قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ گەرمانيا فەدەراتيۆتىك رەسپۋبليكاسى سىرتقى ىستەر مينيسترلىگىنىڭ مەملەكەتتىك ءمينيسترى كورنەليا پيپەر حانىمدى قابىلدادى.
2009 جىلعى تابىستى وتكەن قازاقستاننىڭ گەرمانياداعى جىلى جانە بيىلعى گەرمانيانىڭ باستالعالى تۇرعان قازاقستانداعى جىلى كەزدەسۋدىڭ ورتاق تاقىرىبى بولدى. كورنەليا پيپەر گەرمانيانىڭ قازاقستانداعى جىلىن اشۋعا ارنايى كەلگەن. بۇل سالتاناتتى شارا استانا قالاسىندا وتەدى.
ءماجىلىس توراعاسى گەرمانيا قازاقستانمەن ساۋدا-ەكونوميكالىق ارىپتەس ەلدەردىڭ ىشىندە باستاپقى وندىققا ەنەتىنىن اتاپ ءوتتى. قوس مەملەكەتتىڭ ىنتىماقتاستىق, ساياسي-ەكونوميكالىق بايلانىسى ارتا تۇسۋىنە وتكەن جىلعى 3 اقپاندا قازاقستان پرەزيدەنتى نۇرسۇلتان نازارباەۆتىڭ گەرمانياعا جاساعان رەسمي ساپارى, مەملەكەت باسشىلارىنىڭ جوعارى دەڭگەيدە وتكەن كەزدەسۋلەرى نەگىز بولدى.
“وتكەن جىلى گەرمانيادا كوپتەگەن مادەني-گۋمانيتارلىق ءىس-شارالار ءوتتى. بيىل دا گەرمانيانىڭ قازاقستانداعى جىلى اياسىندا ءبىلىم, عىلىم, ونەر مەن مادەنيەت سالالارىندا بايلانىستار ءورىس الاتىن بولادى. ەڭ باستىسى, ەكى مەملەكەت اراسىندا سەنىمدى ارىپتەستىك قالىپتاستى”, – دەدى ورال مۇحامەدجانوۆ.
تاراپتار ەكى ەل اراسىنداعى بايلانىستى بارلىق سالادا جانە ءار دەڭگەيدە جان-جاقتى دامىتۋدىڭ ماڭىزدىلىعى وتە زور ەكەنىن ايتتى.
كورنەليا پيپەر ەكى ەلدىڭ اراسىن جالعاستىرۋدا پارلامەنتتىڭ ۇلكەن ءرول اتقاراتىنىن, ءوزى دە قازىرگى قىزمەتىنە كىرىسكەنگە دەيىن 11 جىل بويى بۋندەستاگ دەپۋتاتى بولعانىن ايتىپ ءوتتى. سونداي-اق قازاقستان گرەمانيانىڭ ورتالىق ازياداعى سەنىمدى ارىپتەسى ەكەنىن, ەكى ەلدىڭ ىنتىماعى جاراسىم تابا بەرۋىنە تىلەكتەستىگىن ءبىلدىردى.
ءماجىلىس توراعاسى قازاقستاندا كوپتەگەن نەمىس دياسپوراسى تۇراتىنىن, ال گەرمانياعا قونىس اۋدارعان جەرلەستەرىمىز دە ەكى ەل اراسىنا التىن كوپىر سالىپ وتىرعانىن مالىمدەدى.
كەزدەسۋدە قازاقستاننىڭ ەقىۇ-عا توراعالىق ەتۋى, ونىڭ باستى ۇستانىمدارى, جۋىردا جاريا ەتىلگەن ەل پرەزيدەنتىنىڭ حالىققا جولداۋى, “ەۋروپاعا جول” باعدارلاماسىنىڭ ماقساتى جايلى اڭگىمە ءوربىدى.
تاراپتار ساۋدا-ەكونوميكالىق اينالىمدى جاقسارتۋ, ءبىلىم مەن عىلىم سالاسىنداعى بايلانىستى جان-جاقتى ۇلعايتۋ قاجەتتىگى جونىندە پىكىر الماستى.
كەزدەسۋگە ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى, قازاقستان-گەرمانيا پارلامەنتارالىق دوستىق توبىنىڭ جەتەكشىسى امزەبەك جولشىبەكوۆ پەن قازاقستاننىڭ گەرمانياداعى توتەنشە جانە وكىلەتتى ەلشىسى نۇرلان وڭجانوۆ قاتىستى.
پارلامەنتى ءماجىلىسىنىڭ ءباسپاسوز قىزمەتى.