سيريادا ۇرىس ءىس-قيمىلدارىن توقتاتۋ رەجيمىنە كەپىلدىك بەرۋشى ەلدەردىڭ دەلەگاتسيالارى 21-22 جەلتوقساندا وتەتىن كەلىسسوزدەردىڭ كەلەسى راۋندىنا قاتىسۋ ماقساتىندا استاناعا كەلۋدە, دەپ حابارلايدى سىرتقى ىستەر مينيسترلىگىنىڭ ءباسپاسوز قىزمەتى.
رەسەي دەلەگاتسياسىنا رف پرەزيدەنتىنىڭ سيريا بويىنشا ارنايى وكىلى الەكساندر لاۆرەنتەۆ, تۇركيا دەلەگاتسياسىنا سىرتقى ىستەر ءمينيسترىنىڭ ورىنباسارى سەدات ونال, يران دەلەگاتسياسىنا سىرتقى ىستەر ءمينيسترىنىڭ ورىنباسارى حۋسەين دجابەري انساري باسشىلىق ەتەدى.
سونداي-اق, الداعى كەزدەسۋگە سيريا ۇكىمەتىنىڭ جانە سيريالىق وپپوزيتسيانىڭ, بۇۇ, باقىلاۋشى ەلدەر – اقش جانە يوردانيانىڭ وكىلدەرى قاتىسادى. 21 جەلتوقساندا كوپجاقتى كونسۋلتاتسيالاردىڭ ءوتۋى كوزدەلۋدە. جالپى وتىرىس 22 جەلتوقسانعا جوسپارلانعان.