ءوز جۇمىسىن باستاسا, 1994 جىلعى قازاندا الماتى قالاسىندا ەۋروپالىق كوميسسيانىڭ وكىلدىگى ىسكە كىرىستى. سودان بەرى ارادا وتكەن 25 جىلدىڭ كولەمىندە ەكى جاقتىڭ باسشىلارى سان مارتە كەزدەسىپ, ءوزارا بايلانىستاردى جوعارى دەڭگەيگە كوتەرە ءبىلدى. بۇل ورايدا ەلباسى نۇرسۇلتان نازارباەۆتىڭ ەڭبەگى زور ەكەنىن اتاپ وتكەنىمىز ورىندى. ماسەلەن, قازاقستان پرەزيدەنتىنىڭ ەو-نىڭ اكىمشىلىك ورتالىعى بريۋسسەلگە سەگىز ساپارى جۇزەگە اسىپ, (1993 ج. اقپان, 2000 ج. ماۋسىم, 2002 ج. قاراشا, 2006 ج. جەلتوقسان, 2010 ج. ءساۋىر مەن قازان, 2014 ج. قازان, 2016 ج. ناۋرىز), ولاردىڭ بارلىعىندا ەۋروپالىق وداق باسشىلىعىمەن كەلىسسوزدەر جۇرگىزدى. ەلباسىنىڭ ەو باسشىلىعىمەن كەزدەسۋلەرى ءارتۇرلى حالىقارالىق فورۋمدار اياسىندا دا بولدى. ماسەلەن, ەۋروپالىق كوميسسيا توراعاسى ج.م.بارروزۋمەن 2010 جىلى 20 قاراشادا ليسسابونداعى ناتو سام­ميتىندە, 2011 جىلى 19 ساۋىردە كيەۆ يادرو­لىق سامميتىندە, 2014 جىلى 24 قاڭ­­تاردا داۆوستاعى دۇنيەجۇزىلىك ەكو­نو­­ميكالىق فورۋمدا, ەۋروپالىق كوميسسيا توراعاسى ج.-ك.يۋنكەرمەن 2016 جىلى 4 قىركۇيەكتە «G20» سامميتىندە كەزدەسۋلەر وتكىزدى.

سول سياقتى ەۋروپالىق وداق جەتەك­شى­لەرىنىڭ دە استاناعا ساپارلارى بولىپ تۇردى. ناقتىلاي ايتقاندا, 2010 جىلى 1-2 جەلتوقساندا ەۋروپالىق كەڭەستىڭ سول كەزدەگى توراعاسى ح. ۆان رومپەيدىڭ قازاقستانعا العاشقى ساپارى بولىپ, ول ەلوردادا وتكەن ەقىۇ سامميتىنە قاتىستى. ال 2013 جىلى 2-3 ماۋسىمدا ەۋروپالىق كوميسسيانىڭ سول تۇستاعى توراعاسى ج.م.بارروزۋدىڭ قازاقستاندا العاشقى رەسمي ساپارى ءوتتى.

ەۋروپالىق وداق ۇلەسى باسىم

جالپى, ەكىجاقتى ىنتىماقتاستىق 1999 جىلى بريۋسسەلدە بەكىتىلگەن ارىپتەستىك جانە ىنتىماقتاستىق تۋرالى كەلىسىم, 2015 جىلدىڭ 21 جەلتوقسانىندا استانادا قول قويىلعان كەڭەيتىلگەن ارىپتەستىك جانە ىنتىماقتاستىق تۋرالى كەلىسىم (كاىك) اياسىندا جاندانا ءتۇستى. ايتا كەتەيىك, ەۋروپالىق وداق كەڭەيتىلگەن ارىپتەستىك جانە ىنتى­ماق­­تاستىق تۋرالى كەلىسىمدى قازاق­ستان­نان وزگە كەڭەستىك كەڭىستىكتەگى ەلدەر­دىڭ ەشقايسىسىمەن جاساعان جوق. بۇل ەلىمىزدىڭ اتالعان الەۋەتتى بىرلەستىك ءۇشىن ماڭىزى جوعارى ەكەنىن اڭعارتادى. اتالعان قۇجات بۇعان دەيىن قالىپتاسقان ارىپتەستىكتى ۋاقىت تالابىنا ساي جاڭا سيپاتتا دامىتا تۇسۋگە جول اشتى. وندا حالىقارالىق, ايماقتىق قاۋىپسىزدىك, ساۋدا, ينۆەستيتسيا, ينفراقۇرىلىمدى دامىتۋ, يننوۆاتسيا, مادەنيەت, سپورت جانە تۋريزم سياقتى ماڭىزدى دەگەن 29 سالا قامتىلدى.

