كارى ءومىردىڭ قاقپاسىن قاعىپ, ءسابي جىل اتتاعان كەزدە ءۇش ءجۇز الپىس بەس كۇن عانا ءومىر سۇرەتىنىن ەش ويلاماي, ادام اتا ءزاۋزاتىنا ءالى ەشكىم بىلە قويماعان قۋانىشىمەن قاباعات قايعىسىن دا جاسىرىپ, ك ۇلىمدەپ كىرىپ كەلەدى. ءاليحان بوكەيحان «جاڭا ستيل» دەگەن نەمەسە گريگوريان كۇنتىزبەسى اتالعان ۋاقىت ەسەبى بويىنشا عۇمىر كەشىپ كەلە جاتقانىمىزدى دا ەسكەرىپ سويلەيمىز. جىل وتكەندە جاقسى ءسوز ايتاتىن, جىل كۇتكەندە جاقسىلىق كۇتەتىن حالقىمىز يت جىلىندا ەگىندى ەرتە ەگىپ, قىسىنا دايارلىقتى ەرتە باستايدى ەكەن. ىرىمشىل مىنەزىنە سالىپ, قيىندىقتىڭ ءوزىن الدا كەلە جاتقان ۇلكەن جەڭىلدىكتىڭ, جاقسىلىقتىڭ وتەۋى دەپ قاراعان. يت جىلىندا دۇنيەگە ءسابي كوپ كەلەدى دەپ قۋانادى ەكەن. قۇدايدىڭ وزىنە عانا ايان سىرلاردى ىقىلاستى دۇعاسىمەن سۇراپ الاتىن قازاق جۇرەگىنەن اينالاسىڭ!
وسى جىلى قازاققا ەڭبەگى سىڭگەن پەرزەنتتەردىڭ مەرەيلى جىلدارىنان ءبىر پارا ۇسىنىپ كورمەكپىز. قازاق تاعدىرىنا الاڭداپ, زار زاماندا تارىعىپ عۇمىر كەشكەن شورتانباي اقىننىڭ تۋعانىنا 210 جىل. «مىنا دۇنيەگە ءبىز بىلەتىن ءتورت مۇحيتتىڭ ۇستىنە جاڭا مۇحيت – كۇي مۇحيتىن قوسقان» قۇرمانعازىنىڭ دۇنيە ەسىگىن اشقانىنا – ەكى عاسىر تولىپتى. اقان سەرى مەن ىقىلاس دۇكەن ۇلىنا – 175 جىل, شاكارىم مەن ءماشھۇر ءجۇسىپتىڭ تۋعانىنا – 160 جىل. كەڭەس داۋىرىنە دەيىن ءوزى تۋىپ-وسكەن تورعاي دالاسىندا بي بولعان, پاتشا ۇكىمەتى «ويان, قازاق» دەگەن كىتاپتى تاركىلەگەن تۇستا, جاسىرىن تاراتقان, بۋتىركا تۇرمەسىندە جاتىپ, كارەلياعا ايدالعان, كەيىن سوندا قايتىس بولىپ, تەك 1991 جىلى عانا اقتالعان اسقار دۋلاتوۆ (مىرجاقىپتىڭ تۋعان اعاسى) پەن ابايدىڭ تاربيەسىن كورىپ, ءتالىمىن العان, اقىن مۇراسىن جيناپ, تۇڭعىش باسپاعا ۇسىنعان كاكىتاي ىسقاق ۇلىنىڭ تۋعانىنا – 150 جىل. قازاق ادەبيەتىندەگى تۇڭعىش رومانداردىڭ ءبىرىن جازعان سپانديار كوبەەۆ پەن جىر-داستانداردىڭ ايتۋلى جۇيرىگى شوراياقتىڭ ومارىنا – 140 جىل. ال ەۋروپانىڭ تورىندە قازاق ءانىن اۋەلەتىپ, قازاق اتىن اسقاقتاتقان امىرە قاشاۋباەۆتىڭ تۋعانىنا 130 جىل بولىپتى. تۋما تالانت, قازاق تەاتر ونەرىنىڭ كوريفەيى قاليبەك قۋانىشباەۆتىڭ, جىر سۇلتانى سۇلتانماحمۇت تورايعىروۆتىڭ, قازاق پوەزياسىنا ەۋروپالىق اشەكەيدى اكەلگەن ماعجان جۇماباەۆتىڭ, قازاق ايەلدەرى اراسىنان شىققان تۇڭعىش دارىگەر اققاعاز دوسجانوۆانىڭ تۋعانىنا – 125 جىل. ۇستاز-ادىسكەر, قۋعىنعا ۇشىراعان شاحزادا شونانوۆانىڭ دۇنيەگە كەلگەنىنە 115 جىل بولىپتى.
بيىل تالانتتى سىنشى, كورنەكتى جازۋشى تاكەن الىمقۇلوۆتىڭ, قاينەكەي جارماعامبەتوۆتىڭ, قوعام قايراتكەرى, عالىم نۇرىمبەك ءجاندىلديننىڭ, حالىق قاھارمانى قاسىم قايسەنوۆتىڭ, شەبەر اۋدارماشى ءىسلام جارىلعاپوۆتىڭ, كەڭەس وداعىنىڭ باتىرى ابدوللا جانزاقوۆتىڭ تۋعاندارىنا – 100 جىل. قازاق راديوسىنىڭ ءۇنى بولعان ءانۋار بايجانباەۆ پەن قازاق كينو ونەرىنە ۇلكەن ۇلەس قوسقان سۇلتان قوجىقوۆتىڭ دۇنيە ەسىگىن اشقاندارىنا 95 جىل تولىپتى. كۇللى قازاق دالاسىن انا تۋرالى انىمەن تەربەتكەن عافۋ قايىربەكوۆتىڭ تۋعانىنا 90 جىل.
بالۋان ابىلسەيىت ايحانوۆتىڭ, جازۋشى اسقار سۇلەيمەنوۆتىڭ, اقىن وتەجان نۇرعاليەۆتىڭ تۋعاندارىنا 80 جىل. اماندىق بولسا, قازاقتىڭ جەلاياعى ءامين تۇياقوۆ, قازاق بالەتمەيستەرى بولات ايۋحانوۆ, اكتريسا تورعىن تاسىبەكوۆا مەرەيلى 80 جاسقا كەلەدى.
بۇدان وزگە مەرەيلى جاستاردىڭ ءبارى توي ءۇشىن, دۇرمەك ءۇشىن ەمەس. وتكەندى مۇقيات زەردەلەۋ ءۇشىن ايتىلادى, ەسكەرىلەدى, اتالادى. تاۋەلسىز دامۋدىڭ جولىندا رۋحاني تۇرلاۋلى بولۋىمىزعا زور ۇلەس قوسقان ارىستاردىڭ ەڭبەگى ريزاگەر ۇرپاقتىڭ ساناسىنان ءبىر ساتكە وشپەك ەمەس.
باعاشار تۇرسىنباي ۇلى,
«ەگەمەن قازاقستان»