اقش سەناتى سوڭعى 30 جىلداعى سالىق رەفورماسى جايلى ەڭ ءىرى زاڭ جوباسىن ماقۇلدادى. وسىعان دەيىن اتالعان جوبانى وكىلدەر پالاتاسى قولداعان بولاتىن.
«داۋىس بەرۋ بارىسىندا 51 ادام قولداعان بولسا, 48-ءى قارسى شىقتى. سالىقتى قىسقارتۋ تۋرالى زاڭ قابىلداندى», – دەدى اقش ۆيتسە-پرەزيدەنتى مايك پەنس.
داۋىس بەرۋ ناتيجەسى شىققانعا دەيىن سەنات عيماراتىندا نارازىلىق اكتسياسى ءوتتى. سالدارىنان كۇزەتشىلەر قاتىسۋشىلاردى سىرتقا شىعارۋعا ءماجبۇر بولدى.
سەناتتاعى دەموكراتتاردىڭ كوشباسشىسى چاك شۋمەر رەپۋبليكالىقتاردىڭ مۇنداي قولايسىز زاڭ ءۇشىن كەلەسى جىلى سايلاۋدا جاۋاپ بەرەتىنىن ەسكەرتتى. «زاڭنىڭ تۇپكى ءمانى مەن ساۋالناماسى سونداي ناشار, ءتىپتى كەلەر جىلى رەسپۋبليكالىقتاردىڭ وزدەرى داۋىس بەرىپ, قولداعاندارى ءۇشىن ۇيالاتىن بولادى», – دەدى شۋمەر.
وسىعان دەيىن رەسپۋبليكالىق پارتيانىڭ 12 مۇشەسى مەن وكىلدەر پالاتاسىنداعى دەموكراتتاردىڭ ءبارى زاڭ جوباسىن قولداماعان بولاتىن. الايدا داۋىس بەرۋ ناتيجەسىندە 227 ادام قولداپ, 203-ءى قارسى شىقتى. «بۇگىن ءبىز ەل تۇرعىندارىنا ءوز اقشاسىن قايتارىپ بەرەمىز. ءتۇپتىڭ تۇبىندە بۇل ولاردىڭ ماڭداي تەرىمەن تاپقان ادال اقشاسى», – دەيدى رەسپۋبليكالىق پول رايان.
سارسەنبى كۇنى, ياعني 20 جەلتوقساندا قۇجاتتار تۇپكىلىكتى ماقۇلداۋ ءۇشىن وكىلدەر پالاتاسىنا جىبەرىلدى. ەگەر زاڭ جوباسى قولدانىسقا ەنەر بولسا, دونالد ترامپتىڭ العاشقى ءىرى جەڭىسى بولماق.
ايتا كەتەيىك, قۇجاتتا كورپوراتيۆتىك سالىقتى 35 پايىزدان 20 پايىزعا دەيىن شەكتەۋسىز تومەندەتۋ قاراستىرىلعان. بولاشاقتا امەريكالىق كومپانيالاردىڭ شەتەلدىك كىرىس كوزى تولىقتاي سالىقتان بوساتىلماق. سونداي-اق, ءتۇرلى دەڭگەيدەگى كىرىس كوزى بار امەريكالىقتاردىڭ باسىم بولىگىنە 2026 جىلعا دەيىن سالىق جەڭىلدىكتەرى قاراستىرىلعان.
زاڭ جوباسىنا قارسى شىققانداردىڭ كەيبىرى Obamacare باعدارلاماسى ارقىلى سالىق تولەۋشىلەردىڭ كوبى مىندەتتى ساقتاندىرۋ قۇجاتىنان بوساتىلاتىنىن العا تارتتى.
اقش كونگرەسى بيۋدجەت باسقارماسىنىڭ ەسەپتەۋىنشە بۇل شارا ساقتاندىرۋ سىيلىقاقىلارىنىڭ ارتۋىنا اكەلەدى. سونىمەن قاتار 13 ملن ادامدى 2027 جىلعا قاراي ساقتاندىرۋ قۇجاتىنسىز قالدىرادى.
دايىنداعان ايان ءابدۋالي, «ەگەمەن قازاقستان»