قازىرگى تاڭدا قازاقستاننىڭ سىرتقى ساۋدا سالاسىنداعى ارىپتەستەرى اراسىندا ەۋروپالىق وداق ءوزىنىڭ كوشباسشى­لىق ءرولىن ساقتاپ كەلەدى. ماسەلەن, 2016 جىلى ەلىمىزدىڭ ەو ەلدەرىمەن ساۋ­دا اينالىمى 24,1 ملرد اقش دوللارىن قۇرادى. بۇل قازاقستاننىڭ جالپى ساۋ­دا اينالىمىنداعى ەو-نىڭ ۇلەسى 40 پايىزدى قۇراعانىن بىلدىرەدى. ال 2017 جىلدىڭ 10 ايىندا قازاقستان مەن ەو اراسىنداعى ساۋدا اينالىمى 24,4 ملرد دوللار بولدى. بۇل الەمدىك ەكونوميكاداعى جاعىمسىز احۋالدارعا قاراماستان, ەكى جاقتىڭ ءوزارا ءتيىمدى بايلانىس ورناتىپ, اراداعى ساۋدا اينالىمىن ازداپ بولسا دا ۇلعايتا تۇسكەنىن اڭعارتادى.

وسى ارادا ايتا كەتەيىك, ەو مەن قازاقستان اراسىنداعى ساۋدا-ەكونومي­كالىق قاتىناستاردى رەتتەي كەڭەيتىل­گەن ارىپتەستىك جانە ىنتىماقتاستىق تۋرالى كەلىسىمنىڭ ارقاسىندا ينۆەستي­تسيا­لىق ىنتىماقتاستىقتى كەڭەيتۋ ءۇشىن تۇراقتى نەگىز قالاندى. بۇگىندە ەۋروپا­لىق وداق ءبىزدىڭ ءىرى ينۆەستورىمىز بولىپ تابىلادى. ماسەلەن, 2016 جىلى قازاقستانعا ەو تاراپىنان قۇيىلعان تىكەلەي ينۆەستيتسيا كولەمى 10,8 ملرد دوللارعا جەتتى. بۇل سول جىلى ەلىمىزگە كەلگەن جالپى ينۆەستيتسيا كولەمىنىڭ 50 پايىزىن قۇرايدى. ونىڭ ۇستىنە, ەلىمىزدىڭ اۋماعىندا ەۋروپالىق وداق ەلدەرىنىڭ قاتىسۋىمەن 3 مىڭنان اس­تام بىرلەسكەن كاسىپورىن تابىستى جۇ­مىس ىستەپ تۇر. ەلىمىز ءۇشىن ەو ەلدەرى اراسىنداعى نەگىزگى ينۆەستورلار نيدەرلاند, فرانتسيا, ۇلىبريتانيا جانە گەرمانيا بولىپ تابىلادى.

