قىزىلوردا وبلىسىندا 50-دەن استام ءوندىرىس ىسكە قوسىلسا, ونىڭ 16-سى – ءىرى كاسىپورىن. بۇل تۋرالى حالىققا ەسەپ بەرۋ كەزدەسۋىندە وبلىس اكىمى ق.كوشەرباەۆ مالىمدەدى.
«مەملەكەت باسشىسى ايقىنداپ بەرگەن جانە 2013 جىلدان باستاپ ءبىز الدىمىزعا قويعان باستى مىندەت – بۇل ەكونوميكانى يندۋستريالاندىرۋ ارقىلى ءارتاراپتاندىرۋ بولىپ تابىلادى. ونەركاسىپ ءوندىرىسىنىڭ شامامەن 70 پايىزى مۇناي مەن ۋران ءوندىرۋدىڭ ۇلەسىندە ەكەنىن, بۇل رەتتە, كەيبىر مۇناي ۇڭعىمالارىنان شىققان شيكىزاتتىڭ قازىردىڭ وزىندە 98 پايىزى سۋلانعانىن ەسكەرسەك, ءبىز ءۇشىن بۇل – بىردەن-ءبىر جول»,- دەدى ايماق باسشىسى.
وبلىس 2017 جىلى ءبىر عانا كورسەتكىش بويىنشا, اسىرەسە, مۇناي وندىرۋدە وڭ ۆەكتورعا قول جەتكىزە الماۋىنا سەبەپ بولعان وسى فاكتور - ونەركاسىپ ءوندىرىسىنىڭ كولەمى. ءوڭىردىڭ دامۋ قارقىنىن كورسەتەتىن بارلىق باسقا ماكروكورسەتكىشتەر بويىنشا وڭ ديناميكاعا قول جەتكىزدى.
«سوڭعى بەس جىلدا اتقارعان جۇمىستار ناتيجەسىندە مۇناي مەن ۋران باعاسىنا تاۋەلسىز ايماقتىق ەكونوميكا قۇرا الدىق دەپ تولىعىمەن ايتا الامىز.وسى بەس جىل ىشىندە وبلىسىمىزدا 50-دەن استام ونەركاسىپ نىسان ىسكە قوسىلسا, ونىڭ 16-سى - ءىرى جانە ورتا كاسىپورىن. ناتيجەسىندە, وڭدەۋشى سەكتوردا وسى كەزەڭ ىشىندە وندىرىلگەن ءونىم كولەمى 65 پايىزعا ارتسا, شيكىزاتتىق ەمەس سەكتوردىڭ ەكسپورت كولەمى تەك سوڭعى جىلدىڭ وزىندە 60 پايىزعا ارتتى»,- دەپ اتاپ ءوتتى وبلىس اكىمى.
بۇگىن, 2018 جىلدىڭ 14 اقپان كۇنى, ن. بەكەجانوۆ اتىنداعى وبلىستىق دراما تەاترىندا وبلىس اكىمى ق.كوشەرباەۆتىڭ حالىق الدىندا ەسەپ بەرۋ كەزدەسۋى بولىپ ءوتتى. كەزدەسۋگە قر پرەزيدەنت اكىمشىلىگىنىڭ وكىلى ن.تلەشوۆ,قر پرەمەر-ءمينيسترى كەڭسەسىنىڭ وكىلى-س.قيزات,قر ىشكى ىستەر ءمينيسترى-ق.قاسىموۆ,«نۇر وتان» پارتياسىنىڭ حاتشىسى- ع.ءابدىراحىموۆ, سونداي-اق, جەرگىلىكتى اتقارۋشى ورگانداردىڭ باسشىلارى, 264 ەلدى مەكەننىڭ وكىلدەرى جانە ساياسي پارتيالار مەن قوزعالىستار, ۇكىمەتتىك ەمەس ۇيىمدار, قوعامدىق كەڭەس, سونداي-اق, ەڭبەك ۇجىمدارى مەن بۇقارالىق اقپارات قۇرالدارىنىڭ وكىلدەرى قاتىستى.
ەسەپتى كەزدەسۋدىڭ تىكەلەي ترانسلياتسياسى «Facebook» جانە «Youtube» جەلىلەرىندەگى «قىزىلوردا وبلىسىنىڭ اكىمدىگى» رەسمي پاراقشالارى ارقىلى تاراتىلدى