ستانيمير ستويلوۆ, «استانا» كومانداسىنىڭ باس باپكەرى: كابانانگانىڭ ورنىن دەسپوتوۆيچ باسادى

- ەرتەڭگى ويىن ءبىزدىڭ كوماندا ءۇشىن وتە ماڭىزدى بولماق. بىرىككەن اراب امىرلىكتەرىندە وقۋ-جاتتىعۋ جيىندارىن وتكىزىپ, ءبىراز تەر توكتىك. ەندى سول دايىندىعىمىزدى ەرتەڭ كورسەتە الساق بولار ەدى. كەزدەسۋدىڭ ءفاۆوريتى «سپورتينگ» ەكەنى انىق.  دەگەنمەن, قارسىلاستى سىيلاعانىمىزبەن, ودان ەش قورىقپايمىز.

- كوماندادان سردجان گروحوۆاتستىڭ كەتىپ قالعانىن قالاي تۇسىندىرەسىز؟

- ارينە, ونداي فۋتبولشىنى جوعالتۋ وڭاي ەمەس. ءبىزدىڭ كوماندانىڭ ويىنىن جاقسى تۇسىنە بىلەتىن فۋتبولشى ەدى. الايدا, قازاقستاندا وزدەرىڭىز بىلەتىندەي لەگيونەرلەردى شەكتەۋ زاڭى بار. سونىڭ سالدارىنان سردجانمەن قوشتاسۋعا ءماجبۇر بولدىق. ۇجىمعا الاتىن 8 لەگيونەردىڭ ىشىندە وعان ورىن تابىلمادى.

-  كابانانگا كەتكەننەن كەيىن كومانداڭىزدىڭ نەگىزگى شابۋىلشىسى كىم بولادى؟

- ارينە, كابانانگانىڭ كەتكەنى وڭاي تيگەن جوق. ول ەۋرودودالاردا تاجىريبيەسى بار, پايدالى فۋتبولشى ەدى. ەندى ونىڭ ورنىن دجوردجە دەسپوتوۆيچ باسادى. باپكەرلەر شتابى مەن فۋتبولشىلار وعان سەنىم ارتىپ وتىر. ول بولماسا بىزدە ششەتكين مەن مۇرتازاەۆ بار. كەز-كەلگەنى ورتالىق شابۋىلشىنىڭ ءرولىن سومداي الادى.

- مارين توماسوۆ وقۋ-جاتتىعۋ جيىندارىندا جاقسى وينادى. اسىرەسە وڭ قاپتالدى. كەيىننەن ءسىز ونى سول قاپتالعا قويدىڭىز. ناقتى شەشىم قابىلداي الماي ءجۇرسىز بە؟

- پاتريك تۆۋماسي وڭ قاپتالدا جاقسى وينايدى. ەۋروكۋبوكتەردە سولاي بولدى. ءبارىڭىز كوردىڭىزدەر. ەگەر وڭ قاپتالدا پاتريكتىڭ ويىنى جۇرمەي جاتسا, ماتچ بارىسىندا ەكەۋىنىڭ قاپتالىن اۋىستىرىپ كورەمىز. توماسوۆ وڭ قاپتالدا ءتاۋىر وينايدى ەكەن دەپ, ەكى قاپتالىمنان ايىرىلىپ قالاتىن جايىم جوق. پاتريك وڭ جاقتا, توماسوۆ سول جاقتا جۇرەتىن بولادى.

ەركەبۇلان جومارت