مەملەكەت باسشىسىنىڭ اتىنا ۇلتتىق مەرەكەمىز – قازاقستان رەسپۋبليكاسىنىڭ تاۋەلسىزدىك كۇنىنە وراي حاتتار مەن جەدەلحاتتار كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى.
نۇرسۇلتان نازارباەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت مەملەكەتتەردىڭ باسشىلارىنان قۇتتىقتاۋ جەدەلحاتتارى كەلىپ ءتۇستى.
رەسەي فەدەراتسياسىنىڭ پرەزيدەنتى ۆلاديمير پۋتين ءوزىنىڭ قۇتتىقتاۋ جەدەلحاتىندا: «قازاقستان الەمدىك ارەنادا جوعارى بەدەلگە يە بولىپ, حالىقارالىق وزەكتى ماسەلەلەردى شەشۋگە, اسىرەسە بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە, سونداي-اق استانا پروتسەسى اياسىندا ەلەۋلى ۇلەس قوسىپ كەلەدى», دەپ اتاپ وتكەن.
قىتاي حالىق رەسپۋبليكاسىنىڭ توراعاسى سي تسزينپين ءوزىنىڭ قۇتتىقتاۋ جەدەلحاتىندا: ء«سىزدىڭ ەلىڭىز تاۋەلسىزدىگىن جاريالاعاننان كەيىنگى 26 جىل ىشىندە ساياسي تۇراقتىلىقتى قامتاماسىز ەتۋدە, ەكونوميكانى دامىتۋدا, حالىقتىڭ ءومىرىن جاقسارتۋدا جانە مەملەكەتتىڭ حالىقارالىق بەدەلىن كوتەرۋدە زور جەتىستىككە جەتتى. سونداي-اق مەملەكەت قۇرۋ ىسىندە دە ايتارلىقتاي تابىسقا كەنەلدى», دەپ اتاپ كورسەتكەن.
تۇركيا پرەزيدەنتى رەجەپ تايپ ەردوعان قۇتتىقتاۋ حاتىندا قازاقستاننىڭ تۇركى الەمىنىڭ جارقىن وكىلى رەتىندەگى جەتىستىكتەرىن جوعارى باعالاپ, ەلىمىزدىڭ كەلەر جىلعى بۇۇ قاۋىپسىزدىك كەڭەسىندەگى توراعالىق قىزمەتىنە تابىس تىلەدى.
امەريكا قۇراما شتاتتارىنىڭ پرەزيدەنتى دونالد ترامپ قۇتتىقتاۋ حاتىندا: «قازاقستان تاۋەلسىزدىك العاننان بەرگى 26 جىل بويى امەريكا قۇراما شتاتتارى ەلدەرىڭىزدىڭ ەگەمەندىگىن, تاۋەلسىزدىگىن جانە اۋماقتىق تۇتاستىعىن مويىنداپ كەلەدى. قازاقستان رەسپۋبليكاسىنىڭ بۇۇ قاۋىپسىزدىك كەڭەسىندەگى الداعى توراعالىعى مەن ەنەرگەتيكا سالاسىنداعى ىنتىماقتاستىق ارقىلى ەكى ەل اراسىنداعى ەكونوميكالىق بايلانىستار نىعايا تۇسەدى دەپ ويلايمىز», دەپ اتاپ وتكەن.
وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ قازاقستاننىڭ حالىقارالىق بەدەلىنىڭ نىعايۋىنا سەپتىگىن تيگىزگەن ەلىمىزدىڭ جاھاندىق جانە وڭىرلىك باستامالارىنا جوعارى باعا بەرىپ, ەكى مەملەكەت اراسىنداعى تاتۋ كورشىلىك ىنتىماقتاستىقتىڭ ودان ءارى دامي بەرەتىنىنە سەنىم ءبىلدىردى. پولشا رەسپۋبليكاسىنىڭ پرەزيدەنتى اندجەي دۋدا مەملەكەت باسشىسىنىڭ اتىنا جولداعان قۇتتىقتاۋ حاتىندا «استانا ەكسپو-2017» حالىقارالىق مامانداندىرىلعان كورمەسىنىڭ جوعارى دەڭگەيدە وتكىزىلگەنىن اتاپ ءوتىپ, پولشانىڭ وعان بەلسەندى قاتىسۋى ساۋدا جانە ينۆەستيتسيا سالالارىنداعى بايلانىستارىمىزدىڭ جاندانا تۇسۋىنە جانە قازاقستانداعى سەرىكتەستەر ءۇشىن ۇسىنىلعان يننوۆاتسيالىق جانە باسەكەلى شەشىمدەردى پايدالانۋعا مۇمكىندىك بەرەتىنىن ايتتى.
فرانتسيا پرەزيدەنتى ەمانۋەل ماكرون قۇتتىقتاۋىندا: «بىرنەشە اپتادان كەيىن ءسىزدىڭ ەلىڭىزدىڭ بۇۇ قاۋىپسىزدىك كەڭەسىندەگى توراعالىعى باستالادى. فرانتسيا سىزدەر قويىپ وتىرعان كۇن تارتىبىندەگى ماسەلەلەرگە ەرەكشە نازار اۋدارىپ, ونى تالقىلاۋعا بەلسەندى تۇردە قاتىسادى», دەپ اتاپ وتكەن.
سونداي-اق مەملەكەت باسشىسى مەن قازاقستان حالقىن بەلگيا كورولى فيليپپ, يسپانيا كورولى VI فەليپە, ساۋد ارابياسىنىڭ كورولى سالمان بەن ابدەل ءازيز ءال ساۋد, ۆەنگريا پرەزيدەنتى يانوش ادەر, ءۇندىستان پرەزيدەنتى رام ناتح كوۆيند, بىرىككەن اراب امىرلىكتەرى پرەزيدەنتى حاليفا بەن زايد ءال ناھايان, پاكىستان پرەزيدەنتى مامنۋن حۋسەين, سلوۆاكيا رەسپۋبليكاسىنىڭ پرەزيدەنتى اندرەي كيسكا, ۋكراينا پرەزيدەنتى پەتر پوروشەنكو, حورۆاتيا پرەزيدەنتى كوليندا گرابار-كيتاروۆيچ, ساۋد ارابياسى كورولدىگىنىڭ تاق مۇراگەرى, مينيسترلەر كەڭەسى توراعاسىنىڭ ورىنباسارى, قورعانىس ءمينيسترى مۇحاممەد بەن سالمان بەن ابدەل ءازيز ءال ساۋد, بىرىككەن اراب امىرلىكتەرىنىڭ ۆيتسە-پرەزيدەنتى, پرەمەر-ءمينيسترى, دۋباي امىرلىگىنىڭ بيلەۋشىسى, شەيح مۇحاممەد بەن راشيد ءال ماكتۋم, بىرىككەن اراب امىرلىكتەرى قارۋلى كۇشتەرى جوعارعى باس قولباسشىسىنىڭ ورىنباسارى شەيح مۇحاممەد بەن زايد ءال ناھايان تاۋەلسىزدىك كۇنى مەرەكەسىمەن قۇتتىقتاپ, باق-بەرەكە تىلەپ, ەلىمىزدىڭ ءوسىپ-وركەندەۋىنە نيەتتەستىك ءبىلدىردى.