بەرەكە مەن مولشىلىقتىڭ اۋىلى

«ەگەمەن قازاقستاننىڭ» ارنايى جوباسى: جاسامپازدىق جەمىستەرى

جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى. تومەندە اقتوبە  وبلىسىنىڭ قارعالى اۋدانىنداعى ستەپنوە اۋىلىنان فوتورەپورتاج بەرىلىپ وتىر. قارعالى اۋدانىنداعى ستەپنوە اۋىلىنىڭ اتاق-داڭقى وبلىستان تىسقارى جەرلەرگە دە بەلگىلى. ءتۇتىنى ءتۇزۋ كوتەرىلگەن ەلدى مەكەننىڭ تۇرمىسى باقۋاتتى بولۋىنا وسىنداعى «ستەپنوە» جاۋاپكەرشىلىگى شەكتەۋلى سەرىكتەستىگىنىڭ ۇلەسى زور. مۇندا اۋىل شارۋاشىلىعى ونىمدەرى وندىرىلە­دى جانە وڭدەلەدى, قۇراما جەم ءوندىرىپ وتكىزەدى, قۇرىلىس-قۇراستىرۋ, عيماراتتارعا كۇردەلى جوندەۋ جۇمىستارى جۇرگىزىلەدى, اۆتوماشينا­لار­دى جوندەيدى جانە تەحنيكالىق قامتۋ جۇ­مىس­تارىن اتقارادى. ەكسپورتتىق-يمپورتتىق وپەراتسيالاردى, ساۋدا-ساتتىق قىزمەتىن جاساي­دى. ەڭ باستىسى, اسىل تۇقىمدى  مال ءوسىرىپ, وتكىزەدى. مىنە, اۋىل شارۋاشىلىعىنىڭ سان-سالالى جۇمىستارىن قاتار جۇرگىزىپ وتىرعان سەرىكتەستىك اۋىلدىقتارعا جۇمىس تاۋىپ بەرىپ, تابىس كوزىن مولىقتىرىپ قانا وتىرعان جوق, وسى اۋىلدىڭ بارلىق تۇرمىس-تىرشىلىگىنىڭ بويى­نا قان جۇگىرتىپ  وتىر. ەگەمەندىكتىڭ ەلەڭ-الاڭىندا وسىنداعى مادەني-الەۋمەتتىك نىسان­دار­دىڭ جەكەشەلەنىپ كەتپەۋىنە باس-كوز بولعان سەرىكتەستىك ديرەكتورى امانقوس تولەۋوۆتى اۋىل­دىڭ تۇرعىندارى تۋعانىنداي سىيلاپ, قۇر­مەت­­تەيتىنى دە سوندىقتان. وسى جەردە ەڭبەك جولىن باستاعان  باسشىنى اۋىلدىڭ ەڭبەكتەگەن جاسى­نان ەڭكەيگەن قارتىنا دەيىن تانيدى. اركىم قولعا ىلىككەنىن يەلەنە باستاعان سوناۋ جاپپاي جەكەشەلەندىرۋ كەزىندە ءبىر بۇلدىرگىنى دە الماعان جاس باسشى نە كورسە دە اۋىلداس­تارى­مەن ورتاق بولۋدى قالادى. جاي عانا قالاپ قويعان جوق كۇردەلى كەزەڭنەن ولاردى ادەمى الىپ ءوتتى. بۇل اۋىل جوقشىلىقتى, قيىندىقتى باستان كەشپەدى دەسە دە بولادى. اۋىل ءۇشىن كۇردەلى كەزەڭدە دە بارلىق الەۋمەتتىك نىساندار جۇمىس ىستەپ, ءىشىپ-جەمنەن كەندە بولعان جوق. ستەپ­نوە­لىقتار از قامتىلعان دەگەنگە ارلانادى, ونداي­لاردى بۇل اۋىلدان كەزدەستىرمەيسىز دە.    