كەشە پارلامەنت سەناتىنىڭ توراعاسى قايرات ءمامي ەۋروپالىق وداقتىڭ قازاقستانداعى وكىلدىگىنىڭ باسشىسى, ەلشى نوربەر جۋستەندى ونىڭ ديپلوماتيالىق ميسسياسىنىڭ اياقتالۋىنا بايلانىستى قابىلدادى, دەپ حابارلادى پارلامەنت سەناتىنىڭ ءباسپاسوز قىزمەتى.
ق.ءمامي ەۋروپا ديپلوماتىنا تابىستى قىزمەتى ءۇشىن العىس ايتىپ, ونىڭ قازاقستان مەن ەۋروپا ىنتىماقتاستىعىن دامىتۋعا قوسقان ۇلەسىن جوعارى باعالادى.
– «ەۋروپا وداعى قازاقستاننىڭ ماڭىزدى ستراتەگيالىق ءارىپتەسى بولىپ تابىلادى», – دەدى ق.ءمامي جانە ول قازاقستان رەسپۋبليكاسى مەن ەۋروپا وداعى ەكىجاقتى ىنتىماقتاستىقتى ساپالىق تۇرعىدان جاڭا دەڭگەيگە كوتەرۋدىڭ شىنايى مۇمكىندىكتەرىنە يە ەكەنىن اتاپ ءوتتى.
جوعارى دەڭگەيدەگى ۇنقاتىسۋدىڭ دايەكتى تۇردە دامىپ كەلە جاتقانىنا ەكپىن تۇسىرە سويلەگەن توراعا ەۋروپا پارلامەنتىمەن پارلامەنتارالىق بايلانىستاردى ودان ءارى بەلسەندىلەندىرۋ جايىنا دا ايرىقشا توقتالدى جانە الداعى پارلامەنت ءماجىلىسىنىڭ سايلاۋىنا قاتىستى ونىڭ حالىقارالىق ەرەجەلەر مەن ستاندارتتارعا سايكەس وتەتىنىنە سەنىم ءبىلدىردى. «سايلاۋ اشىق, ايقىن جانە دەموكراتيا تۇرعىسىندا وتەتىن بولادى», دەدى وسى ورايدا ق.ءمامي.
توراعانىڭ پىكىرىنشە, كونستيتۋتسيالىق كەپىلدىگى بار كوپپارتيالىق پارلامەنتتىڭ قىزمەتى قازاقستانداعى دەموكراتيالىق جاڭارۋلاردى ودان ءارى ىلگەرىلەتۋدى قامتاماسىز ەتەدى.
ن.جۋستەن ءوز كەزەگىندە قازاقستان مەن ەۋروپالىق وداق اراسىنداعى ءوزارا ءتيىمدى ىنتىماقتاستىقتى ودان ءارى دامىتۋعا زور مۇمكىندىكتەر بار ەكەنىن ايتا كەلىپ: «ءبىزدىڭ ءبىر-بىرىمىزدەن ۇيرەنەرىمىز كوپ», دەدى ءسوزىنىڭ سوڭىندا ول.
قازاقستاندى تاۋەلسىزدىگىنىڭ 20 جىلدىعىمەن قۇتتىقتادى جانە وسىعان بايلانىستى قازاقستاندىقتاردىڭ ءوز جەتىستىكتەرىمەن ماقتانۋعا حاقى بار ەكەندىگىن اتاپ كورسەتتى.