جاقىندا «نازارباەۆ ورتالىعىندا» تۇڭعىش پرەزيدەنت – ەلباسى قورىنىڭ سىيلىعىنا ارنالعان ۇزدىك قازاق ءتىلدى ينتەرنەت سايت بايقاۋىنىڭ جەڭىمپازدارى ماراپاتتالدى.
بايقاۋ ءۇشىنشى رەت ۇيىمداستىرىلىپ وتىر. وعان كەمىندە ءبىر جىل بويى تۇراقتى جۇمىس ىستەيتىن, مەملەكەتتىك تىلدە اقپارات تاراتاتىن, تاۋەلسىز قوعامدىق سايتتار قاتىستى. كونكۋرستىڭ ماقساتى – ۇزدىك قازاق ءتىلدى رەسۋرستاردى انىقتاۋ, ولاردىڭ سانى مەن ساپاسىن ارتتىرۋعا ۇلەس قوسۋ.
القالى جيىنعا تۇڭعىش پرەزيدەنت – ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ, ءماجىلىس دەپۋتاتى باقىتبەك سماعۇل, تىلدەردى دامىتۋ جانە قوعامدىق-ساياسي جۇمىس كوميتەتى توراعاسىنىڭ ورىنباسارى عالىمجان مەلدەش, سونداي-اق قوعامدىق ۇيىمداردىڭ جانە مەملەكەتتىك ورگانداردىڭ وكىلدەرى قاتىستى.
– بيىل جۇلدەمىز دە, قاتىسۋشىلار سانى دا ارتتى. دەگەنمەن, نازار اۋداراتىن ماسەلەلەر دە جوق ەمەس. بيىل ەكى جۇلدەنى, ياعني «بالالارعا ارنالعان ۇزدىك مەملەكەتتىك ەمەس قازاق ءتىلدى سايت» جانە «ايماقتىق ۇزدىك مەملەكەتتىك ەمەس قازاق ءتىلدى سايت» اتالىمدارىنا جۇلدە بەرمەۋدى ءجون كوردىك. سەبەبى, ەلىمىزدە ءدال وسى اتالىمدارعا ساي كەلەتىن رەسۋرس جوق, – دەدى سالتاناتتى جيىندا ءسوز العان سۇلتان ايتجانوۆ.
كونكۋرسقا بارلىعى 33 ءوتىنىم ءتۇستى. قازىلار قۇرامى سايتتاردىڭ مازمۇنى, قازاق ءتىلى مەن ۇلتتىق قۇندىلىقتاردىڭ دارىپتەلۋى, پاتريوتتىق تاقىرىپتاردىڭ ءجيى قوزعالۋى, كوركەمدىگى سەكىلدى تالاپتار بويىنشا ۇزدىكتەردى انىقتادى.
قورىتىندىسىندا «وتكىر ءتىل» اتالىمى بويىنشا «zheruiyq.kz» پورتالى, «رۋحاني ازىق» اتالىمىندا «qamshy.kz» پورتالى, «تەرەڭ ىزدەنىس» اتالىمىندا «247media.kz», «شىنايى ءومىر» اتالىمىندا «kerekinfo.kz», «ويىن-ساۋىق» اتالىمىندا «baribar.kz», «جاستار الەمى» اتالىمىندا «zhasatyrau.kz» پورتالى جەڭىمپاز دەپ تانىلدى. سونداي-اق ۇيىمداستىرۋشىلار «سپورت تىنىسى» اتالىمىندا «ulttyqsport.kz» جانە «alzhan.kz», ء«بىلىم بۇلاعى» اتالىمىندا «kaz-tili.kz» مەن «qaztest.kz» سايتتارىن ۇزدىك دەپ تانۋدى ءجون كوردى.
ايان ءابدۋالي, «ەگەمەن قازاقستان»