فۋتزالدان قازاقستان قۇراماسى ەۋروپا چەمپيوناتىنىڭ جارتىلاي فينالىندا يسپانيادان جەڭىلىپ قالدى. دەي تۇرعانمەن جانكۇيەر قاۋىم ناعىز تارتىستى باسەكەنىڭ كۋاسى بولعانى انىق. ويىننىڭ نەگىزگى ۋاقىتى 5:5 ەسەبىمەن اياقتالعانمەن, پەنالتي سەرياسىندا 3:1 ەسەبىمەن يسپانيالىقتار باسىم بولدى.
وتانداستارىمىز كەزدەسۋدىڭ 8-مينۋتىندا العا شىقتى. بۇل گولدى دۋگلاس جۋنيوردىڭ پاسىنان كەيىن تاينان ءوز ەنشىسىنە جازدى. بىراق ۇزىلىسكە دەيىن يسپاندار تارازى باسىن تەڭەستىرىپ قانا قويماي, ەسەپتە العا شىقتى. 16-مينۋتتا شىڭعىس ەسامانوۆ بۇرىشتامادان كەلگەن دوپقا اياعىن ىڭعايسىز قويىپ, ءوز قاقپاسىنا سوعىپ السا, 19-مينۋتتا مارك تولرا ءوز قۇراماسىن العا شىعاردى.
ال ەكىنشى تايمدى كاكاۋ شاكىرتتەرى جاڭا قارقىنمەن باستادى. بومباردير قاقپاشىمىز يگيتا 25-مينۋتتا دۋگلاس جۋنيوردىڭ پاسىنان كەيىن جويقىن سوققىسىمەن قارسى قاقپانى ءدال كوزدەپ, 2:2-گە جەتكىزدى. اراعا 45 سەكۋند سالىپ پاۆەل تاكۋ قۇرامامىزدىڭ ءۇشىنشى دوبىن سالدى. بۇل جولعى ناتيجەلى پاستىڭ اۆتورى دا - دۋگلاس جۋنيور.
پيرەنەي تۇبەگىنەن كەلگەن قۇراما قول قۋسىرىپ قاراپ وتىرمادى. وسىدان كەيىن وتكىر شابۋىلدارىن ءبىرىنىڭ ارتىنان ءبىرىن ۇيىمداستىردى. ناتيجەسىندە 28-مينۋتتا حوسەليتو ەسەپتى تەڭەستىرسە, ءتورت مينۋتتان كەيىن پولا تابلوداعى كورسەتكىشتى 4:3-گە جەتكىزىپ, يسپانيانى العا شىعاردى. ال 39-مينۋتتا دۋگلاس جۋنيوردىڭ ءوزى ەسەپتى تەڭەستىردى.
مۇنان كەيىن قوس كوماندا اراسىنداعى تارتىس وۆەرتايمعا ۇلاستى. العاشقى ەكسترا-تايمدا ميگەلينانىڭ پەنالتيدەن سوعاتىن ءساتى بولعان. الايدا مۇمكىندىگىن جىبەرىپ الدى. بىراق 43-مينۋتتا وسى قاتەلىگىن جۋىپ-شايىپ, يسپانيانىڭ بەسىنشى دوبىن سالدى. الىسپاي بەرىسپەيتىن قازاقستان قۇراماسى 48-مينۋتتا ەسەپتى 5:5-كە جەتكىزدى. گولدىڭ اۆتورى - سەرىك جامانقۇلوۆ.
ال پەنالتي سەرياسىندا يسپانيانىڭ جولى بولدى. العاش بولىپ نۇكتەگە كەلگەن قۇرامامىزدىڭ ويىنشىسى تاينان ءمۇلت كەتتى. قورىتىندى ەسەپ 1:3.
جارتىلاي فينالدىڭ ەكىنشى جۇبىندا پورتۋگاليا 3:2 ەسەبىمەن رەسەيدەن باسىم ءتۇستى. ەندى 3-ورىن ءۇشىن وتەتىن ويىندا قازاقستان 10 اقپان كۇنى 23:00-دە (استانا ۋاقىتى بويىنشا) رەسەيمەن سىنعا تۇسسە, چەمپيوندىق اتاقتى يسپانيا مەن پورتۋگاليا ءوزارا ساراپقا سالادى. فينالدىق ويىن 11 اقپان كۇنى 02:00-دە (استانا ۋاقىتى بويىنشا) وتەدى.
ايتا كەتەيىك, سوڭعى رەت 2016 جىلى وتكەن ەۋروپا چەمپيوناتىندا قازاقستان قۇراماسى قولا جۇلدەگەر اتانعان.