كەڭەس وداعى كەزىندە داستۇرگە اينالعان بولاشاق ۇرپاققا ۇندەۋ حات قالدىرۋدى سولتۇستىك قازاقستان گەولوگيا باسقارماسىنىڭ ۇجىمى دا ورىنداعان ەكەن.
قوستانايداعى گەولوگيالىق مۋزەيدە حح عاسىر گەولوگتارىنىڭ ءححى عاسىرداعى ارىپتەستەرىنە جازعان حاتى سالىنعان كاپسۋلا – «تاس ساندىقشانى» اشۋ ءراسىمى ءوتتى. ولار 1967 جىلى 7 جەلتوقساندا كەن جىنىسىندا كەزدەسەتىن كالتسيفير, رودينگيت, پورفيريت سياقتى تاستاردان كريستالل مولەكۋلاسى فورماسىندا ساندىقشا جاساپ, ونى ءمارمار تاستىڭ ۇستىنە ورناتىپ, سىرتىنا «گەولوگتاردىڭ بولاشاق ۇرپاقتارىنا. 2017 جىلى اشىلسىن» دەپ جازعان ەكەن. ال ىشىنە ۇندەۋ-حات پەن ءوڭىردىڭ پايدالى قازبالار كارتاسى سالىنىپتى. جينالعان سالا ارداگەرلەرى مەن جاس گەولوگتار الدىندا «سەۆكازنەدرا» ايماقارالىق دەپپارتامەنتى جەتەكشىسىنىڭ ورىنباسارى تالعات يساسەيىتوۆ كاپسۋلانى اشىپ, گەولوگتاردىڭ اعا ۇرپاعىنىڭ كەيىنگىگە وسيەتىن وقىپ بەردى. حات اعا ۇرپاقتىڭ سالەمىن, وتكەن عاسىردىڭ ورتاسىندا جەتكەن جەتىستىكتەرىن, بولاشاق ۇرپاققا , ماماندارعا سەنىمىن بايانداعان ءۇش بولىمنەن تۇرادى.
– پايدالى قازبالار كەنىشتەرىنىڭ ارقاسىندا وڭىردە رۋدنىي, ليساكوۆ, ارقالىق, جىتىقارا قالالارى ءوسىپ شىقتى. تاعى دا كوپتەگەن كەنىشتەر اشىلدى. سولارعا وسى حات يەلەرىنىڭ ەڭبەگى زور بولاتىن, – دەيدى گەولوگيا ارداگەرى, گەولوگيا مۋزەيىنىڭ ديرەكتورى ۆەرا ەدىگەنوۆا.
– وتكەن جىلدار گەولوگيانىڭ «اتىن عاسىرى» ەدى. ءبىز ساپاسى وتە جوعارى مينەرال شيكىزاتىن وتە كوپ كولەمدە اشىپ, ءوندىرىپ وتىردىق. ۆاسيلكوۆ كەنىشىنىڭ وزىنەن 350 توننا تازا التىن ءوندىرىلدى. كەڭەس وداعى كەزىندە گەولوگيا ىسىنە جۇمسالعان 1 رۋبل 50 ءرۋبلدىڭ پايداسىن بەردى. گەولوگيالىق جۇمىستاردىڭ تيىمدىلىگى دەگەن وسى! – دەپ اتاپ ءوتتى قر مينەرالدىق رەسۋرستار اكادەمياسى سولتۇستىك قازاقستان بولىمشەسىنىڭ توراعاسى ۆيكتور دەينەكا.
حاتتا «تورعاي دالاسى ءححى عاسىردا ءوندىرىسى, اۋىل شارۋاشىلىعى دامىعان, قالالار مەن اۋىلدارى كوركەيگەن, گۇلدەنگەن ءوڭىر بولاتىنىنا سەنەمىز» دەپ جازىپتى حح عاسىردىڭ گەولوگتارى. ء ححى عاسىر ەندى باستالدى, مۇمكىن اعا ۇرپاق وكىلدەرىنىڭ بولجامى مەن سەنىمى شىندىققا اينالار ۋاقىت تا جەتەر.
– گەولوگيا ۇرپاقتان ۇرپاققا جالعاسىپ وتىرۋى ءتيىس. ءبىزدىڭ الدىمىزداعى گەولوگيا سالاسى ماماندارىنىڭ قاجىرلى ءىسى بولماعاندا ءبىزدىڭ جەتىستىكتەرگە جەتۋىمىز ەكىتالاي ەدى. گەولوگيا ىسىنە قاي زاماندا دا ەرەكشە كوڭىل ءبولىنۋى ءتيىس, – دەدى گەولوگيا عىلىمدارىنىڭ دوكتورى نيزامي جافاروۆ. ءداستۇر جالعاسىن تاپتى. قازاقستاننىڭ سولتۇستىگى ءوڭىرى گەولوگتارى اتىنان كەلەشەك ۇرپاققا تاعى دا حات جازىلىپ, الگى كاپسۋلاعا قايتا سالىندى. ول ەندى 50 جىلدان كەيىن, 2067 جىلى اشىلاتىن بولادى.
ءنازيرا جارىمبەت
«ەگەمەن قازاقستان»
قوستاناي