بۇگىنگى تاڭدا ءبىزدىڭ ازاماتتارىمىز بانكوماتتارداعى ەسەپشوتتارىنان اقشا جوعالتۋ سەكىلدى ەلەۋلى ماسەلەگە دە تاپ بولىپ وتىر. قازىر اقشانىڭ ءبارى بانكوماتتاردا ساقتالاتىندىقتان, بۇل ماسەلەگە تياناقتى نازار اۋدارۋىمىز كەرەك.
ال كەيبىر شەتەلدەردە ءبىزدىڭ ازاماتتارىمىزدىڭ كارتوچكالارىنان اقشا ۇرلاۋدىڭ جولدارىن دا الاياقتار تاۋىپ الىپتى. قازىر ونداي ەلدەردىڭ تىزىمدەرى دە جاسالعان. بىراق ءبىزدىڭ بانكتەرىمىز وزدەرىنىڭ كليەنتتەرىنە كارتوچكالار تابىس ەتكەندە مۇنداي ماسەلەلەردى ايتىپ, قۇلاقتاندىرۋدى بىلمەيدى. سونىڭ سالدارىنان ازاماتتارىمىز ساندارىن سوعىپ, كەيبىر شەتەلدەردە اقشالارىنان ايرىلىپ قالىپ جاتىر. مىسالى, بىلتىر ۆەتنامعا بارعان ورال قالاسىنىڭ ءبىر ازاماتى ەلگە كەلگەندە كارتوچكاسىنان 400 مىڭ تەڭگەنىڭ قولدى بولعانىن كورىپ, سانىن ءبىر-اق سوققان. سونداي جاعداي تايلاندقا بارعان ءبىر قىزىمىزدىڭ دا باسىنان وتكەن. ول ءوزىنىڭ 300 مىڭ تەڭگەسىنەن ايرىلعانىن ەلگە كەلگەن سوڭ ءبىر-اق بىلگەن. ال بانكتەر وكىنىشتە قالعان ءوز كليەنتتەرىن قولداۋدى بىلمەيدى, تاۋەكەلى جوعارى ەلدەرگە بارعاندا ساقتىق شارالارىن جاساماعان وزدەرى كىنالى دەپ ات-توندارىن الا قاشادى. بىزدىڭشە مۇنداي پوزيتسيا دۇرىس ەمەس. ويتكەنى بانكتەر تولەم كارتالارىنا قىزمەت جاساعاندارى ءۇشىن جىل سايىن كوميسسيالىق اقىلار الىپ تۇرادى. ەكىنشىدەن, بانكپەن كەلىسىمشارت جاساسقاندا كليەنتتىڭ ءالسىز تاراپ ەكەندىگى ەسكەرىلىپ, تولەم كارتالارىنا الاياقتىق شابۋىل جاسالعانى ءۇشىن ماتەريالدىق شىعىننىڭ وتەمىن بانك تولەۋى كەرەك. ۇشىنشىدەن, بۇگىنگى تاڭدا بانكتەر وزدەرىنىڭ اقپاراتتىق جۇيەسىن كيبەرشابۋىلداردان قورعاۋعا وراسان زور قاراجاتتار ءبولىپ جاتادى. سول سياقتى كليەنتتەرىنىڭ تولەم كارتالارىنىڭ ساقتىعى ءۇشىن دە شىعىن شىعارعانى ارتىق بولمايدى.
قازىر سكيممينگ دەپ اتالاتىن الاياقتىقتىڭ جاڭا ءتۇرى شىقتى. ول ادامنىڭ تولەم كارتوچكالارىنداعى بارلىق اقپاراتتى وقىپ الادى. سوسىن سونىڭ كومەگىمەن اقشاسىن ۇرلايدى. مۇندايلار اسىرەسە وڭتۇستىك-شىعىس ازيا مەن شىعىس ەۋروپا ەلدەرىندە ءورىس الىپ كەلەدى. ءبىزدىڭ ەلىمىزدە ودان قورعانۋدىڭ ادىستەرى جاسالماعان. وسىعان وراي ءبىز ۇلتتىق بانك توراعاسى د.اقىشەۆكە دەپۋتاتتىق ساۋال جولداپ, سكيممينگتىك قىلمىستىڭ سالدارىنان كارتوچكالارىنداعى اقشاسىنان ايرىلىپ قالاتىن كليەنتتەردىڭ وتەماقىسىن تولەۋى قاجەتتىگى جونىندە ارنايى ءتارتىپ ەنگىزۋدى ۇسىندىق. سوندا بانكتەرىمىز ءوز كليەنتتەرىنىڭ الاياقتاردان قالاي قورعانۋى كەرەكتىگىن ءتۇسىندىرىپ وتىرار ەدى.
سونىمەن قاتار بانكتەر قازاقستاندىقتاردىڭ جەكە دەرەكتەرىن ساقتاۋدى قامتاماسىز ەتۋ جولدارىن دا جەتىلدىرۋى كەرەك دەپ سانايمىز. ايتپەسە, جەكە دەرەكتەرگە قول جەتكىزگەن الاياقتاردىڭ بانكتەردەن ونلاين-كرەديتتەر الۋ ارقىلى قارىزعا باتىرىپ كەتەتىن جاعدايلارى جيىلەپ كەلە جاتقانى جاسىرىن ەمەس. ءوزىمىزدىڭ ساۋالىمىزدا ءبىز وسى ماسەلەگە دە نازار اۋدارۋدى سۇرادىق.
شاكىر حاحازوۆ, ءماجىلىس دەپۋتاتى