ساناۋلى كۇندەردەن كەيىن ەستەرسۋندتە 2017-2018 جىلعى بياتلوننان الەم كۋبوگى باستالادى. بەلورۋستاردىڭ ۇكىلى ءۇمىتىن ارقالاعان وليمپيادا چەمپيونى داريا دومراچەۆا اتالعان جارىسقا تاس-ءتۇيىن ءازىر وتىر. اراعا ءۇش جىل سالىپ ۇلكەن سپورتقا قايتا ورالعان ارۋ بيىل جۇلدەلى ورىننان دامەلى. ونىڭ ۇستىنە, بيىلعى ءدۇبىرلى دودا پحەنچحاندا وتەتىن قىسقى وليمپيا ويىندارىمەن تۇسپا-تۇس كەلىپ وتىر.
الاقانداي بەلارۋس ەلى سوچي وليمپياداسىندا 5 التىن مەدالعا قول جەتكىزدى. ونىڭ ۇشەۋى – داريا دومراچەۆانىڭ ەنشىسىندە. بياتلونشى قىز ءۇشىنشى رەت وليمپ شىڭىن باعىندىرعاننان كەيىن وعان «بەلارۋس قاھارمانى» اتاعى بەرىلدى.
جانكۇيەرلەر اراسىندا «بەلارۋس راكەتاسى» اتانعان داريا 1986 جىلى مينسكىدە ساۋلەتشىلەر وتباسىندا دۇنيەگە كەلگەن-ءدى. ءتورت جاسقا تولعاندا اتا-اناسى سىبىرگە قونىس اۋدارىپتى. ول 6 جاسىنان باستاپ شاڭعىعا قىزىعۋشىلىق تانىتقان. بەلورۋستاردىڭ ماقتانىشىنا اينالعان قىز ءبىلىم مەن سپورتتى قاتار الا ءجۇرىپ, مەكتەپ پەن ۋنيۆەرسيتەتتى ۇزدىك ءتامامدادى. داريا 13 جاسىندا ۇلكەن سپورتپەن اينالىسۋعا بەل شەشە كىرىستى. سودان بەرى ءجيى-ءجيى جەڭىستىڭ بيىك تۇعىرىنان كورىنىپ ءجۇر. 2003 جىلى دومراچەۆتار وتباسى مينسكىگە قايتا ورالدى. داريا باستاپقىدا جارىستارعا رەسەيدىڭ ساپىندا قاتىسىپ جۇرگەن. 2004 جىلى تاريحي وتانىنان شاقىرتۋ العاندا, داريا ويلانباستان كەلىستى. مىنە, ءبىر ءوزى بەلارۋسكە 3 التىن اپەرگەن دومراچەۆانىڭ قىسقاشا ءومىربايانى وسى.
داريانىڭ سپورتتىق كارەراسى بىردەن ءساتتى بولا قويعان جوق. تۇڭعىش رەت الەم كۋبوگىنا 20 جاسىندا قاتىسقان ول جەڭىستىڭ ءتاتتى ءدامىن تاتۋ ءۇشىن ەكى جىل كۇتۋگە تۋرا كەلدى. 2008 جىلى رۋپولدينگتەگى الەم كۋبوگىنىڭ 5-ءشى كەزەڭىندە دومراچەۆا قولا مەدال جەڭىپ الدى. وسى جەتىستىگىنەن كەيىن سول جىلى تاعى دا ەكى رەت جەڭىس تۇعىرىنا كوتەرىلدى. رازۋن-انتەرسەلۆادا وتكەن باسەكەدە ەكىنشى جانە ءۇشىنشى ورىنعا قول جەتكىزدى. ال 2009 جىلدان باستاپ داريا ۇزدىك وندىقتىڭ قاتارىنان تۇسكەن جوق. دومراچەۆا ۆانكۋۆەر وليمپياداسىندا (2010 جىل) جەكەلەي سىندا مارەگە ءۇشىنشى بولىپ جەتىپ, قولا مەدال جەڭىپ الدى (كۇمىس مەدال قازاقستاندىق ەلەنا حرۋستالەۆاعا بۇيىرعان بولاتىن).
بياتلوننان 2011-2012 جىلعى الەم كۋبوگىندا التى مارتە مارەگە ءبىرىنشى كەلىپ, جالپى ەسەپتە ەكىنشى ورىنعا قول جەتكىزگەن. ال 2012-2013 جىلى 3 رەت جەڭىس تۇعىرىنان كورىنىپ, جالپى ەسەپتە 2-ورىنعا تۇراقتادى. سوچي وليمپياداسى وتكەن 2014 جىلى ءۇش رەت جەڭىس تۇعىرىنىڭ ەڭ بيىگىنە كوتەرىلدى. ال وليمپيادادا داريانىڭ اسىعى الشىسىنان ءتۇستى. ول 10 شاقىرىمعا ءىز كەسۋ سايىسىندا وليمپيادا چەمپيونى اتاندى. اراعا ءۇش كۇن سالىپ تاعى ءبىر رەت التىن مەدالدى قانجىعاسىنا بايلادى. 15 شاقىرىمعا جەكەلەي سىندا دارياعا تەڭ كەلەر ەشكىم بولعان جوق. سونداي-اق 12,5 شاقىرىمعا جاپپاي جارىسۋدا دومراچەۆا ءۇشىنشى رەت مىقتىلىعىن دالەلدەدى. ودان كەيىنگى ماۋسىمدا دارياعا تاعى تەڭ كەلەر ەشكىم بولمادى. ءبىر ءوزى توعىز كەزەڭدى باعىندىرعان «بەلارۋس راكەتاسى» الەم كۋبوگىنىڭ چەمپيونى اتاندى.
بەلارۋس بۇعان دەيىنگى قىسقى وليمپيادادان باس-اياعى 9 مەدال ۇتىپ الدى. اق وليمپيادانىڭ تۇڭعىش التىنى 2010 جىلى ۆانكۋۆەردە بۇيىرعان-دى. فريستايلشى الەكسەي گريشين ەلىنىڭ ءانۇرانىن كانادا تورىندە شىرقاتتى. داريا دومراچەۆانىڭ 3 دۇركىن وليمپيادا چەمپيونى اتانعانىن جوعارىدا ايتتىق. قالعان ەكى التىن گريشيننىڭ ءىزباسارلارىنا بۇيىرىپتى. فريستايلشى اللا تسۋپنەر مەن انتون كۋشنير وليمپ شىڭىن باعىندىردى. نادەجدا سكاردينو بياتلوننان قولا مەدال يەلەندى. حالقىنىڭ سانى 10 ميلليونعا جۋىق, كىشكەنتاي بەلارۋس ەلىنىڭ اق وليمپياداداعى جەتكەن جەتىستىگى وسىنداي!
اباي اسانكەلدى ۇلى,
«ەگەمەن قازاقستان»