جاقىندا سوناۋ الىپ مۇحيت الديلەگەن امەريكادان وڭتۇستىككە ديماش نيازوۆ ارنايى كەلدى. ونىڭ اتا-اناسى ءتۇبى وڭتۇستىكتىك, ناقتىراق ايتقاندا قازىعۇرت اۋدانى اتبۇلاق اۋىلىنان.
اكەسى يسمات پەن اناسى سالتانات ديماش 13 جاسقا تولعاندا جۇمىس ىڭعايىمەن شەتەلگە قونىس اۋدارۋعا بەل بۋعان ەكەن. امەريكادا وسكەن ديماش اكادەميادان سوڭ پوليتسەي بولىپ جۇمىسقا ورنالاسادى. بىلتىر ەسىرتكى ساتاتىن قىلمىستىق توپتىڭ باسشىسىن ۇستاۋدا ەپتىلىك پەن قايرات كورسەتكەننەن كەيىن 2017 جىلدىڭ ۇزدىك پوليتسەيى اتانادى. قازاق بالاسى جەكپە-جەك ونەرىنە جاقىن عوي. كاسىپقوي بوكپەن اينالىسقان ديماش نيازوۆ بۇگىنگە دەيىن 13 كەزدەسۋ وتكىزىپ, بارلىعىندا دا جەڭىسكە جەتكەن.
قازىعۇرتتىڭ مادەنيەت سارايىندا امەريكانىڭ ۇزدىك پوليتسەيى ەلمەن كەزدەستى. ورىمدەي جاستاردىڭ قىزىعا قويعان سۇراقتارىنا جاۋاپ بەردى. – كەزدەسۋ ماعان وتە قىزىقتى جاعىمدى اسەر قالدىردى, – دەيدى ديماش. – اسىرەسە جاستاردىڭ سپورتقا قۇشتارلىعى مەنى قۋانتتى. كوبىسى اعىلشىن ءتىلىن بىلەدى ەكەن. بۇل وتە قۇپتارلىق جاعداي. سەبەبى الەمدىك قارىم-قاتىناس ءتىلى بولعاندىقتان وسى ءتىلدى بىلگەن جاقسى. قازىعۇرت اۋىلى كىشكەنتاي بولعانىمەن مۇندا بولاشاقتا ەلدىڭ اتىن شىعاراتىن نامىستى تالانتتى جاستار كوپ كورىنەدى. ولار ءوز ماقساتىنا جەتەتىنىنە سەنىمدىمىن. امەريكادا قازاقتار كوپ. دەگەنمەن مۇنداعىداي ءبىرىن-ءبىرى جاقسى قولداي بەرمەيدى.
جۇزدەسۋدە ديماش جۇرەكجاردى ءسوزىن ايتتى.
– قازاقستان – بۇل مەنىڭ وتانىم! قازاقتىڭ قانىنداعى جاۋىنگەرلىك كۇش-قايرات مەنىڭ جۇمىسىما عانا ەمەس, كاسىبي بوكستا دا كوپ سەرپىن بەرەدى. مەن اقش-تا جۇرسەم دە, ءوزىمدى قازاق سانايمىن. ويتكەنى مۇندا مەنىڭ اتامنىڭ دا, اكەمنىڭ دە جانە ءوزىمنىڭ دە كىندىك قانىم تامعان. مەنى ىستىق ىقىلاسپەن قارسى العان حالىققا زور العىسىمدى بىلدىرگىم كەلەدى, – دەدى «نيۋ-يوركتىڭ ۇزدىك پوليتسەيى» اتالىمىنىڭ جەڭىمپازى.
باقتيار تايجان, «ەگەمەن قازاقستان»
وڭتۇستىك قازاقستان وبلىسى