تاۋەلسىزدىك كۇنىنە وراي استاناداعى ەلباسى كىتاپحاناسىندا مەملەكەت باسشىسى نۇرسۇلتان نازارباەۆتىڭ «تاۋەلسىزدىك ءداۋىرى» اتتى جاڭا كىتابىنىڭ سالتاناتتى تۇساۋكەسەر ءراسىمى وتۋدە. پرەزەنتاتسيانى جۇرگىزگەن «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد جاڭا كىتاپتى پرەزيدەنت ءوز قولىمەن جازعان تاۋەلسىزدىك ەنتسيكلوپەدياسى دەپ باعالادى.
ەلىمىزدىڭ ەڭ ۇلىق مەرەكەسى – تاۋەلسىزدىك مەرەكەسىمەن قۇتتىقتاعان «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد جاڭا كىتاپقا ەرەكشە باعاسىن بەردى.
«تاۋەلسىزدىك ءداۋىرى» – ەلباسىنىڭ جۇرەك تورىندە ساقتاعان, تۇماداي تۇندىرىلعان تۇنىق سىرلارى, وي تولعانىمدارى توپتاستىرىلعان كىتاپ. وندا 30 جىلدىق كەيىنگى تاريحىمىز قامتىلعان. جاڭا كىتاپ – قازاقستان رەسپۋبليكاسىنىڭ نەگىزىن قالاعان تۇڭعىش پرەزيدەنتىمىزدىڭ ءوز قولىمەن جازىلعان تاۋەلسىزدىك ەنتسيكلوپەدياسى», دەدى مۇحتار قۇل-مۇحاممەد.
قازاقستاننىڭ بۇگىندە ىرگەسى بەرىك, ىنتىماعى جاراسقان, ەكونوميكاسى قۋاتتى, ساياسي جۇيەسى سارالانعان, ءوز جولىن, ءوز بولاشاعىن ايقىنداعان, الەمدىك قاۋىمداستىق الدىنداعى بەدەلى بيىك, ءۇش بىردەي جاڭعىرۋدى ويداعىداي وتكىزە بىلگەن ابىرويلى مەملەكەت ەكەنىن ايتقان پارتيا توراعاسىنىڭ ءبىرىنشى ورىنباسارى تاۋەلسىزدىك زامانى قازاقستان ءۇشىن عاسىرلار جۇگىن ارقالاعان عالامات ءداۋىر ەكەنىن ايتتى.
«الدارىڭىزداعى كىتاپ – ەلباسىنىڭ ءبارىمىز ءۇشىن ەڭ قاسيەتتى قۇندىلىق سانالاتىن تاۋەلسىزدىك تۋرالى وي-تولعامدارىنىڭ جيىنتىعى. ەندەشە بۇل كوپ ۇزاماي-اق بارشا قازاقستاندىقتاردىڭ ءسۇيىپ وقيتىن كىتابىنا اينالارىنا كامىل سەنەمىن», دەدى م.قۇل-مۇحاممەد.
تاريحي پۋبليتسيستيكا جانرىندا جازىلعان, قازاق جانە ورىس تىلدەرىندە باسىلعان كىتاپتا ەگەمەن مەملەكەتتىڭ نەگىزى قالانعان كۇننەن باستاپ ونىڭ قالىپتاسۋ كەزەڭدەرىنىڭ ەرەكشەلىكتەرى مەن تاۋەلسىزدىك داۋىرىندەگى ىشكى جانە سىرتقى سىن-قاتەرلەردى ەڭسەرۋگە بايلانىستى قابىلدانعان شەشىمدەردىڭ ءمان-مازمۇنى مەن تەتىكتەرى ەگجەي-تەگجەيلى باياندالادى.
كىتاپتىڭ تۇساۋكەسەر راسىمىنە پارلامەنت دەپۋتاتتارى, قوعام قايراتكەرلەرى, «نۇر وتان» پارتياسىنىڭ باسشىلىعى مەن مۇشەلەرى, عىلىم, زيالى قاۋىم, اقپارات قۇرالدارى جانە جاستار ۇيىمدارىنىڭ وكىلدەرى, ساراپشىلار مەن ستۋدەنتتەر قاتىستى.
مايگۇل سۇلتان, «ەگەمەن قازاقستان»