تاۋەلسىزدىك تاقىرىبى مەن بۇگىنگى قازاقستاندىق قوعامداعى رۋحاني جاڭعىرۋ كورىنىستەرىنىڭ اراسىندا تىعىز بايلانىس پەن ۇندەستىك بار. ءبىزدىڭ بۇگىنگى بارلىق جەتىستىكتەرىمىز بەن تابىستارىمىزدىڭ ءتۇپ-تامىرى تاۋەلسىزدىكتەن باستاۋ الاتىنى ءسوزسىز. ال بيىلعى كوكتەمدە مەملەكەت باسشىسى بەلگىلەپ بەرگەن «رۋحاني جاڭعىرۋ» باعدارلاماسى تاۋەلسىزدىگىمىزدى ودان ءارى تۇعىرلاندىرۋعا ءوز ىقپالى مەن سەپتىگىن تيگىزدى.
وسى تۇرعىدان كەلگەندە مادەنيەت جانە سپورت مينيسترلىگى ۇيىمداستىرعان «جىر ارقاۋى – جاڭعىرۋ» اتتى رەسپۋبليكالىق اقىندار ايتىسىنىڭ باستى وزەگى تاۋەلسىزدىك مۇراتتارى مەن قۇندىلىقتارىن پاش ەتۋگە باعىتتالعانى ونىڭ مارتەبەسىن بيىكتەتە ءتۇستى. ايتىستىڭ الدىنا قويعان ماقساتىن ويداعىداي ورىنداپ شىعۋىنا اقتوبە وبلىسىنىڭ اكىمدىگى جان-جاقتى قولداۋ كورسەتتى.
ايتىس بيىل وبلىس ورتالىعىندا پايدالانۋعا بەرىلگەن 1200 ورىندى ونەر ورتالىعىنىڭ كونتسەرت زالىندا وتكىزىلدى, جەرەبە تاستالعان كەزدە ايتىستىڭ شىمىلدىعىن اشۋ ءساتى اتىراۋلىق ساعادات نۇرمانوۆ پەن پاۆلودارلىق قۋانىش شارمانوۆقا بۇيىردى. بۇدان كەيىنگى كەزەكتە ەسىمى رەسپۋبليكا جۇرتشىلىعىنا كەڭىنەن تانىمال ايتىستىڭ ەرەن جۇيرىكتەرى مەن جاس پەرىلەرى ورنەكتى سوزدەردىڭ كورىگىن قىزدىرا ءتۇستى.
– بيىل التىنشى رەت وتكىزىلگەن «التىن دومبىرا» بايگەسىنىڭ الدىنا قويعان ماقساتىنىڭ ءبىرى جاڭا ەسىمدەردى تابۋ ەدى. وسى ويىمىز ورىندالدى دەپ بىلەمىز, بۇل رەتتە ەڭ الدىمەن جامبىل وبلىسىنان كەلگەن اسەت دۇيسەباەۆتىڭ ەسىمىن اتاي الامىز. ونىڭ ءوزىن-ءوزى ۇستاۋى, دومبىرا قاعىسى مەن ماقامىنىڭ ۇندەستىگى, ءوز ويىن ايقىن بىلدىرە الاتىنى – حالىقتىڭ دا, قازىلار القاسى مۇشەلەرىنىڭ دە كوڭىلىنەن شىقتى, – دەيدى قازىلار القاسىنىڭ توراعاسى قونىسباي ءابىل.
ايتىس كەزىندە تالدىقورعاندىق جانداربەك بۇلعاقوۆ جانە الماتىلىق سىرىم اۋەزحان سەكىلدى بۇعان دەيىن شاشاسىنا شاڭ جۇقپاي كەلگەن كيەلى ونەرىمىزدىڭ تارلانبوزدارى بۇگىنگى كۇنى دە ءوز باپتارىندا ەكەنىن تانىتا ءبىلدى. جالپى, رەسپۋبليكالىق ايتىسقا قاتىسقان اقىنداردىڭ قاي-قايسى دا تاۋەلسىزدىكتىڭ اكەلگەن تابىستارىن اشىپ كورسەتۋگە ۇمتىلدى. تاۋەلسىزدىكتىڭ ەل مەن حالىققا بەرگەن قۇندىلىقتارىن كەستەلى مارجان سوزدەرمەن كوركەمدەدى.