نەگىزىندە, ەلىمىزدەن ەۋرووداق مەم­لەكەتتەرىنە ەنەرگەتيكالىق (مينەرال­دى شيكىزات, وتىن) ونىمدەر جونەل­تىلەدى. ال ولاردان بىزگە كەلەتىن ەكس­پورتتىڭ نەگىزگى بولىگىن كولىك جابدىقتارى, ماشينا­لار, ونەركاسىپ تاۋارلارى مەن حيميا­لىق ونىمدەر قۇرايدى. تاۋەلسىزدىك جىلدارىندا قازاقستان مەن ەو اراسىندا ەنەرگەتيكا سالاسىندا ءوزارا ءتيىمدى قاتىناستار ورنادى. ەۋروپانىڭ ەنەرگەتيكا سالاسىنداعى ءىرى كومپانيالار قازاقستاننىڭ مۇناي-گاز سالاسىنا مول قارجى سالدى. بۇل باعىتتاعى جۇمىستارعا تاراپتاردىڭ اراسىندا 2006 جىلعى جەلتوقساندا بەكىتىلگەن ەنەرگەتيكا سالاسىنداعى تۇسىنىك تۋرالى مەموراندۋم كەڭىنەن جول اشتى. قۇجاتتا تابيعي گاز بەن مۇنايدىڭ ءىرى ءوندىرۋشىسى رەتىندە قازاقستاننىڭ ما­ڭىزدى ءرولى اتاپ كورسەتىلگەن.

قازاقستان مەن ەو اراسىنداعى ءتيىم­دى بايلانىستار تۋرالى ءسوز ەتكەندە, جوعا­رى­دا اتالعان ماڭىزدى قۇجاتتارمەن قاتار, ەلباسى نۇرسۇلتان نازارباەۆتىڭ باستاماسىمەن جۇزەگە اسىرىلعان «ەۋرو­پاعا جول» باعدارلاماسىنا سوقپاي وتە المايمىز. ناقتىلاي ايتقاندا, قازاقستان تاراپى قابىلداعان, 2009-2011 جىلدارعا ارنالعان «ەۋروپاعا جول» اتتى باعدارلامانىڭ ءوزارا ىنتى­ماقتاستىقتى جاڭا بەلەسكە كوتەرۋدەگى ءرولى زور بولدى. بۇل قۇجات ەلباسى­نىڭ 2008 جىلعى جولداۋى نەگىزىندە دا­يىن­دالعانى بەلگىلى. اتالعان باعدار­لاما ەۋروپا ەلدەرىمەن ساۋدا اينالىمىن ارتتىرۋ, ەكونوميكانى, كو­لىكتىك قاتىناستاردى نىعايتۋ, قوعام­دى ەۋروپالىق ستاندارتتارعا ساي­كەس­تەندىرۋ, حالىقتىڭ الەۋمەتتىك قور­عا­لۋىن قامتاماسىز ەتۋ سىندى باسقا دا ماڭىزدى ماسەلەلەردى جۇزەگە اسىرۋدى كوزدەدى. ناتيجەسىندە «ەۋروپاعا جول» باعدارلاماسى ەكونوميكانىڭ باسەكەگە قابىلەتتىلىگىن كوتەرۋگە, حالىقتىڭ ءال-اۋ­قاتىن جاقسارتۋعا, ەلىمىزدىڭ تۇراق­تى­لىعى مەن ورنىقتى دامۋىنا مۇمكىن­دىكتەر بەردى.

قازاقستان باستامالارىنا لايىقتى قولداۋ

تاعى ءبىر ەرەكشە توقتالا كەتەر جايت, قازاقستان ەو-نىڭ ورتالىق ازيا (وا) بويىنشا ستراتەگياسى شەڭبەرىندە دە ءتيىمدى قاتىناس ورناتىپ كەلەدى. 2007 جىلى ماۋسىم ايىندا وتكەن ەۋرووداق سامميتىندە قابىلدانعان «ەو جانە ورتالىق ازيا: ارىپتەستىكتىڭ جاڭا ستراتەگياسىندا» قاۋىپسىزدىك, ەكونوميكا, ەنەرگەتيكا, ەكولوگيا, قۇقىق, ءبىلىم مەن ساياسي ۇنقاتىسۋ سالالارى قامتىلعان. وسى ورايدا ەو مۇناي, گاز سالاسى مەن كولىك دالىزدەرىنە (ينوگەيت), (تراسەكا), شاعىن جانە ورتا بيزنەستى دامىتۋعا, ەسىرتكىمەن كۇرەسكە (كاداپ), شەكارانى باسقارۋدى جەتىلدىرۋ­گە (بومكا), ءبىلىم سالاسىن ىلگەرىلەتۋگە قاتىستى اۋقىمدى باعدارلامالاردى قولعا الدى.

