14-15 جەلتوقساندا قر ەنەرگەتيكا ءمينيسترى قانات بوزىمباەۆتىڭ باسشىلىعىمەن قازاقستاندىق دەلەگاتسيا ۆاشينگتوندا ىسساپارمەن بولدى. ول جەردە قازاقستان-امەريكان ەنەرگەتيكالىق ارىپتەستىگى ماسەلەلەرىنىڭ كەڭ سپەكترىن تالقىلاۋ بويىنشا بىرقاتار كەزدەسۋ وتكىزدى, دەپ حابارلايدى قر ەم ءباسپاسوز قىزمەتى.
اتاپ ايتقاندا ءىس-ساپار شەڭبەرىندە اقش ەنەرگەتيكا ءمينيسترى ر. پەرريمەن, اقش مەملەكەتتىك حاتشىسىنىڭ ەنەرگەتيكالىق رەسۋرستار بويىنشا كومەكشىسىنىڭ ورىنباسارى دج.ماككارريكپەن, «شەۆرون» كومپانياسىنىڭ ەۋروپا, ەۋرازيا جانە تاياۋ شىعىس بويىنشا پرەزيدەنتى ت.لەۆينمەن, «گرەيس» كومپانياسىنىڭ ۆيتسە-پرەزيدەنتى ك. كوۋلمەن, «پاركەر دريللينگ» بۇرعىلاۋ كومپانياسىنىڭ پرەزيدەنتى ب. كوللينسپەن جانە باسقا دا اتوم مەن مۇناي-گاز سالالارىنداعى ءىرى امەريكالىق كومپانيالاردىڭ باسشىلارىمەن كەزدەسۋلەر ءوتتى.
بۇدان باسقا, امەريكالىق-قازاقستاندىق ىسكەرلىك قاۋىمداستىقپەن كەزدەسۋ ۇيىمداستىرىلدى. وندا قاۋىمداستىقتىڭ پرەزيدەنتى ۋ. كورتني, مەملەكەتتىك حاتشىنىڭ وڭتۇستىك جانە ورتالىق ازيا بويىنشا كومەكشىسىنىڭ ورىنباسارى گ. ەنشەر, امەريكالىق كومپانيالاردىڭ باسشىلارى ءسوز سويلەدى.
اتالعان ءىس-شارانىڭ اياسىندا ەنەرگەتيكا سالاسىنداعى بەلگىلى ساراپشى د. ەرگينمەن كەزدەسۋ ءوتتى. كەزدەسۋ بارىسىندا 2018 جىلدىڭ ناۋرىز ايىندا حيۋستون قالاسىندا وتەتىن «CERAWEEK» حالىقارالىق مۇناي-گاز كونفەرەنتسياسىنا قازاقستاندىق تاراپتىڭ قاتىسۋ ىقتيمالدىلىعى تالقىلاندى.
جالپى, قازاقستاندىق دەلەگاتسيانىڭ اقش-قا ءىسساپارى ەكىجاقتى ساياسي-ەكونوميكالىق ىنتىماقتاستىقتىڭ اسا ماڭىزدى سالاسىندا مەملەكەت باسشىسىنىڭ الداعى اقش-قا ءىسساپارىن مازمۇندى تولىقتىرۋ مۇمكىندىگىن قاراستىردى.