اقتاۋدا «Sabanci University» جانە «Compass Education» اگەنتتىگىنىڭ ۇيىمداستىرۋىمەن حالىقارالىق وليمپيادا جەڭىمپازدارى انىقتالىپ, وقۋ گرانتى جانە ارنايى ستيپەنديالار تاعايىندالدى.
11 سىنىپ وقۋشىلارى اراسىندا وتكەن وليمپياداعا بارلىعى 214 وقۋشى قاتىسىپ, ونىڭ 56-سى قورىتىندى تۋردان سۇرىنبەي وتكەن. ناتيجەسىندە, تۇركيانىڭ «Sabanci» ۋنيۆەرسيتەتىندە ماڭعىستاۋلىق 15 وقۋشى ءبىلىم الاتىن بولدى. ونىڭ 6-ى 25%, تاعى 6 وقۋشىعا 50% جانە 2 وقۋشى 75% جەڭىلدىك بەرىلىپ وتىر. ال 100% جەڭىلدىك, ياعني تەگىن گرانتتى اقتاۋ قالاسىنداعى مامانداندىرىلعان ەكونوميكالىق ليتسەيىنىڭ 11-ءشى سىنىپ وقۋشىسى اقمارال امانتۇرديەۆا ۇتىپ الدى. ول ەندى 4 جىل بويى تۇركيانىڭ استاناسى ستامبۇل قالاسىنداعى «Sabanci University» تەگىن ءبىلىم الاتىن بولادى.
-مەن اعىلشىن ءتىلىن تەرەڭىرەك وقۋدى 10-شى سىنىپتا باستادىم. ەڭ الدىمەن «Compass Education» ورتالىعىندا اعىلشىن ءتىلى كۋرسىنا قاتىستىم. بوس ۋاقىتىمدى ءتيىمدى وتكىزۋ ءۇشىن قولىمنان كىتاپ تۇسپەدى. شەتەلدە ءبىلىم الۋ مۇمكىندىگى تۋرالى مەكتەپتە مۇعالىمدەردەن ەستىگەن ەدىم. سول كۇننەن باستاپ ءتىل ۇيرەنۋگە بەل بۋدىم. ال وليمپيادا كەزىندە ەكى تۋردان ءوتتىم. ءبىرىنشىسى – تەست. ال ەكىنشىسى - سۇقبات. ينجەنەر ماماندىعىن تاڭدادىم. قۋانىشىمدا شەك جوق. ءوز-وزىمە سەنە الار ەمەسپىن, دەيدى ول.
شاراعا ماڭعىستاۋ وبلىسىنىڭ كاسىپكەرلەر پالاتاسىنىڭ وكىلدەرى, وبلىستىق ءبىلىم باسقارماسىنىڭ ورىنباسارى گۇلميرا ماماەۆا, اتا-انالار جانە مۇعالىمدەر قاتىستى. سونىمەن قاتار, شاراعا ارنايى تۇركيانىڭ «Sabanci University» ايماقتىق ديرەكتورى ەبرۋ كوچ كەلىپ, وقۋ گرانتىن جانە ستيپەنديالاردى ءوز قولىمەن وقۋشىلارعا تابىس ەتتى.
«Compass Education» شەتەلدە ءبىلىم بەرۋ اگەنتتىگىنىڭ ديرەكتورى ايجان قۇلجاباەۆانىڭ ايتۋىنشا, تۇركيانىڭ «Sabanci» ۋنيۆەرسيتەتىمەن ءوزارا ىنتىماقتاستىق ورناعان. ەندى «Compass Education» الداعى 3 جىل بويى ماڭعىستاۋلىق وقۋشىلاردىڭ شەتەلدە ءبىلىم الۋىنا قول ۇشىن سوزۋعا دايىن.
-ءبىز اقتاۋدا ءوز جۇمىسىمىزدى وتكەن جىلى قىركۇيەك ايىندا باستادىق. جوعارى سىنىپ وقۋشىلارىن شەتەلدە ءبىلىم الۋىنا ىقپال ەتۋگە دايىنبىز. قىسقا مەرزىمدى كۋرستان وتەمىن دەۋشىلەرگە دە قولداۋ كورسەتىلەدى. ءبىز تەك تۇركيا عانا ەمەس, الەمنىڭ كوپتەگەن بەلدى وقۋ ورىندارىمەن قويان-قولتىق جۇمىس جاسايمىز. سوندىقتان دا, بيىل 10-شى سىنىپتا وقىپ جاتقان وقۋشىلاردىڭ قۇلاعىنا التىن سىرعا. 11 سىنىپتى اياقتايمىن دەگەنشە, اعىلشىن ءتىلىن بارىنشا تەرەڭىرەك مەڭگەرىپ, كەلەسى جىلى وسىنداي وليمپياداعا قاتىسىپ, گرانت نەمەسە ستيپەنديا جەڭىپ الۋعا مۇمكىندىك بەرىلەتىنىن قاپەرىڭىزگە بەرەمىز, دەيدى ول.
«Compass Education» شەتەلدە ءبىلىم بەرۋ اگەنتتىگى وقۋشىلارعا تەك جولداما بەرىپ قانا قويماي, العاشقى ءبىرىنشى كۋرستى اياقتاعانشا ستۋدەنتپەن تىعىز بايلانىس ورناتىپ وتىرادى. سەبەبى بۇل ستۋدەنت ءۇشىن بەيىمدەلۋ كەزەڭى. سول كەزەڭنەن سۇرىنبەي وتكەن سوڭ, قالعان وقۋ جىلدارىندا ستۋدەنت ءوزىن-ءوزى الىپ كەتۋى ءتيىس. بولاشاق ستۋدەنتتىڭ قاجەتتى قۇجاتتارىن جيناقتاۋدى ءوز مىندەتىنە الادى. ۆيزا راسىمدەپ, وقۋشىلارعا ءبىلىم الاتىن وقۋ ورنى, سول مەملەكەت تۋرالى تولىققاندى اقپارات الۋ ءۇشىن الدىن-الا ارنايى ترەنينگ ۇيىمداستىرادى. ساباق باستالعان بويى ستۋدەنتتىڭ ساباعىن, ءتارتىبىن, تۇرمىستىق جاعدايىن قاداعالايدى. سونداي-اق, اتا-انالاردى دا بۇل ۇردىستەن تىس قالدىرمايدى.
گۇلايىم شىنتەمىرقىزى, «ەگەمەن قازاقستان»