2021 جىلعا دەيىن تابيعي مونوپوليالار سۋبەكتىلەرى جاڭعىرتۋ جۇمىستارىنا 2 ترلن تەڭگەدەن استام قارجى بولىنەدى. بۇل تۋرالى ۇلتتىق ەكونوميكا ۆيتسە-ءمينيسترى سەرىك جۇمانعارين ماجىلىستەگى «تابيعي مونوپوليالار تۋرالى» زاڭ جوباسىن تانىستىرۋ بارىسىندا ايتتى.
«مينيسترلىك 2015 جىلدان باستاپ ينۆەستيتسياعا تارتۋعا قاتىستى اۋقىمدى جۇمىستاردى جۇرگىزىپ جاتىر. تابيعي مونوپوليالاردىڭ بارلىق سۋبەكتىلەرى بەس جانە ودان ارتىق مەرزىمدەگى شەكتى تاريفتەرگە كوشىرىلدى. بۇل حالىق پەن زاڭدى تۇلعالار ءۇشىن تاريفتەردىڭ اشىقتىعىن قامتاماسىز ەتۋگە مۇمكىندىك بەردى. 2021 جىلعا دەيىن بەس جىلعا بولجانىپ وتىرعان ينۆەستيتسيالاردىڭ جالپى سوماسى 2 ترلن تەڭگەدەن اسادى», - دەپ مالىمدەدى سەرىك جۇمانعارين.
اتاپ ايتقاندا, ەلەكتر ەنەرگياسىن تاراتۋ سالاسىنداعى ينۆەستيتسيالار 500 ملرد تەڭگەدەن اسادى, سۋمەن قامتاماسىز ەتۋگە - 100 ملرد تەڭگەدەن استام, جىلىمەن قامتاماسىز ەتۋگە - 200 ملرد تەڭگە, گازدى تاسىمالداۋعا - 500 ملرد تەڭگە, تەمىرجول سالاسىنا 600 ملرد تەڭگە قاراستىرىلعان.