ءورتتىڭ جانە اقاۋلى جىلىتۋ پەشتەرىن قولدانۋ سالدارىنان ۋلى گازبەن ۋلانۋدىڭ الدىن-الۋ جانە بولدىرماۋ ماقساتىندا استانا قالاسى توتەنشە جاعدايلار دەپارتامەنتىنىڭ قىزمەتكەرلەرى جەكە تۇرعىن ءۇي سەكتورىندا اۋلا ارالاۋ جۇمىستارىن جۇرگىزىپ جاتىر دەپ حابارلايدى ەلوردا اكىمدىگىنىڭ مەديا ورتالىعى ۆەدومستۆونىڭ ءباسپاسوز قىزمەتىنە سىلتەمە جاساپ.
استانا قالاسى توتەنشە جاعدايلار دەپارتامەنتىنەن حابارلاعانداي, قىزمەتكەرلەر جەكە تۇرعىن ءۇي سەكتورىنداعى اۋلالاردى جۇمىس كۇندەرى ساعات 15-00 دەن 18-00 ارالىعىندا, سەنبى كۇنى ساعات 9-00 دەن 12-00 ارالىعىندا ارالايتىن بولادى. شارا ماقساتى ءورتتىڭ جانە اقاۋلى جىلىتۋ پەشتەرىن قولدانۋ سالدارىنان ۋلى گازبەن ۋلانۋدىڭ الدىن-الۋ جانە بولدىرماۋ بولىپ تابىلادى.
«اۋلا ارالاۋ كەزىندە جىلىتۋ قوندىرعىلارى تەكسەرىلىپ, ولاردى قولدانۋ كەزىندە ءورت قاۋىپسىزدىك ەرەجەلەرىن ساقتاۋ بويىنشا كەڭەس بەرىلەدى», - دەپ جازىلعان تاراتىلعان حابارلامادا.