تاراز قالاسىندا ورنالاسقان باۋىرجان مومىش ۇلى اتىنداعى №45 قازاق كلاسسيكالىق گيمنازياسى بۇگىندە رەسپۋبليكا بويىنشا الدىڭعى قاتارلى ءبىلىم وشاقتارىنىڭ بىرىنەن سانالادى. جىل سايىن جامبىل وبلىسى بويىنشا ۇلتتىق بىرىڭعاي تەستىلەۋدەن ۇزدىك كورسەتكىش كورسەتىپ كەلە جاتقان گيمنازيا دا وسى. تەك قانا ساپالى ءبىلىم بەرۋدى ماقسات ەتكەن ءبىلىم وشاعى بىرنەشە بۋىن ءبىلىمدى ازاماتتاردى تاربيەلەپ شىعاردى.
ەل گازەتىنىڭ بولاشاق ۇرپاقتىڭ ءبىلىمىن ەسەلەپ, كوزقاراسىن قالىپتاستىرۋدا ىقپالى ۇلكەن. وسى ورايدا «ەگەمەن قازاقستان» گازەتىنىڭ ۇزاق جىلدار بويى وڭىردەگى مەنشىكتى ءتىلشىسى بولىپ قىزمەت اتقارعان ارداگەر جۋرناليست ماقۇلبەك رىسداۋلەتپەن بىرگە اتالعان گيمنازياعا ارنايى ات باسىن بۇردىق. گيمنازيا ديرەكتورى فاريدا شورتانبەكوۆا اۋەلى ءبىلىم وشاعىمەن تانىستىردى. ماسەلەن, گيمنازيانىڭ جۇمىسىنا قاناعاتتانعان اتا-انالار ءبىلىم وشاعىنداعى 24 كابينەتتى 1,5 ميلليون تەڭگەگە تولىق اقپاراتتىق تەحنولوگيامەن جابدىقتاپ بەرىپتى. سونداي-اق 11 «ا» سىنىبىنىڭ اعىلشىن ءتىلى ساباعىنىڭ ءبىر توبىمەن دە كەزدەسىپ, سۇحباتتاسۋدىڭ ءساتى ءتۇستى. وسى سىنىپتا وقيتىن كاميلا زۋلفۋحاروۆا وتكەن وقۋ جىلىندا FLEX حالىقارالىق بايقاۋىنىڭ ناتيجەسى بويىنشا اقش-تا ءبىلىم الىپ كەلىپتى. سونىمەن قاتار نۇراي مومبەكوۆا دا بيىلعى وقۋ جىلىندا اتالعان مەملەكەتتە ءبىلىم الۋدا.
مۇندا 1991 جىلدان بەرى باۋىرجان مومىش ۇلى مۇراجايى جۇمىس ىستەيدى. مۇراجايدا «باتىرعا تاعزىم», «ازامات. قالامگەر. قاھارمان», « ۇلى وتان سوعىسى كەزىندە پايدالانىلعان زاتتار, ناگرادالار مەن اسكەري كيىمدەر ەكسپوناتتارى», «باۋىرجان تۋىندىلارى», «باۋىرجان – 100 جاستا» جانە «تاۋەلسىزدىككە – 25 جىل» دەپ اتالاتىن بولىمدەر بار. باتىردىڭ كوزى بولعان قۇندى جادىگەرلەردى مۇندا باتىردىڭ كەلىنى زەينەپ احمەتوۆا تاپسىرعان ەكەن.
پەداگوگيكالىق ۇجىممەن كەزدەسۋ بارىسىندا قالامگەر-جۋرناليست م.رىسداۋلەت باس گازەتتىڭ بۇگىنگى باعىتى تۋرالى پىكىرىن ءبىلدىردى. «عاسىرلىق تاريحى بار اتا باسىلىم – قازاق رۋحانياتىنىڭ قارا شاڭىراعى. مۇندا ساكەن سەيفۋللين, بەيىمبەت مايلين سياقتى الاش ارىستارىنان باستاپ, شەرحان مۇرتازا, ءابىش كەكىلباەۆ سياقتى ايگىلى جازۋشىلارعا دەيىن قىزمەت اتقارعان. بۇگىنگى تاڭدا باس گازەتىمىز ەل وقيتىن, حالىقتىڭ رۋحاني سۇرانىسىن قاناعاتتاندىراتىن دۇنيەلەردى كوپتەپ بەرۋىمەن ەرەكشەلەنەدى. ماسەلەن, «كوكەيكەستى», «ماسەلەنىڭ ءمانىسى» ايدارلارى حالىقتىق ماسەلەلەردى كوتەرسە, ء«وڭىر ءومىرى» ايدارى وڭىرلەردىڭ تىنىس-تىرشىلىگىن بەينەلەيدى. ال ۇستازدارعا ارنالعان ء«تالىم» بەتى ەلىمىزدىڭ ءار قيىرىنداعى ۇستازداردىڭ ويلارىن, جۇمىس تاجىريبەسى مەن يدەيالارىن جاريالايدى», دەپ اتاپ ءوتتى. سونداي-اق گيمنازيا ديرەكتورى ف.شورتانبەكوۆا ۇستازدارعا ارنالعان ء«تالىم» بەتى ءۇشىن رەداكتسيا باسشىلىعىنا ريزاشىلىعىن ءبىلدىردى. «ۇرپاق تاربيەلەۋدە ۇستازداردىڭ ەڭبەگى ەرەكشە. ۇستازدىق – ۇلى مىندەت. سوندىقتان دا ۇستازداردىڭ ۇلاعاتتى ويلارىن, ساباق ءوتۋ ءتاسىلىن, ءبىلىم سالاسىنداعى پىكىرلەرىن جاريالاعان باس باسىلىمنىڭ وقىرمانى كوپ. ەڭ باستىسى بۇل ەلىمىزدىڭ ءار قيىرىنداعى ۇستازداردىڭ ءبىر-بىرىمەن تاجىريبە الماسۋى ءۇشىن وتە قاجەت دۇنيە», دەدى ف.شورتانبەكوۆا.
سونىمەن قاتار ماتەماتيكا ءپانىنىڭ مۇعالىمى مۇرات قاسپاقوۆ, قازاق ءتىلى مەن ادەبيەتى ءپانىنىڭ مۇعالىمى قارلىعاش ەرعاراقىزى جانە گەوگرافيا ءپانىنىڭ مۇعالىمى راحىمجان المانبەتوۆ ءبىلىم بەرۋدىڭ جاڭا جۇيەسى جانە گازەتتىڭ جاڭارتىلعان مازمۇنى جونىندە ءوز ويلارىن ايتتى.
حاميت ەسامان, «ەگەمەن قازاقستان»
جامبىل وبلىسى