وبلىستىق اكىمدىكتە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «ءححى عاسىرداعى تۇراقتى دامۋدىڭ عالامدىق ەنەرگوەكولوگيالىق ستراتەگياسى» اتتى كىتابىنىڭ تۇساۋكەسەرى ءوتتى. جيىندى وبلىس اكىمى سەرىك ءبىلالوۆ اشىپ, تاۋەلسىزدىگىمىزدىڭ 20 جىلى ىشىندە ەل ەكونوميكاسىنىڭ وركەندەپ, الەۋمەتتىك جاعىنان كەمەلدەنگەنىن, مۇنداي جەتىستىكتەرگە الەمدىك دەڭگەيدەگى ساياساتكەر نۇرسۇلتان ءابىش ۇلىنىڭ باستاۋىمەن جەتكەنىمىزدى ايتا كەلىپ, تۋىندىنىڭ ماڭىزدىلىعىن اتاپ كورسەتتى.
رەسەي مەملەكەتتىك قىزمەت اكادەمياسىنىڭ پروفەسسورى, سولتۇستىك قازاقستان وبلىسىنىڭ قۇرمەتتى ازاماتى اناتولي سپيتسىن پرەزيدەنتتى ەرتەدەن بىلەتىنىن, كوپ جىلدار قىزمەتتەس بولعانىن, ەكى تومدىق تاڭدامالى جيناعىن ماسكەۋدە شىعارعانىن تىلگە تيەك ەتە كەلىپ, ادامزاتتى ەرەكشە الاڭداتىپ, تولعانتىپ وتىرعان عالامدىق پروبلەمالاردىڭ كىتاپتا ناقتى كورىنىس تاپقانىن جەتكىزدى. «قازاقستان جولى», «داعدارىستىڭ كىلتى», «نارىق جانە الەۋمەتتىك-ەكولوگيالىق دامۋ», تاعى باسقا ماقالالار تالداۋ ەرەكشەلىگىمەن, جاڭا كوزقاراسپەن ەرەكشەلەنەدى. نۇرسۇلتان ءابىش ۇلى بيىل بۇۇ باس اسسامبلەياسىنىڭ سەسسياسىندا سويلەگەن ءسوزىندە الەمدىك قوعامداستىقتى عالامدىق ەنەرگوەكولوگيا ماسەلەلەرىن بىرلەسە شەشۋگە شاقىرعان ۇسىنىستارىن 25 ەلدىڭ عالىمدارى قولداعان بولاتىن, دەدى ول.
ۇلتتىق عىلىم اكادەمياسىنىڭ اكادەميگى نۇرالى بەكتۇرعانوۆ كىتاپتا ايتىلعان قۇندى وي-پىكىرلەردىڭ كەلەسى جىلى ءوتكىزىلەتىن تۇراقتى دامۋ ءجونىندەگى سامميتتە ماقۇلدانىپ, حالىقارالىق دەڭگەيدە باعدارلاما قابىلداناتىنىنا سەنىم ءبىلدىردى.
م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە ن.نازارباەۆتىڭ «ءححى عاسىرداعى تۇراقتى دامۋدىڭ عالامدىق ەنەرگوەكولوگيالىق ستراتەگياسى» كىتابى بويىنشا عىلىمي-تەوريالىق كونفەرەنتسيا ۇيىمداستىرىلدى.
ءومىر ەسقالي,
سولتۇستىك قازاقستان وبلىسى.