قاراعاندىداعى «اقجولتاي» سپورت سارايىندا وبلىستىق قىسقى «قارلى قىس-2018» اۋىلدىق سپارتاكياداسى مەن قالالار مەن اۋداندار اراسىنداعى «اق قىس-2018» سپارتاكياداسى باستالدى.
اتالعان سپورتتىق شارا وڭتۇستىك كورەيادا الاۋى جاعىلعان اق وليمپياداعا ارنالدى. ەسكە سالساق, پحەنچحانداعى ويىندارعا قاراعاندى وبلىسىنان ءۇش سپورتشى قاتىسادى. ولار كونكي كيگەن جۇيرىكتەر ەكاتەرينا ايدوۆا, ستانيسلاۆ پالكين جانە ارتيوم كريكۋنوۆ.
سپارتاكيادانىڭ اشىلۋ سالتاناتىندا مۇز ۇستىندە جۇزگە جۋىق ادام قاتىسقان فلەشموب كورەرمەندى ءتانتى ەتتى. شاراعا قاتىسۋشىلار وسىنداي قويىلىممەن قىسقى وليمپيا ويىندارىندا ەل نامىسىن قورعايتىن جەرلەستەرىنە قولداۋ ءبىلدىرىپ, جىگەر بەرەمىز دەگەندى ايتتى.
ارقاداعى اق سپارتاكيادا دوداسىنا قىسقى سپورت تۇرلەرى بويىنشا 600-دەن استام ادام قاتىسۋدا. ايتا كەتۋ كەرەك, بۇلاردىڭ ءبارى دە كاسىپقوي سپورتشىلار ەمەس. جارىستار سپورتتىڭ ءتورت ءتۇرى بويىنشا وتەدى: قىسقى پرەزيدەنتتىك كوپسايىس, شاڭعىمەن جۇگىرۋ, دوپتى حوككەي جانە كونكيمەن جۇگىرۋ. قىسقى سپارتاكيادا قورىتىندىسىندا ۇزدىك سپورتتىق قالا مەن اۋىل انىقتالادى.
قايرات ءابىلدا,
«ەگەمەن قازاقستان»
قاراعاندى