فرانتسيا ۇلتتىق اسسامبلەياسىنىڭ دەپۋتاتتارى قازاقستان رەسپۋبليكاسى مەن ەۋروپا وداعى اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى (كاىتك) راتيفيكاتسيالاۋعا داۋىس بەردى, دەپ حابارلادى ءسىم ءباسپاسوز قىزمەتى.
فرانتسۋز پارلامەنتى تومەنگى پالاتاسىنىڭ كاىتك-نى راتيفيكاتسيالاۋ پروتسەسىنە «فرانتسيا-قازاقستان» پارلامەنتارالىق دوستىق توبىنىڭ توراعاسى پەر كابارەنىڭ باسشىلىعىمەن ەرەكشە ۇلەس قوستى.
ۇلتتىق اسسامبلەيادا ءسوز سويلەگەندە پ. كابارە قازاقستان فرانتسيانىڭ ساياسي, سول سياقتى ەكونوميكا سالالارىنداعى ماڭىزدى ارىپتەسى بولىپ تابىلاتىنىن اتاپ وتكەن. استانا دەموكراتيالاندىرۋ سالاسىندا وڭ ءۇردىس كورسەتۋدە, قوعام دامۋىنىڭ جانە ادام قۇقىقتارىن قورعاۋدىڭ ەلەۋلى ىلگەرىلەۋىنە قول جەتكىزدى, داعدارىستى رەتتەۋ ماسەلەلەرى مەن بىتىمگەرشىلىك قىزمەتتىڭ بەلسەندى قاتىسۋشىسى بولىپ تابىلادى. يادرولىق كارۋدان باس تارتا وتىرىپ, قازاقستان دەنۋكلەاريزاتسيالاۋ پروتسەسىنە قاتىسادى.
«ۆپەرەد رەسپۋبليكا!» پارتياسى توبىن ءبىلدىرۋشىسى پ.كابارەنىڭ پىكىرىنشە, پاريج ساياسي ديالوگتى دامىتۋ ماسەلەلەرى بويىنشا استانامەن ىنتىماقتاستىقتى كەڭەيتۋ قاجەت. اسىرەسە, قاۋىپسىزدىكتى قامتاماسىز ەتۋ, قاقتىعىستاردى بولعىزباۋ جانە تەرروريزممەن كۇرەسۋ سالالارىنداعى ىنتىماقتاستىق. سونىمەن بىرگە, ول كەلىسىمنىڭ ەكونوميكالىق سالادا تۇراقتى ءوزارا ارەكەتتەستىگى جاساۋدى بىلدىرەتىنىن, فرانتسيا قازاقستاننىڭ شاما بويىنشا ءۇشىنشى ينۆەستورى بولىپ تابىلاتىنىن اتاپ ءوتتى.
قازاقستان ورتالىق ازيادا 2015 جىلعى جەلتوقساندا ەو-مەن وسىنداي شارت جاساسقان العاشقى ەل بولىپ تابىلادى. ول ارىپتەستىكتىڭ 29 سالاسىن, ونىڭ ىشىندە ەكونوميكا جانە ساۋدا-ساتتىق, دەنساۋلىق, مەملەكەتتىك قارجىنى باسقارۋ جانە سالىق سالۋ, جاپپاي قىرىپ-جويۋ قارۋىن تاراتۋعا جانە تەرروريزمگە قارسى ءىس-قيمىل جاساۋ, كليمات وزگەرىستەرىمەن كۇرەسۋدى قامتيدى.
فرانتسيامەن قاتىناسىنىڭ ايرىقشا سيپاتى ونىڭ ەۋروپا وداعى ەلدەرىنىڭ ىشىندە قازاقستانمەن ستراتەگيالىق ارىپتەستىك تۋرالى شارتتى جاساسقان العاشقى ەل بولۋىمەن ەرەكشەلەنىپ, 2018 جىلى استانا مەن پاريج وسىنداي ارىپتەستىكتىڭ ونجىلدىعىن اتاپ وتەدى.