اقىن قاسىم امانجولوۆتىڭ 100 جىلدىعى الماتىدا قورىتىندىلاندى
«دۇنيەگە كەلەر ءالى تالاي قاسىم» دەگەن اتپەن بيىل استاناداعى پرەزيدەنتتىك مادەني ورتالىعىنان باستاۋ الىپ, ەلىمىزدىڭ ءار شالعايىندا اتاپ ءوتىلگەن قاسىم امانجولوۆتىڭ عاسىرلىق مەرەيتويى وسى اپتادا ارۋ قالامىز الماتىدا قورىتىندىلاندى.
اقىننىڭ ءوزى جىرلاعان, تىرشىلىك تەپەرىشىن كورسە دە تاستاماعان الماتىسىنداعى جىر كەشى بەكزات ونەر ورداسى – اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا ءوتتى. وڭتۇستىك استانا زيالىلارىن ءبىر جەردە توعىستىرعان كەشتە جازۋشىلار وداعىنىڭ توراعاسى نۇرلان ورازالين ءسوز الىپ, قالام ۇستاعان قاۋىمنىڭ جاقسى ءسوزىن جەتكىزدى.
– قاسىم ابايدىڭ اسقاق تۇلعاسىن, ماحامبەتتىڭ ءورشىل رۋحىن بويىنا بىردەي ءسىڭىرىپ العانداي ەلەستەيدى. «بەرسەڭ بەر, بەرمەسەڭ قوي باسپاناڭدى, سوندا دا تاستامايمىن استانامدى», دەپ رۋحىن الاسارتپاي, اسقاق ۇستاعان اقىن نەبارى 44 جىل عۇمىر كەشتى. الايدا, اقىنعا كەلتە عۇمىر 7-8 پوەماسى مەن الۋان تاقىرىپتاعى ليريكادان قۇرالعان ادەبي مول مۇرا سىيلادى. ول ءان بولىپ ءورىلدى, كۇي بولىپ توگىلدى, – دەدى ول.
بۇل جولى الماتى قالاسى اكىمدىگى ۇيىتقى بولعان كەشتە ونەر شەبەرلەرىنىڭ ورىنداۋىندا اقىننىڭ ولەڭدەرىنە جازىلعان «اق ساۋلە», «جاس ءداۋرەن», «ءوزىم تۋرالى» اندەرى ورىندالدى. اقىننىڭ ءومىرى مەن شىعارماشىلىعىنىڭ ءتۇرلى كەزەڭدەرىنە ارنالعان تەاترلاندىرىلعان شاعىن قويىلىمدار كورسەتىلدى. اقىن تۋرالى ەستەلىكتەر ايتىلىپ, ول تۋرالى جاڭا دەرەكتى فيلمنەن ۇزiندiلەر كورسەتiلدi.
قورىتا ايتقاندا, قاسىم امانجولوۆتىڭ شىعارماشىلىعى ارقاشان جىرسۇيەر قاۋىمنىڭ جادىندا ساقتالا بەرمەك, جاتتالا بەرمەك. مۇنىڭ ءبىر دالەلى – ۇستىمىزدەگى جىلى اقىننىڭ ءتورت كiتابى جارىق كوردى. ونىڭ ءومىرى مەن شىعارماشىلىعى تۋرالى بىرنەشە دەرەكتى فيلمدەر ءتۇسىرىلدى.
ايناش ەسالي,
الماتى.