ءار سەنبى مەن جەكسەنبى سايىن جايىق وزەنىنىڭ ۇستىندە سان ءتۇرلى سايىستار ۇيىمداستىرىلادى. قالالىق سپورتتىق ويىندار فەستيۆالى, شانامەن سىرعاناۋدان وبلىستىق چەمپيونات, بالالار اراسىندا كونكي مەن شاڭعى تەبۋدەن جارىس سىندى شارالارعا قاتىسۋشىلاردىڭ سانى دا كوپ. بۇقارالىق سپورتتى دامىتىپ, حالىقتىڭ دەمالۋىنا جايلى جاعداي جاساۋ ماقساتىندا مۇز ۇستىندە ارنايى ورىندار جاسالدى.
«بەيبارىس» حوككەي كومانداسى دا بۇل باستامادان تىس قالماي, جاس جانكۇيەرلەرىنە شەبەرلىك ساعاتىن وتكىزدى. وعان 400-گە جۋىق قالا تۇرعىنى قاتىستى. كوماندا تۇگەل قۇرامدا بالالاردى حوككەي ويىنىنىڭ قىر-سىرىمەن تانىستىردى.
– ءبىزدىڭ ماقسات – حوككەيدى دامىتۋ. جاستاردى سپورتپەن شۇعىلدانۋعا باۋلىپ, ۇلگى كورسەتۋ. بارلىق قۇراممەن بۇگىن شەبەرلىك ساعاتىن وتكىزدىك. وتە قۋانىشتىمىز,–دەيدى كوماندانىڭ باس جاتتىقتىرۋشىسى الەكساندر يستومين.
شايبالى حوككەيدەن ەلىمىزدىڭ چەمپيونى اتانىپ جۇرگەن «بەيبارىستىڭ» بالالارعا ارنالعان مەكتەبى دە بار. وندا جەرگىلىكتى جاس حوككەيشىلەردى دايىنداۋعا دەن قويىلىپ وتىر.
باقىتگۇل باباش, «ەگەمەن قازاقستان»
اتىراۋ