مىنە, جىل وتكەن سايىن اۋىلدىقتاردىڭ تۇرمىسى تۇزەلىپ, اۋىل­دىڭ كەلبەتى كورىكتەنىپ كەلەدى. سونىڭ ءبارى «مىڭ قوسشىدان ءبىر باسشى» دەگەندەي, بىلىكتى باسشى امانقوس تولەۋوۆتىڭ ارقاسى ەكەنىن اۋىلدىقتار جوققا شىعارمايدى. باسقا­سىن بىلاي قويعاندا, وسى شارۋاشىلىقتى باس­قارعانىنا دا وتىز جىلدان اسقان ەكەن. وسى جىلداردا ول ەكونو­ميكا عىلىمدارىنىڭ كاندي­داتتىعىن قورعاپ, «قۇرمەت بەلگىسى», «قۇر­مەت» وردەندەرى  مەن «قازاقستان رەسپۋبلي­كا­سىنىڭ 10 جىلدىعى» مەدالىنىڭ يەگەرى, قازاق­ستانعا ەڭبەك سىڭىرگەن قايراتكەر اتاندى. 2001 جىلى «قازاق­ستاننىڭ ونجىلدىعىنىڭ ۇزدىك كاسىپكەرى», 2003 جىلى «وبلىستىڭ ۇزدىك كاسىپ­كەرى»  اتاعىنا يە بولدى. وتىز مىڭ گەكتاردان استام القاپقا ەگىن وسىرگەن شارۋاشىلىق بيىل ءار گەكتاردان   ورتاشا 7 تسەنتنەردەن ءونىم الدى. قۇت قامباعا قۇيىلعان التىن استىقتان سەرىكتەستىك ۇجىمى 1 جانە 2 سورتتى ۇن تارتادى, 6 ءتۇرلى ماكارون بۇيىمدارىن وندىرەدى. سەرىكتەستىكتە 25 ءتۇرلى نان-بولكە, 6 ءتۇرلى جارما شىعارادى.  7 ءتۇرلى قۇراماجەم وندىرەدى. شارۋاشىلىقتا 4 مىڭعا جۋىق ءىرى قارا, 370 جىلقى,  3 مىڭ قوي جانە تۇيە وسىرىلەدى. بۇدان باسقا, شۇجىق جاساۋعا پايدالاناتىن شوشقا ەتى ءۇشىن 3 مىڭنان استام تالپاق تاناۋ تاعى بار. مۇنىڭ ءبارىن باعاتىن ادام, ۇيلەستىرەتىن مامان كەرەك. وسى شارۋالاردىڭ باسى-قاسىندا جۇرگەندەر تۇگەلدەي وسى ستەپنوە اۋىلىنىڭ ادامدارى. اۋىلدىقتار بەرەكە-بىرلىكتىڭ ارقاسىندا وندىرىستەگى ەڭبەكتى جەڭىلدەتۋگە قول جەتكىزۋدە. مۇندا 432 ءار ءتۇرلى تەحنيكا بار. سەرىكتەستىكتەگى ونىمدىلىگى جوعارى ءتورت  امەريكالىق «دجون-دير», گەرمانيالىق ون ءبىر  «مەديون-310» جانە  ءتورت «تۋكانو-320» استىق كومبايندارىن اۋىلدىڭ جاستارى ۇرشىقشا ۇيىرەدى. كانادا­نىڭ ءۇش  «FLEXICOILSTX-425»,  ءبىر «JohnDeere-1830»  ونىمدىلىگى جوعارى ەگىس كەشەندەرى دە ناۋقاندىق جۇمىستاردى ساپالى ءارى تەز اتقارۋعا مۇمكىندىك بەرۋدە. سەرىكتەستىكتە اۋىلدىڭ 250 ادامى جۇمىس ىستەيدى, تابىسى وزگە اۋىلدارعا قاراعاندا اناعۇرلىم جوعارى. سودان دا بولار بۇل اۋىلدا باسقا جاققا كوشۋ دەگەن اتىمەن جوق. قايتا الىس اۋدانداردان, ءتىپتى وبلىس ورتالىعىنان دا وسىندا اتتاي قالاپ, قونىس اۋدارۋشىلار بار. سۋ قۇبىرمەن ءۇيدى-ۇيگە بارىپ تۇر. قالاعا اپتاسىنا ەكى رەت تىكەلەي اۆتوبۋس قاتىنايدى. ستەپنوە اۋىلىنداعى  بەرەكە مەن مولشىلىق, تاتۋلىق پەن بىرلىك وزگە اۋىلدارعا ۇلگى بولارلىقتاي. ارنايى بەتتى دايىنداعان «ەگەمەن قازاقستان» گازەتىنىڭ اقتوبە وبلىسىنداعى مەنشىكتى ءتىلشىسى ساتىبالدى ءساۋىرباي.