ماڭعىستاۋدىڭ ويى مەن قىرىنداعى اۋا رايى ەكى ءتۇرلى, سەبەبى ايتپاسا دا تۇسىنىكتى. قازىر ويداعى اقتاۋدىڭ تۇرعىندارى قارسىز قىستى باستان كەشىپ جاتسا, قىرداعى حالىق, اسىرەسە مال ۇستاپ, شارۋاشىلىق كۇيتتەگەندەر اقىرعان اياز, قۇرسانعان قار, وكپەك جەل وتىندە – قىستىڭ قىسپاعىندا ءجۇر. بىراق ايتپاعىمىز ول ەمەس...
قىسى قاتتى ساي-وتەس اۋىلىندا قىسى-جازى قۇلپىرىپ تۇراتىن جىلىجاي – اۋىل ماقتانىشى, ايتپەسە وزدەرى «تروپيكالىق دجۋنگلي» دەپ اتاماس ەدى. جىلىجاي اۋىلداعى مەكتەپ جانىنا ورنالاسقان. 2007 جىلى مەكتەپ عيماراتىمەن بىرگە سالىنعان جىلىجاي سان الۋان گ ۇلى قىسى-جازى جايقالىپ تۇراتىن باققا اينالدى.
اياز قىسىپ, قالىڭ قار قىمتاعان قىستا سۋبۇرقاعى اتقىلاپ, ءتۇرلى گۇل قۇلپىرا جايناپ تۇرعان مەكتەپ جىلىجايىنىڭ جانعا ەرەكشە جىلىلىق بەرەتىنى انىق.
تروپيكالىق وسىمدىكتەر مەن جەمىستەردىڭ 74 ءتۇرى ءوسىپ, اسەمدىك پەن ەستەتيكا ۇيلەسىم تاپقان جىلىجايدىڭ تاڭعاجايىپ وسىمدىكتەر الەمىن ءوز كوزىمەن كورۋگە ىقىلاسى اۋعاندار قاتارى كۇن ساناپ ارتىپ كەلەدى. ءار وسىمدىككە كۇتىممەن قاراپ, قالاۋىنا ساي قامقورلىق جاساۋ – مۇعالىمدەر مەن وقۋشىلاردىڭ قىزعىلىقتى جۇمىسى. ويتكەنى مەيىرىمگە بولەنگەن وسىمدىكتەردىڭ جايناي ءوسىپ, جەمىستەردىڭ ءونىمدى كوپ بەرەتىندىگىن بىلەدى. ارقايسىسىنا ەرەكشە كۇتىم مەن قامقورلىق قاجەت.
– جىلىجاي مەكتەپكە, اۋىلعا ءسان بەرىپ قانا قويماي, ۇجىمنىڭ گۇل, وسىمدىك الەمىنە دەگەن قىزىعۋشىلىعىن وياتتى. قازىر مەكتەبىمىزدە «گۇل وسىرۋشىلەر» ۇيىرمەسى جۇمىس ىستەيدى, وعان قاتىسۋعا نيەت ەتكەن وقۋشىلار سانى از ەمەس. جىلىجاي كۇتۋشى مەكتەپ قىزمەتكەرلەرى اسىلبەك قوسبەرگەنوۆ پەن ماحامبەت جاعالباەۆتىڭ ەڭبەكتەرى زور. كوپشىلىكتى ءتانتى ەتكەن ءتاتتى بۇرىشتار مەن قيارلاردى تاماشالاۋ ءۇشىن وقۋشىلار كەلەدى. جانعا ءلاززات سىيلار حوش ءيىس, جىلى لەپ, تازا اۋا, كوز تارتار گۇلدەر مەن باعالى اعاشتار جىلدىڭ ءتورت مەزگىلىندە جايقالىپ تۇرادى. باستىسى, ەسەلى ەڭبەك جەمىسىن بەرۋدە, – دەيدى مەكتەپ ديرەكتورى ا.نازاروۆا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى