تاياۋدا وبلىس اكىمى ەرلان قوشانوۆ وڭىرىمىزدەگى جەدەل جاردەم قىزمەتكەرلەرىنە سالتاناتتى تۇردە جاڭا 35 اۆتوكولىك كىلتىن تابىس ەتتى. قازىرگى كۇنى ايماعىمىزدا بارلىعى 117 جەدەل جاردەم بريگاداسى حالىققا قىزمەت كورسەتەدى. سونىڭ 49-ى وبلىس ورتالىعىندا جۇمىس جاساۋدا. وسى كۇنى اتالعان بارلىق بريگادالار كولىكپەن قامتاماسىز ەتىلگەن.
كولىك دەمەكشى, مۇنداي تەمىر تۇلپارلاردىڭ قىزمەت ەتۋ مەرزىمى – 6 جىل. بۇعان دەيىن جەدەل جاردەم قىزمەتكەرلەرى 2015 جىلى 37 جاڭا اۆتوكولىككە يە بولعان ەدى. شىمكەنت قالاسىنداعى مەديتسينالىق قۇرىلعىلار مەن تەحنيكالاردى ءوندىرۋشى وتاندىق «KAZMEDPRIBOR Holding» كومپانياسىندا قۇراستىرىلعان «گازەل» ماركالى بۇل تەمىر تۇلپارلاردىڭ ورتاشا قۇنى 19 ميلليون تەڭگەنى قۇرايدى ەكەن. اتالعان 35 كولىك ليزينگ جۇيەسى بويىنشا 3 جىلعا الىندى. ناۋقاسقا كومەك كورسەتۋگە بارلىق مۇمكىندىك بار. ولاي دەپ وتىرعانىمىز باسىم بولىگى رەانيموبيل سانالاتىن كولىكتەر جەدەل جاردەم قىزمەتكەرلەرىنە قاجەت جابدىقتارمەن 100 پايىز قامتاماسىز ەتىلگەن. سونداعى 8 كولىك «گازەل بيزنەس» نەگىزىندە بولسا, قالعان 27-ءسى – «گازەل Next».
تاعى ءبىر ايتا كەتەرلىگى, وڭىرىمىزدە 5 جەدەل جاردەم بريگاداسى وبا, تىرىسقاق, كۇيدىرگى سىندى اسا قاۋىپتى جۇقپالى اۋرۋلارمەن كۇرەسەدى. ولارعا ارنالعان كولىكتەر دە ەرەكشە جابدىقتالعان. ءسويتىپ, بۇعان دەيىنگى كولىكتەردىڭ جىلىتقىشى ماردىمسىز, مۇزداتقىشى مۇلدە جوق بولسا, كەيىنگى 35 كولىكتە بۇل ولقىلىقتاردىڭ ورنى تولىپتى.
– ءار ادامنىڭ باستى بايلىعى – دەنساۋلىق. بۇل رەتتە تۇرعىندارىمىزدىڭ جاعدايىن جاقسارتۋ ءۇشىن بارىمىزدى سالىپ كەلەمىز. پرەزيدەنت تاپسىرماسىن ورىنداي وتىرىپ, جاڭا اۋرۋحانالار تۇرعىزىپ, جاڭا تەحنولوگيالاردى قولدانىسقا ەنگىزىپ, زاماناۋي قوندىرعىلاردى ساتىپ الۋدامىز. مىنە, بۇگىن ءبىز جاڭا جىل قارساڭىندا 35 كولىكتى ەل يگىلىگىنە پايدالانۋعا ۇسىنىپ وتىرمىز, – دەدى ەرلان قوشانوۆ.
ميراس اسان, «ەگەمەن قازاقستان»
قاراعاندى وبلىسى