ءتۇر مەن مازمۇننىڭ ۇيلەسىمى تۇرعىسىنان العاندا «التىن دومبىرا» بايگەسىنىڭ ءباسى بيىك تۇر. ەڭ باستىسى, ايتىسكەرلەردىڭ العا قويىلعان تاقىرىپتى اشا بىلۋگە دەگەن ۇمتىلىستارى ءوز جەمىسى مەن ناتيجەسىن بەرگەنىن ايتۋدىڭ ءوزى ءبىر مەرەي. ءارى وسى ۇمتىلىس تۇتاستاي العاندا ايتىستىڭ دەڭگەيى مەن ءورىسىنىڭ جوعارى بولۋىنا اسەرىن تيگىزگەنى كامىل. جاساقتالعان قازىلار القاسىنىڭ قۇرامى دا ەسىمدەرى ەلگە كەڭىنەن تانىمال, تاۋەلسىزدىكتىڭ قادىر-قاسيەتىن جانە ەلىمىزدىڭ كەشەگىسى مەن بۇگىنگىسىن ءوز شىعارمالارىنا وزەك ەتىپ الا بىلگەن حالقىمىزدىڭ ايتۋلى تۇلعالارى ەكەنىن ايتۋ پارىز. بۇل رەتتە حالىق اقىندارى قونىسباي ءابىل مەن اسەلحان قالىبەكوۆا, مەملەكەتتىك سىيلىقتىڭ يەگەرلەرى قويشىعارا سالعارا ۇلى مەن قاجىعالي مۇقامبەتقاليەۆ, اقىن, «قۇرمەت» وردەنىنىڭ يەگەرى مەيىرحان اقداۋلەت, فيلولوگيا عىلىمدارىنىڭ دوكتورى جانات اسكەربەكقىزى جانە «التىن دومبىرا – 2014» بايقاۋىنىڭ جەڭىمپازى بالعىنبەك يماش ەسىمدەرىن ايتپاي كەتۋ ەش مۇمكىن ەمەس.
مادەنيەت جانە سپورت مينيسترلىگى تىلدەردى دامىتۋ جانە قوعامدىق ساياسي جۇمىستار كوميتەتىنىڭ توراعاسى قۋات بوراش باس بايگەنى جانداربەك بۇلعاقوۆقا تاپسىرعان ساتتە حالىقتىڭ ورىندارىنان تۇرىپ, قول سوعىپ قوشەمەت كورسەتۋى قازىلار مەن كورەرمەننىڭ پىكىرى ءبىر جەردەن شىققانىنىڭ دالەلى.
ەڭسەلى ەل بولۋدىڭ جولى قاي كەزدە دە وڭاي بولماعان. ەڭ الدىمەن ۇلت رۋحى اسقاق تۇسكەن جاعدايدا ەلدىكتىڭ تۋى بيىك بولماق. تاۋەلسىزدىك مەرەكەسى قارساڭىندا اقتوبەدە اياقتالعان رەسپۋبليكالىق اقىندار ايتىسىنىڭ باس جۇلدەسىن يەلەنگەن جانداربەك بۇلعاقوۆقا 3 000 000 تەڭگەنىڭ سەرتيفيكاتى تاپسىرىلدى. ءبىرىنشى ورىندى العان سىرىم اۋەزحانعا ەكى ميلليون تەڭگە بۇيىردى. بۇدان كەيىنگى جۇلدەلى ورىندار قاتارىنان كورىنگەن جانداربەك ناۋشابەك, سارا توقتامىسوۆا, اينۇر تۇرسىنباەۆا جانە اسەت دۇيسەباەۆتار دا تيىسىنشە اقشالاي سىيلىقتارعا يە بولدى. تاۋەلسىزدىك پەن رۋحاني جاڭعىرۋ تاقىرىبىن جىرعا قوسقان الامان ايتىستا بىردە-ءبىر اقىن سىي-قۇرمەتسىز قالعان جوق. مۇنى دا «التىن دومبىرا» بايگەسىنىڭ تاعى ءبىر ارتىقشىلىعى دەپ بىلەمىز.
تەمىر قۇسايىن, «ەگەمەن قازاقستان»
اقتوبە