گلۋبوكوە اۋداندىق دوستىق ءۇيى جاڭا جىل قارساڭىندا ۋۆاروۆو اۋىلىنا كوشىرىلىپ, ەكى قاباتتى ەڭسەلى جاڭا عيماراتقا يە بولدى.
كەلەسى جىلى قۇرىلعانىنا 10 جىل تولاتىن دوستىق ۇيىندە بۇعان دەيىن جەكە عيمارات بولماي, ەتنومادەني بىرلەستىك مۇشەلەرى ءار ەسىكتى ءبىر جاعالاپ كەلىپتى. قوعامدىق كەلىسىم ورتالىعىنىڭ اشىلۋ سالتاناتىنا قاتىسقان اۋدان اكىمى قاليحان بايعونىسوۆجاڭا نىسان ەلباسىنىڭ «رۋحاني جاڭعىرۋ» باعدارلاماسى اياسىندا پايدالانۋعا بەرىلگەنىن, ايماقتا 50-دەن استام ۇلت وكىلدەرى تاتۋ-ءتاتتى تىرشىلىك كەشىپ جاتقانىن اتاپ ءوتىپ: «ۋۆاروۆو اۋىلىندا اشىلعان دوستىق ءۇيى ءوڭىر تۇرعىندارىنىڭ بەرەكە-بىرلىگىن ودان ءارى نىعايتا تۇسەدى دەپ سەنەمىز», - دەپ ىزگى تىلەگىن جەتكىزدى.
گلۋبوكوە اۋداندىق دوستىق ءۇيىنىڭ ديرەكتورى جانار قابيدوللاقىزى جاڭا عيماراتتا جۇمىس ىستەۋگە بارلىق جاعداي جاسالعانىن, الداعى ۋاقىتتا انالار كەڭەسى مەن ەتنومادەني بىرلەستىكتەردىڭ جۇمىسىن جانداندىرىپ, بىرقاتار شارالاردى قولعا الۋدى جوسپارلاپ وتىرعاندارىن ايتادى. «اۋدانىمىزدا 17 اۋىلدىق وكرۋگ, 40-تان استام اۋىل بار. وڭىردە 54 ۇلتتىڭ وكىلدەرى تۇرادى. قاڭتار ايىنان باستاپ اۋدانداعى بارلىق ۇلتتاردىڭ مادەنيەتى مەن ءداستۇرىن ناسيحاتتاۋ ءۇشىن ءار ۇلتتىڭ مادەني كۇندەرىن وتكىزۋدى جوسپارلاپ وتىرمىز. وسى رەتتە دوستىق ءۇيىنىڭ جايلى دا جاڭا عيماراتقا كوشۋىنە ۇيىتقى بولعان اۋدان اكىمىنە ايتار العىسىمىز شەكسىز», - دەيدى دوستىق ءۇيىنىڭ ديرەكتورى.
ازامات قاسىم,
«ەگەمەن قازاقستان»
شىعىس قازاقستان وبلىسى,
گلۋبوكوە اۋدانى.