سەنبى كۇنى كولىك جانە كوممۋنيكاتسيا ءمينيسترى بەرىك كاماليەۆ پەن اقمولا وبلىسىنىڭ اكىمى سەرگەي دياچەنكونىڭ قاتىسۋىمەن «ششۋچە – بۋراباي كۋرورتتى ايماعى» اۆتوموبيل جولىنىڭ اشىلۋ سالتاناتى بولىپ ءوتتى.
ەلباسىنىڭ تىكەلەي تاپسىرماسىمەن 2009 جىلى قازاقستانداعى العاشقى التى جولاقتى, جوعارى جىلدامدىقتى «استانا – ششۋچە» اۆتوماگيسترالى پايدالانۋعا بەرىلدى, دەدى ءوز سوزىندە مينيستر ب.كاماليەۆ. وسىنىڭ ناتيجەسىندە ەكى ارالىقتاعى ۋاقىت ەكى ەسە قىسقارىپ, جول اپاتى دا ەكى ەسە ازايدى. بۇگىن تۋريستىك كلاستەردى دامىتۋ شەڭبەرىندە كۋرورتتى ايماققا توتە باستايتىن 8,9 شاقىرىمدىق ءتورت جولاقتى تراسسا اشىلىپ وتىر. جولدىڭ ءون بويىندا قورشاۋلار, كوپىرلەر, ەلدى مەكەندەر اۋماعىندا ەلەكتر جارىعى ورناتىلىپ, جاياۋ جۇرگىنشىلەرگە قاجەتتى جاعدايلار جاسالدى. جالپى, اقمولا وبلىسى بۇگىنگى كۇنى ءىرى اۆتوجول جوبالارىن ىسكە اسىرۋدا جانە زاماناۋي تەحنولوگيالاردى قولدانۋدا كوشباسشى بولىپ وتىرعانىمەن قۇتتىقتايمىن.
وبلىس اكىمى س.دياچەنكو بۇگىنگى قۋانىشتى شارانىڭ اقمولا وبلىسىنىڭ استاناداعى كۇندەرى قارساڭىندا ءوتىپ وتىرعانى جۇرتشىلىقتى سەرپىلىسكە تۇسىرگەنىن ايتتى. كۋرورتتى ايماقتىڭ تارتىمدىلىعىن ارتتىرۋ ماقساتىندا اتقارىلىپ جاتقان ىستەر ءۇشىن العىس بىلدىرگەن ول كوكشەتاۋ قالاسى اۋەجايىندا ۇشۋ-قونۋ جولاعىن قايتا سالۋ جوباسى ويداعىداي اتقارىلىپ جاتقاندىعىن مالىمدەدى.
باقبەرگەن امالبەك,
اقمولا وبلىسى.