وتىن تاسىپ, وت جاعىپ, كۇل شىعارۋ قاي اۋىلدىڭ تۇرعىنىنا دا جەڭىل ەمەس. قارابالىق اۋدانىنداعى ۆوروشيلوۆ سەلوسى اۋدان ورتالىعىنا جاقىن بولعانىمەن, كومىر, وتىن ءتۇسىرۋدىڭ بەينەتى بولىپ تۇراتىن. كومىردىڭ ساپاسى دا ءار جىلى ارقالاي بولادى, باعاسى ارزاندامايتىنى تاعى بار.
ءاۋ باستا ۇلكەن اۋىل بولعانىمەن ادامدار كوشە-كوشە, ەلدى مەكەن دە قۋسىرىلىپ قالعان. قازىر اۋىلدا بارلىعى 455 ادام تۇرادى, باستاۋىش مەكتەپ پەن كلۋب قانا بار. سوعان قاراماستان اۋىل «قازترانسگاز» اكتسيونەرلىك قوعامىنىڭ «قوستاناي وبلىسىنىڭ ەلدى مەكەندەرىن گازداندىرۋ جانە گاز تاراتۋ جەلىلەرىن جاڭعىرتۋ» ينۆەستيتسيالىق جوباسى اياسىندا گازعا قوسىلدى. اۋىل ادامدارىنىڭ كوڭىل كۇيى دە وزگەرىپ سالا بەردى.
ناتاليا سوسنوۆسكايا جاسىنان وسى اۋىلدا تۇرىپ كەلەدى. زەينەتكەرلىككە شىققانشا باستاۋىش مەكتەپ ديرەكتورى قىزمەتىن اتقاردى. قازىر اۋىلدىڭ ارداگەرلەر كەڭەسىنە جەتەكشىلىك ەتەدى, قوعامدىق جۇمىسقا دا ۇيىتقى, بەلسەندى. وت جاعۋ, كومىر ءتۇسىرۋ, گاز باللونىن ساتىپ الۋ, قوسۋ سەكىلدى جۇمىستاردىڭ بارلىعى دا تۇرعىندارعا قيىن ەكەنىن بىلەدى, ءوزى دە سول جۇمىستاردىڭ بارلىعىن باستان وتكەردى. كوگىلدىر گاز ۇيىنە كىرگەلى قولى ۇزارىپ, ونىڭ راقاتىن كورىپ وتىر.
– ءبىز بۇعان دەيىن اس ازىرلەۋ ءۇشىن كوبىنە ەلەكتر قۋاتىن, گاز باللونىن پايدالانىپ كەلدىك. قىسقى بورانداردا, كوكتەمدە داۋىل سوققان كۇندەرى ەلەكتر جارىعى ءوشىپ قالادى, ال گاز باللونى ءدال قاجەت كەزدە تاۋسىلىپ قالادى. گاز باللونىنىڭ قاۋىپتىلىگى ءوز الدىنا اڭگىمە. باللوننىڭ گازى ازايعان كەزدە ءيىسى شىعىپ, باسىمىزدى اۋىرتاتىن. ەندى تابيعي گاز قوسىلعاننان كەيىن بۇل قيىندىقتار ارتتا قالدى دەپ ەسەپتەيمىن. قازىر ءۇيىمىز جىلى, ءومىردىڭ راقاتى دەپ وسىنى ايت, – دەيدى ناتاليا نيكولاەۆنا.
سەلونى گازعا قوسۋ ءۇشىن 6,9 شاقىرىمعا تارتا كوشەارالىق گاز قۇبىرلارى سالىندى. اۋىلداعى 155 جەكە ءۇيدىڭ 49-ى گازعا قوسىلدى, تاعى 4 ۇيدەگى مونتاج جۇمىستارى تولىعىمەن اياقتالدى. دەمەك تاعى دا 4 ءۇي كوگىلدىر وتىنمەن قامتىلادى دەگەن ءسوز.
– ۆوروشيلوۆ سەكىلدى حالىق سانى از اۋىلداردىڭ گازعا قوسىلۋىندا ۇلكەن ءمان بار. ءبىرىنشى كەزەكتە اۋا تازارادى, تۇرعىندار كومىر تاسىپ, اعاش جارۋدان قۇتىلادى. دەمەك ادامداردىڭ وزگە ماڭىزدى شارۋالارعا كوبىرەك ۋاقىتى بولىنەدى. «قازترانسگاز» كومپانياسى ۇلكەن جۇمىس اتقاردى. ەكى جىلدا وبلىستا 600 شاقىرىم گاز قۇبىرى سالىنادى, 50 مىڭنان استام تۇرعىنى بار 8 ەلدى مەكەنگە گاز بەرىلەدى. وسىنىڭ ارقاسىندا وبلىستا كوگىلدىر وتىننىڭ يگىلىگىن كورگەن تۇرعىندار سانى 10 پايىزعا ارتادى, – دەيدى وبلىس اكىمىنىڭ ءبىرىنشى ورىنباسارى عاۋەز نۇرماعانبەتوۆ.
ەلباسىنىڭ تاپسىرماسى بويىنشا ەلىمىزدى گازداندىرۋدىڭ باس جوسپارى بەكىتىلگەن بولاتىن. سونىمەن قاتار 2015 جىلدىڭ قاراشا ايىندا مەملەكەت باسشىسىنىڭ وندىرىستىك پروتسەستەردى تۇراقتاندىرۋ جونىندەگى تاپسىرماسى اياسىندا, ءوڭىردىڭ تۇراقتى ەكونوميكالىق ءوسۋىن قامتاماسىز ەتۋ, گازبەن جابدىقتاۋ جانە ەكولوگيالىق احۋالدى جاقسارتۋ, گاز قۇبىرلارىنىڭ قالىپتى جاعدايدا جۇمىس ىستەۋىن قامتاماسىز ەتۋ ماقساتىندا «قازمۇنايگاز» ۇلتتىق كومپانياسى» اق, «قازترانسگاز» اق جانە قوستاناي وبلىسى اكىمدىگى اراسىندا مەموراندۋمعا قول قويىلدى. سول كەلىسىمگە سايكەس, وتكەن جىلى 13,5 مىڭنان استام تۇرعىنى بار قاشار جانە وكتيابر كەنتتەرى گازداندىرىلدى.
– ەلباسى تاپسىرماسىن جۇزەگە اسىرۋ اياسىندا «قازترانسگازايماق» ۇلتتىق وپەراتورى بيىل ۆوروشيلوۆ سەلوسىنان كەيىن قارابالىق اۋدانىنداعى توعىزاق, دەنيسوۆ اۋدانىنداعى الچانوۆ, انتونوۆ سەلولارىن دا گازبەن قامتاماسىز ەتەدى. ءار ءۇيدىڭ الدىنا گاز قۇبىرى كەلىپ تۇر, – دەدى «قازترانسگاز ايماق» اق ديرەكتورىنىڭ ورىنباسارى مۇقان سادۋاقاسوۆ.
بۇگىندە قوستاناي وبلىسى تۇرعىندارىنىڭ 55 پايىزى كوگىلدىر وتىندى پايدالانىپ وتىر. 170 مىڭنان استام ابونەنتتىڭ 1656-سى زاڭدى تۇلعالار, ءۇي سانى 168 624 بولدى. الداعى ەكى جىلدا ولاردىڭ سانى 220 مىڭعا جەتكىزىلەدى.
ءنازيرا جارىمبەت, «ەگەمەن قازاقستان»
قوستاناي سۋرەتتى تۇسىرگەن ەكاتەرينا افاناسەۆا