قازاقستان پرەزيدەنتى, «نۇر وتان» حدپ توراعاسى نۇرسۇلتان نازارباەۆ ءتورتىنشى شاقىرىلعان پارلامەنت ءماجىلىسىن تاراتۋ جانە ءماجىلىس دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى. سايلاۋ 2012 جىلدىڭ 15 قاڭتارىنا بەلگىلەندى.
«نۇر وتان» پارتياسى ەلىمىزدەگى جەتەكشى ساياسي قۇرىلىم رەتىندە ايتۋلى وقيعاعا بىردەن نازار اۋدارىپ, الداعى پارلامەنت جانە ءماسليحات سايلاۋلارىنا تولىقتاي دايىن ەكەندىكتەرىن ءمالىم ەتتى.
ارنايى ءباسپاسوز ءماسليحاتىندا پارتيا توراعاسىنىڭ ءبىرىنشى ورىنباسارى نۇرلان نىعماتۋلين: «وسىعان بايلانىستى, بۇگىن ءبىزدىڭ پارتيامىزدا رەسپۋبليكالىق قوعامدىق شتاب قۇرىلدى. بۇل شتاب قۇرامىنا ەلىمىزگە تانىمال ازاماتتار, بەلگىلى ساياساتكەرلەر, قوعامدىق ۇيىم وكىلدەرى كىردى. ەندى ءبىز پارتيامىزدىڭ سايلاۋ باعدارلاماسى بويىنشا ناسيحات جۇمىستارىن ءجۇرگىزۋمەن قاتار, سەنىمدى وكىلدەردىڭ مىندەتتەرىنە دە ەرەكشە نازار اۋدارامىز. ال, ءبىزدىڭ ەڭ باستى ماقساتىمىز – ءماجىلىس پەن بارلىق دەڭگەيدەگى ءماسليحات سايلاۋىندا «نۇر وتان» پارتياسىنىڭ ۇلكەن, ءادىل جانە تازا جەڭىسىن قامتاماسىز ەتۋ. سول ءۇشىن رەسپۋبليكامىزدىڭ بارلىق ايماقتارىندا, قالا مەن اۋداندارىندا وسىنداي شتابتار اشىلاتىن بولادى», – دەپ اتاپ ءوتتى.
شتابتى پارتيا توراعاسىنىڭ ءبىرىنشى ورىنباسارى نۇرلان نىعماتۋلين باسقارادى. «نۇر وتان» پارتياسى بارلىعى 16 ايماقتىق, 210 قالالىق جانە اۋداندىق سايلاۋالدى شتابتارىن قۇراتىن بولادى. سايلاۋ كومپانياسىنىڭ ناقتى جوسپارىن جاساۋ جانە زاڭ تالاپتارىنا ساي بولۋىن باقىلاۋ جۇمىستارىمەن رەسپۋبليكالىق شتاب اينالىسادى.
ءباسپاسوز ءماسليحاتىنا قاتىسقان قازاقستان جازۋشىلار وداعى باسقارماسىنىڭ توراعاسى, «نۇر وتان» پارتياسىنىڭ الماتى قالالىق فيليالى ساياسي كەڭەسىنىڭ ءمۇشەسى نۇرلان ورازالين: «نۇر وتان» پارتياسىن ءبىز مادەنيەت پەن ونەر سالاسىنىڭ جاناشىرى دەپ بىلەمىز. وسى سالاعا قولداۋ كورسەتۋ ءۇشىن پارتيامىز قىرۋار جۇمىستار اتقارىپ جاتىر. سوندىقتان دا ءبىز, ونەر ادامدارى, ەلباسىمىز باسقارىپ وتىرعان «نۇر وتان» پارتياسىن ارقاشاندا قولداۋعا ءازىرمىز. الداعى ءماجىلىس سايلاۋىندا دا وسى پارتيا جەڭىسكە جەتەدى دەگەن سەنىمدەمىز», – دەدى. ال «ساۋاپ» رەسپۋبليكالىق قوعامدىق قورىنىڭ پرەزيدەنتى, جازۋشى باقىتبەك سماعۇل اۋعان سوعىسى ارداگەرلەرىنىڭ ارقاشان ەلباسىنىڭ پارتياسىن قولدايتىنىن, «نۇر وتان» پارتياسىنىڭ الەۋمەتتىك سالاعا كوپ كوڭىل ءبولىپ, ازاماتتارىمىزدىڭ ءال-اۋقاتىنىڭ ارتۋىن قامتاماسىز ەتۋ, تاتۋلىق پەن تۇراقتىلىقتى ساقتاۋ, ەڭ باستىسى, بارشا قازاقستاندىقتاردىڭ قاۋىپسىزدىگىن قامتاماسىز ەتۋ ءۇشىن اۋقىمدى جۇمىستار اتقارىپ كەلە جاتقانىن ءسوز ەتتى. باسقالار دا وسى تۇرعىدا ءسوز ساپتادى.
سونداي-اق, ءباسپاسوز ءماسليحاتىندا نۇرلان نىعماتۋلين ەلباسى, پارتيا توراعاسى نۇرسۇلتان نازارباەۆتىڭ 2011 جىلعى 25 قاراشادا استانادا پارتيانىڭ XIV سەزىن شاقىرۋ تۋرالى قاۋلىعا قول قويعانىن حاباردار ەتتى. وندا سايلاۋالدى باعدارلاما تالقىلانىپ, ۇمىتكەرلەردىڭ پارتيالىق ءتىزىمى بەكىتىلەتىن بولادى.
قورىتا ايتقاندا, «نۇر وتان» سايلاۋ ۇدەرىسىنە تولىقتاي دايىن.
«ەگەمەن-اقپارات».