نەگىزىندە, ەۋرووداق كۇن تارتىبىندە تۇرعان سىن-قاتەرلەردىڭ الدىن الۋ ماقساتىندا ورتالىق ازيا ەلدەرىمەن ارىپتەستىگىن كەڭەيتكىسى كەلەدى. ال ورت­ا­لىق ازيا تاراپى بولسا ۋاقىت تالابى­نا ساي دامۋ ءۇشىن باتىستىڭ تاجىري­بەلەرىن پايدالانۋدى قۇپ كورەدى.

قازىرگى تاڭدا ەو-نىڭ ورتالىق ازيا بويىنشا قازىرگى ستراتەگياسى ەۋروپالىق وداققا قاتىسۋشى مەملەكەتتەردىڭ ورتاازيالىق بەس رەسپۋبليكاعا قاتىستى باستى ۇستانىمىن كورسەتەدى.

ءبىزدىڭ ەلىمىز ەۋروپالىق وداق ەل­دەرىمەن تەك ەكونوميكا سالاسىندا عانا ەمەس, ساياسات پەن قاۋىپسىزدىك, دەموكراتيا مەن ادام قۇقىقتارى سالاسىندا دا ءوزارا ارىپتەستىك ورناتىپ وتىر. بۇل ورايدا قازاقستان مەن ەو ەۋروپا­داعى قاۋىپ­سىزدىك جانە ىنتىماقتاستىق ۇيى­مى شەڭبەرىندە وڭتايلى جۇمىستار جۇرگىزۋدە.

بيىل قازاقستان مەن ەۋروپالىق وداق اراسىنداعى ورنىقتى قارىم-قاتىناستارعا 25 جىل تولىپ وتىر. وسى ارالىقتا اتالعان وداق ەلىمىزدىڭ حالىقارالىق جانە ايماقتىق باستامالارىنا, بىتىمگەرلىك باعىتىنداعى قادامدارىنا كەڭىنەن قولداۋ بىلدىرۋمەن كەلەدى. بۇل, اسىرەسە ەلىمىزدىڭ ەقىۇ-عا توراعالىققا سايلانۋىندا, ونىڭ ءسام­ميتىن وتكىزۋ بارىسىندا, سونداي-اق 2017-2018 جىلدارعا بۇۇ قك-گە تۇ­­راق­­تى ەمەس مۇشە بولۋىمىزدا, وسى ور­گان­عا بيىلعى قاڭتاردا جەتەك­­شىلىك ەتۋى­­م­ىزدە, ەكسپو-2017 كور­مە­سىن وتكە­رۋ­دە ەۋروپالىق وداق مەم­لەكەت­تەرىنىڭ قازاقستاندى ءوز دەڭگەيىندە قولداعانى ايقىن كورىندى.

قورىتا ايتقاندا, ەلىمىزدە سوڭعى كەزەڭدەردە قابىلدانعان, حالقىمىز ۇلكەن ۇمىتپەن قاراپ وتىرعان اۋقىمدى باعدارلامالاردى وڭتايلى تۇردە جۇزە­گە اسىرۋدا ەۋروپالىق وداق ەلدەرى الەۋە­تىن ءتيىمدى پايدالانۋ ماقساتىنداعى مەملەكەتىمىزدىڭ ساليقالى ساياساتى ءوز جەمىسىن بەرىپ وتىرعانى ءسوزسىز. سون­داي-اق الەمدەگى دامىعان ەلدەر تاجىري­بەسىندە مەملەكەتتىڭ الەۋەتى, ۇلتتىق ەكونوميكالاردىڭ دامۋ كورسەتكىشتەرى تسيفرلى تەحنولوگيالار جۇيەسىن كەڭ اۋقىمدا پايدالانۋ دەڭگەيىمەن اي­قىن­دالاتىنىن ەسكەرە سويلەسەك, «تسيفر­لى قازاقستان» باعدارلاماسىن ەل يگىلى­گىنە اينالدىرۋدى جەدەلدەتۋ ىسىندە دە ەۋروپا مەملەكەتتەرىنەن ۇلگى الۋىمىز ماڭىزدى.

جولدىباي بازار,

«ەگەمەن قازاقستان»