اقش پرەزيدەنتى دونالد ترامپ اق ۇيدە مەملەكەت باسشىسى نۇرسۇلتان نازارباەۆپەن كەزدەسۋ بارىسىندا قازاقستاندى سەنىمدى ءارى الەۋەتتى ارىپتەس سانايتىنىن جەتكىزدى.
د.ترامپتىڭ ايتۋىنشا, قازاقستان مەن اقش اراسىنداعى ديپلوماتيالىق, ساۋدا-ەكونوميكالىق قارىم قارىم-قاتىناس جاڭا ساپاعا يە بولىپ وتىر. اق ءۇي باسشىسى قازاقستاندى وڭىرلىك بەيبىتشىلىك پەن قاۋىپسىزدىكتىڭ شەشۋشى فاكتورى رەتىندە باعالايتىنىن جەتكىزدى.
اقش پرەزيدەنتى د.ترامپ ن.نازارباەۆتىڭ اق ۇيگە رەسمي ساپارمەن كەلۋىن وزىنە ابىروي سانايتىنىن جەتكىزدى.
«اقش تاراپى شيرەك عاسىردان بەرى قازاقستاندى ورتالىق ازياداعى تاۋەلسىز, ەگەمەن, الەۋەتتى ستراتەگيالىق ارىپتەس رەتىندە ەسەپتەپ كەلەدى. ءبىز قازاقستاننىڭ تاۋەلسىزدىگىن العاشقىلاردىڭ ءبىرى بولىپ مويىنداۋىمىزدى ماقتانىشپەن ايتامىز. سودان بەرى كوپ ۋاقىت ءوتتى. الايدا بۇل مەرزىم قازاقستان مەن اقش تاراپى حالىقارالىق بەيبىتشىلىك پەن قاۋىپسىزدىكتى قامتاماسىز ەتۋ ءۇشىن تىزە قوسىپ جۇمىس ىستەۋىنەن ۇزاق ەمەس. قازاقستان وزدەرىندەگى يادرولىق قارۋدان باس تارتۋ ارقىلى ءوز ۇرپاعى ءۇشىن قاۋىپسىز جانە بەيبىت بولاشاق قالىپتاستىردى», دەدى د.ترامپ.
بۇدان كەيىن اق ءۇي باسشىسى اقش-تىڭ قازاقستان ەكونوميكاسىنىڭ ەڭ ءىرى ينۆەستورى جانە نەگىزگى ساۋدا-ساتتىق ارىپتەستەرىنىڭ ءبىرى ەكەنىنە توقتالدى. د.ترامپ قازاقستاندى ورتالىق ازيا وڭىرىندەگى تابىستى دامۋدىڭ مودەلى رەتىندە تانيتىنىن اتاپ كورسەتتى.
اباي اسانكەلدى ۇلى,
"ەگەمەن قازاقستان"
ارنايى ۆاشينگتوننان
سۋرەتتى تۇسىرگەن باۋىرجان جۋاسباي