استاناداعى «ەسىل» قوناق ءۇيىنىڭ ءماجىلىس زالىندا اۋىل شارۋاشىلىعى ءمينيسترىنىڭ ورىنباسارلارى نۇرجان التاەۆ پەن رۋسلان قۇرمانوۆ اگرارلىق سالا تاقىرىبىندا قالام تەربەيتىن جۋرناليستەرمەن سەمينار وتكىزدى.
ۆيتسە-مينيسترلەردىڭ ايتۋىنشا, ەلىمىزدىڭ اۋىل شارۋاشىلىعى سالاسى مەملەكەت باسشىلىعىنىڭ ەرەكشە نازارىندا تۇر. وسىعان ساي سالانى دامىتۋ باعىتىندا سوڭعى كەزدەرى بىرنەشە قۇجاتتار قابىلداندى. سونىڭ ءبىرى – اگروونەركاسىپتىك كەشەندى دامىتۋ كارتالارى. وكىنىشكە وراي, جۋرناليستەردىڭ بىرقاتارى بۇل كارتالاردىڭ ءمانى مەن ماڭىزىن, جالپى اۋىل شارۋاشىلىعى سالاسىندا ءجۇرىپ جاتقان وزگەرىستەردى تولىق ءتۇسىنىپ بولماعان سەكىلدى. سەبەبى, بۇقارالىق اقپارات قۇرالدارىندا جاريالانىپ جاتقان كەيبىر حابارلار مەن ماقالالاردا قاتە تۇسىنىكتەر دە كەزدەسىپ قالادى.
سوندىقتان سەميناردىڭ باستى ماقساتى جۋرناليستەرگە كەڭ كولەمدى اقپارات بەرە وتىرىپ, جۇرگىزىلىپ جاتقان جۇمىستار بويىنشا اۋىل شارۋاشىلىعى مينيسترلىگىنىڭ ۇستانىمىن ءتۇسىندىرۋ بولىپ وتىر.
ۆيتسە-مينيسترلەر اۋىل شارۋاشىلىعىنىڭ ءاربىر باعىتى بويىنشا قابىلدانىپ وتىرعان كارتالاردا كوتەرىلگەن ماسەلەلەر, سالادا قالىپتاسقان پروبلەمالار مەن ولاردى شەشۋ جولدارى تۋرالى اڭگىمەلەدى. سەمينار جۋرناليستەر سۇراقتارىنا جاۋاپ بەرۋ جانە ەركىن پىكىر الماسۋ تۇرىندە ءوربىدى. سەمينارعا اۋىل شارۋاشىلىعى مينيسترلەرى وكىلدەرىنىڭ جاقسى دايىندىقپەن كەلگەنى اڭعارىلدى. ۆيتسە-مينيسترلەر سەمينار بارىسىندا «ەگەمەن قازاقستان» گازەتىنىڭ ءجۋرناليسى كوتەرگەن ماسەلەلەرمەن كەلىسە وتىرىپ, وسى بويىنشا مينيسترلىكتىڭ قولعا الىپ جاتقان جۇمىستارىن جان-جاقتى بايانداپ بەردى. وزدەرىنىڭ جۋرناليستەرمەن مۇنداي سەميناردى ودان ءارى جالعاستىرۋعا, پىكىر الماسۋعا دايىن ەكەندىكتەرىن ءبىلدىردى.
سۇڭعات ءالىپباي,
«ەگەمەن قازاقستان»