ەرتەڭ وڭتۇستىك كورەيانىڭ پحەنچحان قالاسىندا ءXXIIى قىسقى وليمپيا ويىندارى سالتاناتتى جاعدايدا اشىلادى. بۇل وڭتۇستىك كورەيادا وتەتىن العاشقى, ازيا قۇرلىعىندا ساپپورو (1972) مەن ناگانودان (1998) كەيىنگى ءۇشىنشى اق وليمپيا ويىندارى بولماق.
دەرەك ءۇشىن ايتا كەتسەك, قىسقى وليمپياداعا قاتىساتىن قۇرامالار اراسىندا سپورتشىلار سانى بويىنشا اقش الدا تۇر. بۇل ەلدەن سپورتتىڭ بارلىق ءتۇرى بويىنشا 242 سپورتشى قاتىسادى. كانادا – ەكىنشى ورىندا. ۇيەڭكى جاپىراقتى ەلدەن پحەنچحانداعى دوداعا 226 سپورتشى قاتىسادى. ال وليمپيا ويىندارىنا العاش رەت قاتىسايىن دەپ جاتقان التى مەملەكەت بار. ولار: ەكۆادور, ەريترەيا, كوسوۆو, مالايزيا, نيگەريا جانە سينگاپۋر.
وليمپيادا باسەكەلەرى ەكى كلاستەردە, ياعني پحەنچحان تاۋ كلاستەرى مەن كاننىن جاعالاۋ كلاستەرىندە ورنالاسقان 12 سپورت كەشەنىندە وتەدى. بيىلعى اق قار, كوك مۇز ۇستىندەگى الاماندا الەمنىڭ 92 ەلىنەن 2925 قىسقى سپورتتىڭ نەبىر حاس شەبەرلەرى باق سىنايدى. مامانداردىڭ ايتۋىنشا, بيىل وليمپيا ويىندارىنا قاتىسۋشىلاردىڭ سانى رەكوردتىق كورسەتكىشكە جەتكەن.
ءار ءتورت جىل سايىن وتەتىن بايراقتى باسەكەگە قازاقستان قۇراماسى ساپىنان 46 سپورتشى قاتىساتىنىن, ولار سپورتتىڭ توعىز تۇرىنەن جالپى سانى 57 جولداما العانىن گازەتىمىزدىڭ وتكەن ساندارىندا كەڭىنەن جازعان بولاتىنبىز.
ەلىمىزدىڭ شورت-ترەك قۇراما كومانداسى وليمپيادا اۋىلىنا ءتورت كۇن بۇرىن ورنالاسىپ, ەلدىڭ كليمات جاعدايىنا بەيىمدەلىپ قالعان. شورت-ترەكشىلەر وليمپياداعا دەيىن جاپونيادا دايىندالىپ, پحەنچحانعا سول ەلدەن بارعان. ولار ءتورتىنشى اقپاننان بەرى كاننىننىڭ نەگىزگى جانە قوسىمشا مۇز ايدىندارىندا نيدەرلاند سپورتشىلارىمەن بىرگە جاتتىعىپ جاتىر. ەستەرىڭىزگە سالا كەتەيىك, قازاقستاندىق شورت-ترەكشىلەر نەگىزى ءاۋ باستا ون ليتسەنزيانى جەڭىپ العان. كەيىنىرەك وعان تاعى ەكى كۆوتا قوسىلدى. ويتكەنى شۆەتسيا ۇلتتىق وليمپيادالىق كوميتەتى 1500 مەتر قاشىقتىقتاعى ليتسەنزياسىنان باس تارتقاندىعىن مالىمدەدى. سونداي-اق حالىقارالىق وليمپيادا كوميتەتى رەسەيلىك شورت-ترەكشىلەردى پحەنچحان ويىندارىنان شەتتەتىپ تاستاعان. ءسويتىپ قازاقستان قۇراماسىنىڭ قورجىنىنا تاعى ەكى جولداما تۇسكەن-ءدى.
وليمپيا ويىندارىنىڭ اشىلۋ سالتاناتىندا ەلىمىزدىڭ كوك تۋىن ۇستاپ شىعاتىن ابزال اجعاليەۆ وليمپيادا الدىندا ازداپ قوبالجۋ بار ەكەنىن ايتادى. سەبەبى تۋدى ۇستاپ شىعۋمەن قاتار, ەلگە كوك تۋدى بيىككە كوتەرىپ, مەدالمەن ورالۋ مىندەتى جۇكتەلگەنىن دە سەزىنەدى. «ازداپ قوبالجۋ بار ەكەنىن جاسىرمايمىن. بايراقتى ۇستاپ شىعۋمەن قاتار, ونىڭ جاۋاپكەرشىلىگى دەگەن بار. بارلىق قازاقستاندىق جانكۇيەرلەر بىزگە ءۇمىت ارتىپ, مەدال كۇتىپ وتىر. وسى جارىسقا تىڭعىلىقتى دايىندالىپ, وليمپيادا بارىسىندا جوعارى جەتىستىكتەرگە جەتەمىن دەپ ويلايمىن», دەپ اعىنان جارىلدى ابزال اجعاليەۆ.
شەتەلدىك «Gracenote» ستاتيستيكالىق اگەنتتىگى پحەن-چحاندا باستالاتىن ءححىىى قىسقى وليمپيا ويىندارىندا وڭتۇستىك كورەيا جەرىندە گەرمانيا قۇراماسى جالپىكوماندالىق ەسەپتە ءبىرىنشى ورىن الادى دەپ بولجاۋدا. اگەنتتىك ساراپشىلارى نەمىس سپورتشىلارى 15 التىن, 10 كۇمىس, 14 قولا مەدال ەنشىلەيدى دەپ توپشىلاپ وتىر. ەكىنشى ورىنعا نورۆەگيا سپورتشىلارىن قويعان. سكانديناۆيا تۇبەگىنىڭ وكىلدەرى 13 التىن, 14 كۇمىس, 13 قولا مەدال جەڭىپ الۋعا قاۋقارلى ەكەن. ۇزدىك ۇشتىكتى اقش قۇراماسى (11 التىن, 6 كۇمىس, 12 قولا) تۇيىندەيدى دەپ بولجانىپ وتىر.
قورىتا ايتار بولساق, الداعى الاماننان ەلىمىزدىڭ سپورتشىلارى ناقتى قانشا مەدال الاتىنىن ءبىز دە, ءسىز دە تاپ باسىپ بولجاي قويماسپىز, بىراق سپورتشىلارىمىزدىڭ دايىندىعى وتە جوعارى دەڭگەيدە ەكەنىنە كوزىمىز جەتىپ وتىر. قازاقتا بالاسى اتقا مىنسە, اناسى ۇيدە وتىرىپ تاقىم قىسادى دەيدى عوي. بايراقتى باسەكەدە سىنعا تۇسەتىن سايىپقىران ساڭلاقتارىمىزعا ساتتىلىك تىلەپ, ەلگە مەدالمەن ابىرويلى ورالۋىن تىلەيمىز.
ءالي بيتورە,
«ەگەمەن قازاقستان»